ورال وڭىرىندە ونىڭ سانى 2 مىڭعا جاقىندايدى
بۇگىنگى كۇننىڭ ەڭ وزەكتى ءارى كوكەيكەستى ماسەلەلەرىنىڭ ءبىرى تۇرعىنداردى جۇمىسپەن قامتۋ بولىپ تابىلادى. قازىرگى كەزدە ءاربىر جۇمىس ورنىنىڭ الاتىن الەۋمەتتىك ماڭىزى مەن ءرولى ايرىقشا. ەگەر جەرگىلىكتى مەملەكەتتىك ورگاندار تاراپىنان بوس جۇمىس ورىندارى جاسىرىن ۇستالسا, ول حالىقتى جۇمىسپەن قامتۋ تۋرالى زاڭدىلىقتاردى بەلدەن باسۋ بولىپ شىعادى.
ورال وڭىرىندە اتالمىش مەملەكەتتىك مەكەمەلەر تاراپىنان وسىنداي تەرىس كورىنىستەر ورىن العانى بەلگىلى بولىپ وتىر. پروكۋراتۋرا ورگاندارىنداعى تەكسەرۋ قورىتىندىلارى بويىنشا جيناقتالعان دەرەكتەرگە سۇيەنسەك, وبلىستاعى مەملەكەتتىك ۇيىمنىڭ ۇشتەن ءبىرى عانا بۇل باعىتتاعى تالاپتارعا وڭ قاراعانىنا كوز جەتكىزەمىز.
مۇنى ماسقارالىق دەيمىز بە, سۇمدىق دەيمىز بە, ءار جاعىن ءوزىڭىز باعىمداي بەرىڭىز. مۇنداعى باستى ولقىلىق وبلىستاعى جۇمىسپەن قامتۋ ورتالىقتارىنا جەرگىلىكتى مەملەكەتتىك مەكەمە جەتەكشىلەرىنىڭ بوس جۇمىس ورىندارى جونىندەگى مالىمەتتەردى دەر ۋاقىتىندا جولداماۋى, ونى جاسىرىپ قالۋى دەسەك شىندىقتان الشاق كەتپەيمىز. مۇنىڭ ءوزى ونسىز دا جەتىسىپ, كەلىسىپ تۇرماعان جۇمىسسىزداردىڭ جۇمىسقا ورنالاسۋى جونىندەگى مۇمكىندىگىن ودان ءارى كۇردەلەندىرىپ جىبەرەدى. قىسقاسى, وتكەن جىلعى كەزەڭنەن قازىرگى كۇنگە دەيىن وڭىردە بوس جۇمىس ورىندارى جونىندە حابارلانباعان, جاسىرىلىپ قالعان ەكى مىڭعا جۋىق دەرەك پروكۋرورلىق تەكسەرۋلەر ناتيجەسىندە انىقتالعان.
ونىڭ باسىم بولىگى وبلىستاعى ءبىلىم بەرۋ سالاسىنىڭ ۇلەسى مەن ەنشىسىنە تيەدى. اتاپ ايتقاندا ءبىلىم بەرۋ جۇيەسىندە 644 بوس جۇمىس ورنى بولا تۇرا, ونىڭ ءتيىستى, وكىلەتتى ورتالىقتارعا حابارلانباعانىن نەمەن تۇسىندىرۋگە بولار ەكەن؟ سوندا وبلىستىق ءبىلىم بەرۋ باسقارماسىنا قاراستى جەرگىلىكتى ۇيىم باسشىلارىنىڭ كوزدەگەن ماقساتتارى قانداي؟ بۇل ساۋالداردىڭ اق-قاراسى مەن ارا-جىگىن اجىراتۋعا دارمەنسىز بولىپ وتىرعانىمىزدى دا جاسىرىپ قالعىمىز كەلمەيدى.
اتالعان جاعداي تەك جەرگىلىكتى مەملەكەتتىك مەكەمەلەردە عانا ورىن الىپ وتىرعان كورىنىس. ال وبلىستاعى ۇكىمەتتىك ەمەس, جەكەمەنشىك قۇرىلىمداردا نە بولىپ جاتقانى تەك ءبىر قۇدايدىڭ وزىنە عانا ايان بولسا كەرەك. ارينە, بوس جۇمىس ورىندارى بولا تۇرا جۇمىس بەرۋشىلەردىڭ ونى جۇمىسپەن قامتۋ ورتالىقتارىنا حابارلاماۋى – ەنجارلىق پەن جانى اشىماستىقتىڭ جانە جاۋاپسىزدىق پەن سالعىرتتىقتىڭ كورىنىسى.
ولاردىڭ جۇمىسسىز جۇرگەن جانداردى جۇمىسقا الۋدان نەگىزسىز باس تارتۋى جونىندە دە وسىلاي دەمەسكە لاجىمىز جوق. قولدان جاسالعان مۇنداي كەرەعارلىق كەزىندە وبلىستاعى جۇمىسسىزدىق دەڭگەيى ودان ءارى وسە تۇسەتىنى حاق. سوندىقتان ونىڭ مولشەرىن تومەندەتۋدىڭ باستى جولى جۇمىسپەن قامتۋ تۋرالى زاڭنامالىق تالاپتاردىڭ مۇلتىكسىز ورىندالۋى دەۋگە بولادى. وبلىستا وسى تالاپتاردى ورىنداماعان, مۇنى ساقتاماعان ەلۋ تۇلعانىڭ اكىمشىلىك جانە قىرىق ءتورت تۇلعانىڭ تارتىپتىك جاۋاپكەرشىلىككە تارتىلعانى بۇگىنگى تاقىرىپتىڭ تەكتەن-تەك كوتەرىلىپ وتىرماعانىن كورسەتەدى.
– ءبىز وبلىستىق اكىمدىكتىڭ قۇرىلىمدىق بولىمشەلەرىنە ءتۇسىندىرۋ جۇمىستارىن جۇرگىزۋ قاجەتتىلىگى جونىندە ءتيىستى ۇسىنىستار تۇسىردىك. سونىمەن بىرگە باتىس قازاقستان وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى جەرگىلىكتى مەملەكەتتىك ورگاندارداعى جۇمىس بەرۋشىلەر اراسىنداعى وسى تەكتەس جۇمىستاردى جەدەل ءارى جۇيەلى تۇردە قولعا السا, بۇگىنگى كۇنى ەكى مىڭعا جاقىنداعان بوس جۇمىس ورىندارى ءوز يەلەرىن تاپقان بولار ەدى. الەۋمەتتىك تۇرعىدان ماڭىزدى بولىپ سانالاتىن وسىنداي تەكسەرۋلەر وزگە مەنشىك تۇرلەرى اراسىندا دا جۇرگىزىلسە, تىپتەن دۇرىس بولار ەدى, – دەدى بۇل ماسەلە جايىندا باتىس قازاقستان وبلىستىق پروكۋراتۋراسى ءبىرىنشى باسقارماسىنىڭ باستىعى جاننۇر احمەتبەك.
ءوز كەزەگىندە وبلىس اكىمدىگى مەملەكەتتىك ۇيىمدارداعى بوس جۇمىس ورىندارىن جۇمىسسىز تۇرعىندار ەسەبىنەن تولىقتىرۋعا ىقپال جاسايدى دەپ سەنگىمىز كەلەدى. ارينە بۇل ماسەلە جان-جاقتى ءارى كەشەندى كوزقاراس جاعدايىندا جۇزەگە اسىرىلماسا, «باياعى جارتاس ءبىر جارتاس» دەگەندەي سول بۇرىنعى جارتىكەش كۇيىندە قالىپ قويۋى ابدەن مۇمكىن. بۇعان جول بەرمەۋدىڭ باستى تۇتقاسى – جۇمىس بەرۋشىلەردىڭ سۇرانىستارىن تەرەڭ تۇردە زەردەلەۋ جانە جۇمىسسىزداردى قايتا دايارلاۋعا جەتكىلىكتى تۇردە كوڭىل ءبولۋ ەمەس پە؟! بۇل تۇستا مەدالدىڭ ەكى جاعى بار ەكەنىن دە نازاردان تىس قالدىرماعان ءجون. بوس تۇرعان جۇمىس ورنىن تولىقتىرۋدىڭ ءجونى وسى ەكەن دەپ, وعان كولدەنەڭ كوك اتتىنىڭ ءبارىن تىقپالاي بەرسەك نە بولعانى؟ ءسىرا, مۇنىڭ ارعى جاعىن ايتپاي-اق قويعاننىڭ ءوزى ابىروي بولسا كەرەك.
تەمىر قۇسايىن,
«ەگەمەن قازاقستان»
باتىس قازاقستان وبلىسى