[caption id="attachment_48762" align="aligncenter" width="560"] ras.kz[/caption]
قىتايدىڭ كوپ ميلليون ادام تۇراتىن باس قالاسى – بەيجىڭنىڭ تابانى جەراستى سۋلارىن تارتىپ الۋدان تومەن قاراي ءتۇسىپ بارا جاتىر.
اسپاناستى ەلى عالىمدارىنىڭ تۇجىرىمىنا سۇيەنىپ حابارلاعان ras.kz قازىرگى تاڭدا بۇل الىپ شاھاردا 21 ميلليون ادامنىڭ تۇراتىنىن باياندايدى.
حالىقارالىق زەرتتەۋشىلەر توبى قىتاي استاناسىنىڭ جىلىنا 11 سانتيمەتر تومەن ءتۇسىپ بارا جاتقانىنا كوز جەتكىزگەن.
بەيجىڭنىڭ وتىرۋى استانا تۇرعىندارىنىڭ ومىرىنە ۇلكەن قاۋىپ توندىرگەلى تۇر. وسىنىڭ سالدارىنان الداعى ۋاقىتتاردا جوعارى جىلدامدىقتى تەمىر جول جۇيەسى, كولىكتەر توننەلدەرى مەن بيىك ءزاۋلىم ۇيلەر قۇلاۋى ابدەن مۇمكىن.
بىرقاتار جوعارى دامىعان ەلدەردەن جينالعان زەرتتەۋشىلەر رەلەفتەگى كىشكەنتاي اۋىتقۋشىلىقتىڭ ءوزىن تىركەي الاتىن سينتەتيكالىق اپەرتۋراسى بار رادارلى ينتەرفەرومەتردىڭ كومەگىمەن بەيجىڭنىڭ بىرتىندەپ جەر استىنا قاراي كەتىپ بارا جاتقانىن, ونىڭ جىلدىق ورتاشا مولشەرى 11 سانتيمەتردى قۇرايتىنىن انىقتاعان. عالىمداردىڭ پىكىرىنشە, بۇل جەراستى سۋلارىن تارتىپ الۋ مەن قالا استىنداعى توپىراق قاباتىنىڭ بۇزىلۋىنان بولىپ جاتىر.
قالانىڭ وتىرۋى اسپانمەن تالاسقان بيىك عيماراتتارى كوپ, شەڭبەرلى جولدارى بار چاويان اۋدانى جاقتا ايرىقشا قاتتى بىلىنەدى.
زەرتتەۋشىلەر قىتاي استاناسىنىڭ گەوگرافيالىق جاعىنان جازىق جەردە ورنالاسقانىن العا تارتا وتىرىپ, ونىڭ استىندا مىڭداعان جىلدار بويى كوپ مولشەردە جەراستى سۋلارى جينالىپ قالعانىن ايتادى. ەندى سول سۋلاردى قاتتى قارقىنمەن تارتىپ الۋ سالدارىنان جەر قاباتىندا ءبىر-بىرىمەن «تىعىزداسۋ» پروتسەسى ءجۇرىپ جاتىر. بۇل ءوز كەزەگىندە جەر دەڭگەيىنىڭ تومەن تۇسۋىنە الىپ بارادى.
تالعات رايىمبەك.