[caption id="attachment_48713" align="aligncenter" width="560"] فوتو: lenta.ru[/caption]
قىتايدىڭ تسزيانسۋ پروۆينتسياسىندا جويقىن داۋىلدان قازا تاپقاندار سانى 99 ادامعا جەتتى. Lenta.ru-دىڭ حابارلاۋىنشا, بۇدان بولەك 846 جەرگىلىكتى تۇرعىن ءتۇرلى دەڭگەيدە جاراقات العان. العاشىندا بۇل ايماقتا 78 تۇرعىننىڭ وپات بولىپ, 500-گە جۋىعى زارداپ شەككەنى تۋرالى اقپارات تاراعان.
قازىرگى تاڭدا 1,6 مىڭ ادام ءۇيسىز قالدى. بيلىك ولاردى ۋاقىتشا باسپانالارعا ورنالاستىردى. قۇتقارۋشىلار توبى ەلەكتر جەلىسى مەن سۋمەن جابدىقتاۋ ورىندارىن قالپىنا كەلتىرۋ جۇمىستارىمەن اينالىسۋدا.
وتكەن بەيسەنبى كۇنى, 23 ماۋسىمدا يانچەن قالاسىندا بۇرشاق ارالاس جاڭبىر جاۋىپ, جويقىن داۋىل بولدى. سالدارىنان بۇل ماڭايعا ايتارلىقتاي شىعىن كەلدى. ادام ومىرىنە قاۋىپتى حيميكاتتار وندىرەتىن ەكى زاۋىتتىڭ جۇمىسىنا كەرى اسەرىن تيگىزدى. China Daily باسىلىمى ونىڭ جىلدامدىعى سەكۋندىنا 35 مەترگە دەيىن جەتكەندىگىن حابارلادى.
مالىمەتتەر بويىنشا, يانچەن قالاسىندا 1966 جىلدان بەرى مۇنداي تابيعات اپاتى بولماعان ەكەن.
ايان ءابدۋالي.