Washington Post ەو-دان شىعۋ تاۋەكەلى جوعارى 5 ەلدى اتادى

www.newyorker.com

Washington Post گازەتى ەۋرووداق ەلدەرى قاتارىنداعى ەندى ودان شىعۋدىڭ تاۋەكەلى جوعارى 5 ىقتيمال مەملەكەتتىڭ اتتارىن اتادى. باسىلىمنىڭ جازۋىنشا, Brexit ەۋروپا بىرلەستىگىندەگى تاعى دا بىرقاتار ەلدەردىڭ شەشۋشى قادامعا بارۋلارىنا اپارىپ سوقتىرۋلارى مۇمكىن. امەريكا ءباسپاسوزى Brexit ەۋرووداققا ەتەتىن اسەرلەرى قانداي بولۋى مۇمكىن ەكەنىنە تالداۋ جاسايدى. بىراقاتار ساراپشىلار مۇنىڭ بىرلەستىك ىدىراۋىنىڭ باسۋى بولاتىنىن بولجايدى. وسىعان وراي كەلەسى كەزەكتە وسىنداي قادامعا باراتىن ەلدەردىڭ كىمدەر بولاتىنىن اتاپ وتەدى. باسىلىم الدىڭعى 5 ەلدىڭ كوشىن شۆەتسيا باستايدى دەگەن سەنىمدە. ءوزىن « ۇلىبريتانيانىڭ سكانديناۆ ۇلگىسىندەگى ەكۆيۆالەنتى» سانايتىن ەلدىڭ وداقتان شىققىسى كەلىپ جۇرگەنىنە ءبىراز بولدى. شۆەدتەر قاشاننان تاۋەلسىزدىكتى قالايدى. ولار سوندىقتان, مىسالى, ەۋروعا كوشۋدەن باس تارتتى. مۇنداعى حالىقتىڭ باسىم بولىگىنىڭ كوزقاراستارى بريتانيالىقتار ويلارىمەن ۇندەسەدى. تاۋەكەلدىڭ قايىعىنا مىنگەلى تۇرعان ەلدەردىڭ ەكىنشىسى – دانيا. ول وتكەن جىلعى رەفەرەندۋمىندا بريۋسسەلگە بەرىلەتىن قۇقىقتار قاتارىن كەمىتىپ تاستاعان. داتتار سونداي-اق وزدەرىنىڭ شاعىن جەرلەرىنە ميگرانتتاردىڭ قاپتاپ كەلۋلەرىنە ءۇزىلدى-كەسىلدى قارسى. بۇدان ءارى تىزىمگە گرەكيا كەلەدى. قازىر تەرەڭ داعدارىس جاعدايىندا وتىرعان ەلدى ەو-مەن بايلانىستىرىپ تۇرعان جالعىز جالعاۋ ونىڭ بۇل جاقتان كومەككە اقشا الۋعا ماجبۇرلىگى عانا بولىپ تۇر. ەۋرووداقتىڭ قابىرعاسىن قاقىراتۋعا ۆەنگريا دا دايىن. ونىڭ پرەمەرى ۆيكتور وربان ءوزىنىڭ بريۋسسەلگە تاۋەلسىز ەمەس ەكەنىن كورسەتۋگە قۇمار. بۇل ەل دە رەفەرەندۋم وتكىزۋ تۋرالى ءسوز قوزعاپ قالدى. اقىر سوڭىندا – فرانتسيا. بۇل ەو-عا تيگەن ەڭ اۋىر سوققى بولار ەدى. وداقتىڭ ءۇش كيتىنىڭ ءبىرى سانالىپ كەلگەن مەملەكەت كەتە قالسا, ءبىر وزىنە ۇلىبريتانيا مەن فرانتسيانىڭ ورنىن جابۋعا تۋرا كەلەتىن گەرمانياعا ءتىپتى قيىن بولادى. ال قازىرگى ساۋالنامالار دەرەگىنە سەنسەك, ەل جۇرتىنىڭ 61 اپيىزى ەۋرووداق ۇستانىپ وتىرعان ساياساتقا رازى ەمەس. اسىرەسە, ەل قيىن ەكونوميكالىق جاعدايدا وتىرعان بۇگىنگى كۇنى بۇل انىق بايقالادى. وڭشىلدار پارتياسىنىڭ ليدەرى مارين لە پەن بريتانيا شەشىمىنە قاتتى قۋانعانداردىڭ ءبىرى بولدى. ول ءوز ەلىندە دە Brexit وتكىزۋدى ۇسىنىپ وتىر. فرانتسۋز دەپۋتاتى ەۋرووداقتى قايتا قۇرۋدى, وعان رەسەيدى كىرگىزۋدى ۇسىنۋدا. مۇرات ايتقوجا.