قازاقستان اۋىر اتلەتتەرى ريوعا باراتىن بولىپ شەشىلدى

«مير24»

دوپينگ جانجالىنا بايلانىستى ديسكۆاليفيكاتسياعا ۇشىراعالى تۇرعان قازاقستان اۋىر اتلەتتەرى ريو-دە-جانەيرودا بيىلعى جىلعى تامىز ايىندا وتەتىن جازعى وليمپيالىق ويىندارعا باراتىن بولىپ شەشىلدى. «مير24» تەلەارناسى حابارلاعانداي, گرۋزيا استاناسى – تبيليسي قالاسىندا وتكەن بۇكىلالەمدىك اۋىر اتلەتيكا فەدەراتسياسى اتقارۋ كوميتەتىنىڭ وتىرىسىندا وسىنداي شەشىم قابىلدانعان. اتقارۋ كوميتەتى وسىندا ءۇش كۇن بويى جابىق ەسىك جاعدايىندا جۇمىس جاساعان. ونداعىلار بۇل ۋاقىتتىڭ بارىندە جۋرناليستەرمەن كەزدەسۋدەن باس تارتقان. مۇندا ەڭ سوڭعى ساتكە دەيىن قازاقستان, رەسەي جانە بەلارۋس اۋىر اتلەتتەرىنىڭ ويىندارعا جىبەرىلەتىن-جىبەرىلمەيتىن ماسەلەسى جان-جاقتى تالقىلانىپ كەلىپ, اقىرىندا ونى ءبىزدىڭ اتلەتتەردىڭ پايداسىنا قاراي شەشتى. «وليمپياداعا بۇرىن بەلگىلەنگەندەي 10 ەمەس, 8 سپورتشى بارادى. مۇنداي شارا ءبىزدىڭ جاقىن رەسپۋبليكالارىمىز قازاقستانعا, بەلارۋس پەن ازەربايجانعا دا قاتىستى», دەدى اتقارۋ كوميتەتىنىڭ رەسەيلىك مۇشەسى سەرگەي تەلەارنا تىلشىسىنە. كونگرەسس جۇمىسى اقىرعى ساتكە دەيىن وتە قاۋىرت تا جۇيكە جۇقارتاتىنداي دارەجەدە وتكەن. وعان قاتىسۋشىلار ءارتۇرلى كوماندالاردىڭ دوپينگ-جانجالدارى جايىن بۇگە-شىگەسىنە دەيىن تالقىلاعان. اڭگىمە بەيجىڭ مەن لوندون وليمپيالىق ويىندارى كەزىندە الىنعان تەستىلەر تۋرالى بولعان. بۇرىننان بەلگىلى بولعانداي,  ءۇش وڭ ناتيجە تۇتاس كوماندانى ويىنداردان شىعارىپ تاستاۋعا جەتكىلىكتى ەدى. دامير قوجامقۇل.