فريستايل
دميتري بارماشوۆ: ارمانىم اقيقاتقا اينالدى
قازاقستان فريستايل قۇراماسىنىڭ باس باپكەرى ۆيكتور لەمەشكو سوزىندە تۇردى. جاتتىقتىرۋشى جارىس باستالماي جاتىپ-اق جەرلەستەرىمىزدىڭ جەڭىس تۇعىرىنا كوتەرىلەتىنىنە سەنىمدى ەكەنىن اشىق مالىمدەگەن-ءدى. انە-مىنە دەگەنشە, «تاباعان» سپورتتىق كەشەنىندە ءتورت ەلدىڭ, ياعني قازاقستان, قىتاي, جاپونيا جانە وڭتۇستىك كورەيا فريستايلشىلارىنىڭ قاتار موگۋل جارىستارى اياقتالدى. ەرلەر اراسىنداعى دا, قىزدار اراسىنداعى دا ازيادا التىنى – قازاقستاندا! وسىعان دەيىن دە جەكە موگۋل سايىسىندا ازيادا التىنىن تاققان يۋليا گالىشەۆا كەزەكتى رەت جەڭىمپازدار تۇعىرىنا كوتەرىلدى. جىگىتتەر اراسىندا دميتري بارماشوۆ باس جۇلدەنى يەمدەندى. كۇمىس مەدالدى دە ءوزىمىزدىڭ يۋليا روديونوۆا جەڭىپ الدى.
وسىعان دەيىن 31 قاڭتاردا جەكە موگۋلدا قولانى قورجىنىنا سالعان ازيادا چەمپيونى دميتري بارماشوۆ ماراپاتتاۋ سالتاناتىنان كەيىن جۋرناليستەرگە بەرگەن قىسقا سۇحباتىندا ءوز جەڭىسىن باپكەرى ۆاديم سوكولوۆقا ارنايتىنىن ايتتى.
– ازيا ويىندارىندا التىن جۇلدە الۋ مەنىڭ ارمانىم بولعان. باپكەرسىز ونى جۇزەگە اسىرا الماۋشى ەدىم. اۋا رايى بوگەت بولعان جوق.
كوزىلدىرىگىمە قار جابىسا بەردى, بىراق وعان نازار اۋدارمادىم. تەك التىن جۇلدە تۋرالى ويلادىم! – دەدى التىندى جىگىت.
سپورتتىڭ اتى – سپورت قوي. كۇتپەگەن وقيعالار بولا بەرەدى. باستاپقىدا باپكەرلەر دە, باسقاسى دا قاتار موگۋلدىڭ باس جۇلدەسىن جەكە موگۋلدا الدىنا جان سالماعان دميتري رەيحەرد الاتىنىنا سەنگەن ەدى. الايدا, باستاپقىدا الدا بولعان بۇل جىگىتىمىز شاڭعى اقاۋىنا بايلانىستى شيرەك فينالدان شىعىپ قالدى.
وكىنىشكە قاراي, 2008 جىلى الەم كۋبوگىندا التىن مەدالدى جەڭىپ العان, 2009 جىلى الەم چەمپيوناتىنا, 2006 جىلى وليمپيا ويىندارىنا جەكەلەي جارىسقا قاتىسقان, ازيادا-2011-دە موگۋل جارىسىندا بولىپ, جەكەلەي ەسەپتە چەمپيون اتانعان قازاقستاندىق فريستايلشى دميتري رەيحەردتىڭ سوڭعى جارىس قورىتىندىسىنا كوڭىلى قوش بولمادى. ول ىرىكتەۋ سىنىندا نەبارى بەسىنشى ورىن الۋمەن شەكتەلدى. شيرەك فينالدى دا جاقسى باستاي العان جوق. مارە سىزىعىنا ءبىرىنشى بولىپ جەتە المادى. ماماندار ونىڭ ءساتسىزدىگىن كوڭىل-كۇيىنىڭ ونشا بولماعاندىعىنان دەپ ەسەپتەيدى. جابىرقاۋلىق پەن ىشتەي كۇيزەلۋ وسىنداي قاتەلىككە ۇشىراۋىنا ىقپال ەتتى. سونىڭ سالدارىنان قاجەتتى مولشەردە ۇپاي جيناقتاي الماي, كورەيلىك چوي دجاە-ۆۋدان قالىپ قويدى.
مىنا قىزىقتى قاراڭىز! دميتري جەكە جارىستا التىن الۋعا ءدال سورەدەن قوزعالاردا قوڭىراۋ سوعىلىپ, ۇيالى تەلەفوننان شىققان اۋەن جىگەرلەنۋگە سەپتەسكەنى جايلى سىر بولىسكەن بولاتىن. بۇل جولى نەگە كۇيزەلدى ەكەن؟
ال ازيادانىڭ ەكى دۇركىن چەمپيونى يۋليا گالىشەۆا قاتار موگۋلداعى ءبىرىنشى سايىس اياقتالىسىمەن ءوز اسەرىمەن ءبولىسىپ:
– ارينە, بۇگىنگى جاڭبىر قيىندىق تۋدىردى, شاڭعى دۇرىس سىرعاناماي, تەجەلىپ, ترامپليننەن سەكىرۋگە جىلدامدىق جەتپەي جاتتى. دەگەنمەن, مەن ءبىرىنشى بولدىم.
جەكە موگۋلدا ونەر كورسەتكەن سپورتشىلاردىڭ مۇمكىندىكتەرى ساراپقا سالىنعاندا, نەگىزگى تارتىس قازاقستان مەن جاپونيا اراسىندا جۇرەتىنى بولجانعان. بۇل قازاقستاندىق موگۋل كومانداسىنىڭ جەتەكشىسى ۆيكتور رەيحەردتىڭ پىكىرى.
الايدا, كۇمىستى يەلەنگەن يۋليا روديونوۆا قۇلاماعاندا, جارىس ءناتيجەسى باسقاشا بولار ەدى. ول تەپە-تەڭدىگىن جوعالتىپ الدى. ءۇشىنشى ورىندا – جاپوندىق ميكي يتو.
فريستايل بويىنشا قول جەتكىزگەن قوماقتى تابىستاردى قورىتىندىلاي كەلە, سارسەنبى كۇنى قىسقى ازيا ويىندارىنىڭ باس ءباسپاسوز ورتالىعىندا باسپاسوز ءماسليحاتى ءوتتى. وعان ۇلتتىق فريستايل جانە سنوۋبورد فەدەراتسياسىنىڭ ۆيتسە-پرەزيدەنتى ەلەنا كرۋگلىحينا مەن موگۋلشىلار قۇراما كومانداسىنىڭ كاپيتانى ۆيكتور رەيحەرد قاتىستى.
– ءبىزدىڭ موگۋلشىلارىمىزدىڭ باعدارلامالارى ابدەن سىناقتان وتكەن, سوندىقتان ءبارى جاقسى بولادى دەپ ويلايمىن. ەڭ باستىسى, سپورتشىلارىمىزدىڭ پسيحولوگيالىق دايىندىعى وتە جوعارى, – دەدى ول ءوز سوزىندە.
ەلەنا كرۋگلىحينا بولسا ازيادا ويىندارىنان كەيىن ۇلتتىق فريستايل جانە سنوۋبورد فەدەراتسياسى جاستار اراسىندا سپورتتىڭ وسى ءتۇرىن ناسيحاتتاۋدى مىقتاپ قولعا الاتىنىن ايتتى.
كوپ جىلدار بويى قازاقستاننىڭ فريستايل قۇراماسىنىڭ موگۋل بويىنشا كوشباسشى بولىپ كەلگەن الەكسەي باننيكوۆ قازاقستاندا ءوتىپ جاتقان مۇنداي شارا وتاندىق فريستايلدىڭ دامۋىنا تۇرتكى بولادى دەپ ۇمىتتەندى.
قازىرگى ۋاقىتتا باننيكوۆ سكي-كروسسۋ بويىنشا توپتىڭ باپكەرى, ونىڭ پىكىرىنشە بۇل ديستسيپلينا قازاقستاندا كەڭ تاراۋى مۇمكىن.
– قازىر سكي-كروسس بۇكىل الەم بويىنشا دامىپ جاتىر. ول تەك ۆانكۋۆەردەگى وليمپيادادان كەيىن رەسمي تۇردە وليمپيادالىق دەپ مويىندالدى, – دەيدى الەكسەي. – ال ازيا ويىندارىن ءوتكىزۋگە سۇرانىستى ءبىز ونىڭ الدىندا جىبەرىپ قويعانبىز. سولاي بولسا دا, وكىنىشكە قاراي, ازيادادا سكي-كروسس بولعان جوق. دەگەنمەن ءبىز وسى ديستسيپلينانى مىندەتتى تۇردە دامىتامىز.
ايناش ەسالي.
الماتى.