قازاقستان حالقى اسسامبلەياسى جۋرناليستەر كلۋبىنىڭ كەڭەيتىلگەن وتىرىسى ءوتتى. شاراعا قحا توراعاسىنىڭ ورىنباسارى – حاتشىلىق مەڭگەرۋشىسى ەرالى توعجانوۆ پەن ءماجىلىس دەپۋتاتتارى جانە بۇقارالىق اقپارات قۇرالدارىنىڭ وكىلدەرى قاتىستى. القالى جيىندا وتاندىق باق سالاسىن جاڭعىرتا وتىرىپ, قوعامدىق كەلىسىم مەن جالپىۇلتتىق بىرلىكتى نىعايتۋ, «ماڭگىلىك ەل» پاتريوتتىق اكتىسىن ىلگەرىلەتۋ مەن ونى جۇرتشىلىققا تۇسىندىرۋدە قحا جۋرناليستەر كلۋبىنىڭ ءرولى تالقىلاندى.
ە.توعجانوۆ ەڭ الدىمەن ءتىل ماسەلەسىنە توقتالىپ ءوتتى. ءتىل – ۇلتتار تاتۋلىعىن ساقتاپ, بەيبىت زاماندا مامىراجاي عۇمىر كەشۋدىڭ بىردەن-ءبىر تەتىگى. ول قاي كەزدە دە قوعامنىڭ قىزۋ تالقىسىندا, جۇرتشىلىقتىڭ نازارىندا بولىپ كەلەتىن دۇنيە ەكەندىگىن ءبارىمىز بىلەمىز. سوندىقتان دا اسسامبلەيا ۇلتتار ىنتىماعىن ارتتىرىپ, قازاق ءتىلىنىڭ مارتەبەسىن كوتەرۋگە قانداي ۇلەس قوسىپ جاتقانىن وسىنداي ءىس-ارەكەتىمىزبەن ناقتى كورسەتكىمىز كەلەدى. بۇل باعىتتا اتقارىپ جاتقان اۋقىمدى شارالارىمىز از ەمەس. سونىڭ ءبىرى – باق وكىلدەرىمەن بىرلەسە جۇمىس ءىستەۋ ارقىلى ىنتىماعىمىزدى ساقتاۋ, تاتۋلىقتى تۋ ەتىپ, بەرەكە-بىرلىكتى دارىپتەۋ, دەدى ول.
وتىرىستا ۇلتتاردى ۇيىستىرۋعا شاقىراتىن ۇلتتىق قۇندىلىقتاردى اقپاراتتىق ناسيحات رەتىندە كەڭىنەن قولدانۋ كەرەكتىگى دە ايتىلىپ, ونداي پىكىر قىزۋ قولداۋعا يە بولدى. بۇل ماسەلەنى «ايقىن» رەسپۋبليكالىق قوعامدىق-ساياسي گازەتىنىڭ باس رەداكتورى نۇرتورە ءجۇسىپ كوتەردى. ول «ماڭگىلىك ەل» پاتريوتتىق اكتىسىن ىلگەرىلەتۋ مەن تۇسىندىرۋدەگى قحا جۋرناليستەر كلۋبىنىڭ ءرولى» اتتى تاقىرىپتا سويلەگەن سوزىندە بىرقاتار ماسەلەنى ءسوز ەتتى. سولاردىڭ ىشىندە ەرەكشە اتاپ وتكىم كەلەتىنى مەملەكەت باسشىسىنىڭ باستاماسىمەن شىعارىلعان ۇلتتىق بايلىعىمىزدىڭ ءبىرى – «قازاقتىڭ مىڭ ءانى مەن كۇيى» دەگەن عاجاپ جوباسى ەدى. وسىنداعى ءان مەن جىر, كۇيلەرىمىزدى تاتۋلىعىمىزدى ايرانداي ۇيىتۋعا نەگە كەڭىنەن قولدانباسقا؟! ماسەلەن, بابادان قالعان وسىنداي بايلىقتارىمىزدى مەملەكەتتىك ساتىپ الۋ قىزمەتى ارقىلى راديوتولقىندىق ءجيىلىكتەر مەن تەلەەكرانداردان نەگە كورسەتپەيمىز؟! بۇل جەردە ءجۇزدەن استام ۇلت وكىلدەرىنىڭ تۇراقتىلىعىن ساقتاعان مەملەكەت رەتىندە مىندەتتەۋگە حاقىمىز بار شىعار. اسىلىندا, مۇنداي ۇلتتىق قۇندىلىقتارىمىز ۇلتتاردى ۇيىستىرا تۇسەتىندىگىنە بەك سەنىمدىمىن, دەدى ن.ءجۇسىپ.
سونداي-اق, ول ءوز سوزىندە حالىق بىرلىگىن ساقتاۋدا مادەني بايلانىس پەن سالت-ءداستۇردى ۇشتاستىراتىن قارىم-قاتىناستار تۋرالى ايتا كەلە, وتانداستار اراسىندا وتەتىن «ءتىلاشار تويلار» كەڭىنەن ناسيحاتتالسا دەگەن پىكىرىن ءبىلدىردى. سونىمەن قاتار, ول ارىپتەستەرىمىزدى ۇلتتار اراسىنداعى تاتۋلىقتى بايانداۋدا «وزگە ۇلت» دەگەن تىركەستىڭ «وزگە» ءسوزىن ساقتانا قولدانۋعا شاقىردى. سەبەبى, ونىڭ پىكىرىنشە, مۇنداعى «وزگە» ءسوزى ءوز وتانداستارىمىزدى شەتتەتكەندەي رەڭك بەرەدى.
جالپى, جيىندا ايتىلعان وي-تولعامدار نوبايى نەگىزىنەن ەكى ماسەلە توڭىرەگىندە ءوربىدى. ونىڭ ءبىرى – اسسامبلەيا اياسىنداعى جۋرناليستەر كلۋبىنىڭ جۇمىسىن جەتىلدىرۋ بولسا, ەكىنشىسى – ۇلتتار اراسىندا ۇلتتىق قۇندىلىقتاردى مەيلىنشە ناسيحاتتاۋ, تاراتۋ, تانىتۋ. العاشقى باعىت بويىنشا الداعى ۋاقىتتا قحا وكىلدەرى مەن وسى ۇيىم اتىنان سايلانعان ءماجىلىس دەپۋتاتتارى جانە باق جەتەكشىلەرى جەرگىلىكتى جۇرتشىلىقپەن ەركىن پىكىر الماسۋ ءۇشىن جوسپارلى ءتۇردە ايماقتاردى ارالايتىندىعى بەكىتىلسە, ەكىنشى باعىت بويىنشا جيىندا ايتىلعان ۇسىنىس, پىكىرلەردىڭ ەشبىرى دە نازاردان تىس قالماي, جۇزەگە اسىرىلاتىن بولىپ شەشىم قابىلداندى.
وسىلايشا, اسسامبلەيانىڭ وتىرىسىندا ۇلتتىق قۇندىلىقتارىمىزدى ۇلتتارعا كەڭىرەك ناسيحاتتاپ, ۇيرەتۋگە ۇندەگەن ويلار ۇستەمدىك قۇردى. جيىن سوڭىندا ەرالى لۇقپان ۇلى بىرقاتار باق باسشىلىعى مەن وكىلدەرىن ءتول مەرەكەلەرىمەن قۇتتىقتاپ, قازاقستان حالقى اسسامبلەياسىنىڭ قوعامدىق «بىرلىك» التىن مەدالى مەن اسسامبلەيا اتىنان العىس حاتتار تاپسىردى.
نۇرلىبەك دوسىباي,
«ەگەمەن قازاقستان»