جاسا, قازاقستان! جاسا, قازاق قىزدارى!

حوككەيشى قارىنداستارىمىز اقتىق سىندا قىتاي قۇراماسىن 4:1 ەسەبىمەن جەڭىپ, ازيادانىڭ ءۇش دۇركىن جەڭىمپازى اتاندى تاڭەرتەڭگىلىك مۇز ايدىنىنا شىققان جاپونيا مەن سولتۇستىك كورەيا قىزدارى جان الىپ, جان بەرىسەتىن ايقاسقا ءتۇستى. الما-كەزەك شابۋىل. بىراق, مىقتىنىڭ اتى مىق­تى عوي. كورەيا قاقپاسىنا سەرپىلگەن دوپقا ءبىرىنشى جەتكەن جاپون شابۋىلشىسى حيرانو تاياعىن قايقايا ۇردى دەيسىز. گول! وسىدان كەيىن-اق ويىن باسقاشا ءوربىدى. جاپوندار اتقان وقتاي جىلدام. وعان  ءبىرىن-ءبىرى الاڭدا كورىپ, پاس­پەن وينايتىنىن قوسىڭىز. سول­تۇستىك كورەيا قىزدارىنىڭ جەڭىسكە دەگەن سۇمدىق جىگەرى شەبەرلىككە استار بولا المادى. ءبىرىنشى كەزەڭدە 2:0, ەكىنشى كەزەڭدە يونەياما, كوندو, حيرانو شايبا سوعىپ, ەسەپتى 5:0 گە جەتكىزگەن. سوڭعى كەزەڭدە جاپون­داردىڭ ايقىن باسىمدىلىعىمەن ءوتتى. 6:0. قازاقستان – قىتاي. نە بەل, نە بەلبەۋ كەتەتىن ويىن. سارايدا ينە شانشار جەر جوق. جانكۇيەرلەر قۇرامامىزدىڭ التىننان ولجا سال­عانىن قالايدى. جاپونيا - سول­تۇستىك كورەيا  ماتچىنان كەيىنگى باس­پاسوز ءماسليحاتىندا جاپون قۇرا­ما­سىنىڭ باس باپكەرى ەندريۋ قا­زاق­ستان مەن قىتاي قۇراما­لارى­نىڭ جەڭىسكە دەگەن مۇمكىن­دىكتەرى بىردەي دەدى. «وۆەرتايممەن بىتەدى. ماعان سالسا بۋلليتپەن جەڭىمپاز انىقتالعانى جاق­سى», دەگەندى جانە قوسقان. كومەيى بەلگىلى. سوندا عانا جاپوندىق­تاردىڭ التىننان دامەسى بولادى. قازاقستانعا جەڭىس اۋاداي كەرەك بولسا, جاپوندارعا ەسە جىبەرگەن قىتايلارعا ميلليون ەسە كەرەك. تال قارمارى وسى ويىن. ماتچتىڭ قاتتى شيرىعىپ باستالعانى سون­دىق­­تان. ءبىرىنشى كەزەڭنىڭ ورتان بەل­ىندە يبراگيموۆادان پاس العان شتەيلماستەر توقتاتپاي سىلتەدى. قاقپاشى تۇسىنبەي دە قالدى. گول! قىتاي حوككەيشىلەرى ساسقالاقتاپ قالدى.  بىراق قىز­دا­رى­مىز تاكتي­كا­لىق قاتەلەردى كوپ جىبەرىپ جات­تى. دارياعا راحمەت. توتەلەپ كەلگەن تالاي شايبانى قاقتى. ەكىنشى كەزەڭ تاعى دا شيرىعىپ باستال­دى. موي­نىندا قانداي جاۋاپكەرشىلىك تۇر­عانىن قىزدارى­مىزدىڭ ارقاي­سىسى جاق­سى ءتۇسى­نەدى. ويىن باستالىسى­مەن 5-6 ءمينوت بويى قىزدارىمىز قىتاي­لىقتاردى قات­تى تىقسىرىپ جىبەردى. اراسىندا ءبىر-بىرىنە دۇ­رىس پاس بەرمەي ءبىزدىڭ دە جۇرە­گىمىزدى ۇشىرىپ جىبەرە جازدايدى. زارينا تۋحتيەۆا ەر عوي. قازاق حوككەيىنىڭ ماڭ­دايىنا بىتكەن باق ەكەن. سازونوۆادان پاس الىپ قاق­پا­عا جەكە تارت­تى. گول! ەسەپ 2:0. قا­زاقستان الدا.  ءۇشىنشى كە­زەڭ. شى­نىن ايت­ساق, سونىڭ بول­ما­عانىن قا­لا­دىق. ويتكەنى, قى­تاي­لاردى جاق­سى بىلەمىز. سوڭعى سە­كونتكە دەيىن جانىن سالىپ وي­ناي­دى. قىزدارى­مىز  جەڭىس بۋىنا ءپى­سىپ قالماسا ەكەن دەپ ويلادىق. بىراق بىزدىكى اعات­تىق ەكەن. ناعىز جاۋ­جۇرەك قا­رىنداستار. نامىس دەگەن ۇلى كۇش بار قاندارىندا. ويىننىڭ 43-ءشى مينوتىندە شتەيلماستەر تاعى ءبىر گول سوقتى. 3:0. قىتايلار دا قاراپ قالمادى. اڭدىعان جاۋ الماي قويمايدى دەگەن. قاقپانى تورۋىل­داپ ءجۇرىپ, اتاقتى ما ءبىر گول سوعىپ كەتتى. ەسەپ 3:1. ويىن بىتۋگە 2 ءمينوت ۋاقىت قالدى. تايم-اۋت العان  قىتايلار ۆا-بانكقا كەتتى. قاقپاشىنى الىپ تاستادى. ءبىزدىڭ بەستىككە التاۋى ۇمتىلدى. وزدەرى­نىڭ سورى ەكەن. سول جاق قاپتالدان شايبا العان يبراگيموۆا قاقپانى ءدال كوزدەدى. ەسەپ 4:1. قىتايلار ىشقىندى. قاق­پاشى  جين فەنگلينگ  قايتا ورال­دى. بىراق, ولارعا ەشتەڭە كو­مەك­­تەسكەن جوق. ەسەپ وسى كۇيىندە قالدى.  الىپ سارايدى مو­يىنعا ءىلىپ كەتەردەي حالدە تۇرمىز. ۇيالى تەلەفونىم قايتا-قايتا شى­رىل­دايدى. بەلگىسىز ءبىر جانكۇيەر «زارينا تۋحتيەۆا قازاق پا؟»  دەيدى قايتا-قايتا. «قازاق دەدىم. - وسى قىزداردىڭ ءبارى قازاق. ەشكىم ولار­دى قازاق ەمەس دەپ ايتا المايدى». قازاق ءانۇرانى وينالعاندا ءبارى­نىڭ قوسىلىپ شىرقاعانىن-اي! جانكۇيەرلەرگە ەركەلەدى قىز­دار. ولاردىڭ سۇيكىمدى قالپىن, ەركەلىگىن بۇكىل قازاق دالاسى كوتەرسە دە بولادى. سونداي ەرلىك كەلدى قازاق قىزدارىنىڭ قولىنان. 1,5 ميلليارد حالقى بار قىتاي­دىڭ  قۇراماسى 16 ميلليون حالقى بار قازاقستان قۇراماسىنىڭ ال­دىندا تىزە بۇگىپ جاتسا وسىن­داي ءسوزدى قالاي ايتپاۋعا بولادى؟  ەكىن­شى ورىن جاپونيا قۇراما­سىنا بۇيىردى. دۇنيەجۇزىلىك رەي­­تينگتە قازاقستان مەن جاپو­ني­يا­نىڭ الدىندا تۇرعان قىتاي قۇرا­ماسى قولا مەدالعا يە بولدى. باقتيار تايجان.