قانداسىمىز قازاقستان اتىن جاقسى جاعىنان تانىتىپ ءجۇر
بۇگىندە قازاقستاندا تۋىپ, شەت مەملەكەتتەردە كاسىپتىڭ ۇرشىعىن ءيىرىپ, قازاق ۇل-قىزدارىنىڭ نە نارسەگە دە قابىلەتتى ەكەنىن كورسەتىپ, دالەلدەپ جۇرگەن قانداستارىمىز كوپ-اق. التى قۇرلىقتى مەكەن ەتكەن حالىقتاردىڭ ىشىندە قانداستارىمىز دا اتاكاسىپتى دوڭگەلەتىپ, وتانىنىڭ اتىن ايعا جازعانداي ايشىقتاپ ءجۇر. ولاردىڭ دەرلىگى ەلىمىزدە ءجۇرىپ بيزنەستىڭ العاشقى قادامدارىن جاساپ ۇلگەرگەن. كەيىن شەتەلدەرگە بارىپ, ءىرى كاسىپورىنداردىڭ نەگىزىن قالاعان. سونداي جاننىڭ ءبىرى – سايدا تاۋەكەلوۆا. قازاق قىزى وسىدان تۋرا ون جىل بۇرىن وتباسىمەن گرۋزياعا كوشىپ بارعان. مىنە, سودان بەرى ول ءوزى قالاعان جەتەكشى كومپانيانىڭ تىزگىندەۋشىسى, بيزنەس الەمىندەگى اتاقتى نازىك جاندىلاردىڭ ءبىرى بولىپ كەلەدى.
س.تاۋەكەلوۆا ەلدە جۇرگەندە زاڭگەرلىكتىڭ قىر-سىرىن جەتىك مەڭگەرگەن ەكەن. وسىندا ءتۇرلى مەكەمەلەردە زاڭگەر بولىپ جۇمىس ىستەپ, مول تاجىريبە جيناعان. ايتۋىنشا, ادام الدىنا ماقسات قويسا, ەڭبەك ەتسە, ىنتالانسا, سول ماقساتىنا جەتەدى. بۇل, شىنىندا دا, ءومىردىڭ جازىلماعان زاڭى. «وسىدان 10 جىل بۇرىن جۇبايىم گرۋزياداعى ءىرى كاسىپورىنعا جۇمىسقا شاقىرىلدى. سوسىن ول كوپ ويلانباستان, اتالعان مەملەكەتكە كەتتى. مەن بالالارىممەن قازاقستاندا قالدىم. كۇيەۋىم ءبىر ايدىڭ ىشىندە ءۇي ماسەلەسىن شەشىپ, ءبىزدى كوشىرىپ الدى. ول كەزدە قىزىمىز 4 ايلىق بولاتىن. مەن بالا كۇتىمىنە بايلانىستى دەمالىستا بولدىم, سوندىقتان جاڭا جەرگە كوشۋ مەن ءۇشىن قيىنعا سوقپادى», – دەيدى سايدا.
ايتسە دە تانىس ەمەس ورتا, جات قالا, بۇرىن كورىپ-بىلمەگەن ادامدار ونىڭ ءوز كاسىبىن باستاۋىنا از دا بولسا كەدەرگى كەلتىرگەن. ول الدىمەن ءتىل ءۇيرەنۋ كەرەكتىگىن ۇققان. سوسىن تاۋ حالقىنىڭ تالعامىن زەرتتەپ, بۇل ەلدە نە ءوتىمدى, گرۋزيندەر نەنى قالايتىنىن انىقتاۋ قاجەت ەكەنىن تۇسىنگەن. وسىلايشا جات ەلدە ءجۇرىپ, قاندايدا ءبىر كاسىپتىڭ شىلبىرىنا جارماسۋدى كوزدەپتى.
«مەن گرۋزيادا مۇلدەم بولعان ەمەس ەدىم. بۇل مەملەكەت جايىندا تەك اتام مەن اجەمنىڭ ايتقان اڭگىمەلەرىنەن, تەلەارنالار مەن گازەتتەردەگى جاڭالىقتار, فوتوسۋرەتتەر سەكىلدى دۇنيەلەردەن بىلەتىنمىن. ۇيدەگى ۇلكەن كىسىلەردىڭ گاگرا, پيتسۋندا, باتۋمي تۋرالى ايتقان اڭگىمەلەرى ارقىلى تاۋ حالقىن تاني باستادىم. ءبىر قىزىعى, تبيليسي تۋرالى اڭگىمەنى اجەم ۇلكەن تەبىرەنىسپەن ايتاتىن. نەگە ەكەنىن قايدام, بۇل قالا ول ءۇشىن ەڭ سۇيىكتى شاھارلاردىڭ ءبىرى سانالاتىن», – دەيدى ول.
سونىمەن قاتار, س.تاۋەكەلوۆا گرۋزيا تاريحىن ۇلكەن ىقىلاسپەن وقىعانىن ايتتى. «مەنى گرۋزيا وتە ەرتەدەگى ەل رەتىندە تاڭداندىردى. سونىمەن قاتار, ءوز شىعارمالارىندا ورىس جازۋشىلارى سۋرەتتەگەن جەرلەردى ارالاۋ وتە ۇنادى. قىزىمىز ەكەۋمىز گرۋزيانىڭ بارلىق جەرىندە بولدىق دەسەك تە بولادى. گرۋزيا – وتە ادەمى مەملەكەت, گرۋزيندەر – قوناقجاي حالىق, – دەيدى ول. – گرۋزياعا كوشپەس بۇرىن مەن ءىرى كومپانيادا زاڭگەر بولىپ جۇمىس ىستەدىم. مەنىڭ قارجى سالاسىندا دا تاجىريبەم بار, بەلگىلى ءبىر ۋاقىت ارالىعىندا قۇندى قاعازداردىڭ ورتالىق دەپوزيتاريىندە جۇمىس جاسادىم. وسىندا ءجۇرىپ, جەرگىلىكتى جەردىڭ زاڭناماسىمەن تانىستىم. ماعان مۇنداعى بيزنەستىڭ تازالىعى ۇنادى. سونىمەن, وسىدان ءتورت جىل بۇرىن سەرىكتەستەرىممەن ءبىرىگىپ, ساقتاندىرۋ بروكەرى قىزمەتىن كورسەتەتىن كومپانيا اشۋدى ۇيعاردىم. جۇمىسىمىز ءوز رەتىمەن جۇرسە دە, قيىندىق تۋىنداعان كەزەڭدەر دە بولىپ تۇردى. سەبەبى, بىزگە جۇمىسقا تۇرعىسى كەلگەن ادامداردىڭ بارلىعى دەرلىك اعىلشىن تىلىندە سويلەدى جانە ۇلكەن تالاپتار قويدى. ولارعا ەڭ الدىمەن وزدەرىن جۇمىستا كورسەتىپ, كومپانياعا پايداسىن تيگىزىپ, سودان كەيىن بارىپ كارەرالىق باسقىشىن قۇراۋعا بولاتىنىن ءتۇسىندىرىپ وتىرۋعا تۋرا كەلدى».
وسىلايشا, س.تاۋەكەلوۆا جاڭا كاسىبىن بىلىكتى قىزمەتكەرلەرمەن جاساقتاپ, ۇلكەن ۇجىم قۇرادى. ەڭبەكقورلىعى سونشا, ولار تۇسكى اسقا دا بارماي, جۇمىس ىستەيدى. باسشىلىقتىڭ قولداۋىمەن قىزمەتكەرلەر الىس-جاقىن شەتەلدەرگە ءىس-ساپارلارعا شىعىپ, ءوز جۇمىستارىنا قۇلشىنىس تانىتادى. «قازىر ءبىز كاۆكاز سىرتىندا ءىرى بيزنەس اشپاقپىز. تبيليسي مەن ەرەۆاندا ءوز كەڭسەلەرىمىز بار. جالپىلاي ايتقاندا, ۇيىمداسا جۇمىس جاساپ كەلەمىز», – دەيدى قانداسىمىز.
سايدانىڭ ارمان-ماقساتى كوپ-اق. ول قازاقستان مەن گرۋزيا اراسىنداعى ارىپتەستىكتى ءتۇرلى سالادا دامىتا تۇسكىسى كەلىپ, جاڭا جوبانى قولعا الىپتى. قيالىنا قانات بايلاعان وتانداسىمىز, الدىمەن الماتى مەن استانا قالالارىندا گرۋزين سۋرەتشىلەرى مەراب گوگيلادزە مەن يرما كۋسيانيدىڭ تۋىندىلارىنان كورمە ۇيىمداستىردى. مۇنداعى تىڭ تۋىندى, بۇرىن كورسەتىلمەگەن سۋرەتتەر, شىنايىلىعى باسىم كەشتەر قوس قالانىڭ تۇرعىندارىن تامساندىردى. وسىنىڭ ناتيجەسىندە جاس گرۋزين ديزاينەرلەرى ونەر اكادەمياسى تۇلەكتەرىمەن ىنتىماقتاستىق كەلىسىمىنە قول جەتكىزىپ, قازاقستانعا ايگىلى ەمزار بازەراشۆيلي, سالومە ريگۆاۆا, گەورگي رۋحادزە, داتو كۆانتالياني جانە زۋراب جانياشۆيلي سەكىلدى ونەر يەلەرىنىڭ جاڭا كوللەكتسيالارى اكەلىنگەن. «مەنىڭ گرۋزياداعى قوعامدىق ءومىرىم قاربالاسقا تولى. مەن مۇندا ىسكەر ايەلدەر اسسوتسياتسياسىنىڭ مۇشەسىمىن. جۇمىس بارىسىندا تەك تمد ەلدەرى عانا ەمەس, بۇكىل الەم كومپانيالارىمەن كەزدەسەمىن. ەندىگى كەزەكتە قازاقستاننان ارت-جوبا جاساۋدى قولعا الامىن», – دەيدى ول.
ءسوز سوڭىندا س.تاۋەكەلوۆا قازاق دالاسىن, تۋعان ولكەسىن جاقسى كورەتىنىن, ساعىناتىنىن ايتتى. «قاشاندا قازاقستان مەنىڭ جۇرەگىمدە», – دەيدى قانداسىمىز.
تالعات رايىمبەك,
«ەگەمەن قازاقستان»