ۇشقىشى جوق ۇشاق

ورال قالاسىندا ۇشقىشسىز باسقارىلاتىن اپپاراتتار ءوندىرىسى قولعا الىنىپ وتىر. بۇل ايرىقشا جوبانى «بەسپيلوتنايا تەحنولوگيا كازاحستانا» جشس كومپانياسىنىڭ ينجەنەر-كونسترۋكتورلارى جاسادى. اتالعان يننوۆاتسيالىق جوبا ۇشقىشسىز باسقارىلاتىن اۆتوماتتى جۇيەنىڭ كومەگىنە ارقا سۇيەيدى. مامانداردىڭ ايتۋىنشا, مۇنداي اپپاراتتاردى ەلىمىزدىڭ اۋىل شارۋاشىلىعىندا, توتەنشە جاعدايلار مەن شەكارا كۇزەتىندە جانە وزگە دە سالالاردا كەڭىنەن قولدانۋعا بولادى. «بەسپيلوتنايا تەحنولوگيا كازاحستانا» جشس  باسشىسى اباي رىسقاليەۆ: «باقىلاۋ جانە بارلاۋ جۇ­مىستارى مەن تابيعي اپاتتان زارداپ شەككەندەردى قۇت­قارۋدا, ءورتتى ءوشىرۋ مەن شەكارا قىزمەتىندە ۇشقىشى جوق ۇشاقتار تاپتىرمايتىن كومەكشى بولماق, – دەيدى. – سال­­­ماعى ءارى كەتكەندە 25 كيلوگرامنان اسپايدى. شاعىن كو­لەمدىلەرى قولدان ۇشىرىلسا, سالماقتىلارى ارنايى قوندىرعىنىڭ كومەگىمەن كوككە كوتەرىلەدى. ونىڭ اۆتونومدى رەجىمدەگى ۇشۋ قاشىقتىعى 1 مىڭ شاقىرىمدى, بيىكتىككە سامعاۋى 5 مىڭ مەتردى قۇرايدى». مۇنداي اپپاراتتاردىڭ باعاسى كولەمى مەن ماقساتىنا قاراي ءارتۇرلى. ايتالىق, ەڭ شاعىن دەگەن اپپاراتتىڭ قۇنى 10-12 ميلليون تەڭگە. بۇل, اسىرەسە, توپىراقتىڭ ەروزياسىنا مونيتورينگ جاساۋعا وتە ىڭعايلى. ونىڭ مينەرالدىق تىڭايتقىشتار سەبۋ جۇمىستارىنا دا تيگىزەتىن پايداسى وتە مول. ۇشقىشى جوق اپپاراتتار قولايسىز اۋا رايى جاعدايىندا, ءتىپتى, تۇمان كەزىندە, جاڭبىر مەن قار جاۋىپ, بوران سوعىپ تۇرعان ساتتەردە دە «مي-8» تىكۇشاعى ۇشا المايتىن, جەلدىڭ ەكپىنى سەكۋندىنا 20 مەتر بولعان جاعدايدا دا قالىپتى جۇمىس ىستەي بەرەتىنى ونىڭ باستى ەرەكشەلىگى ءارى ارتىقشىلىعى. بۇگىندە جوعارىدا اتالعان كومپانيا جەتەكشىلەرى رەسەيدىڭ ماسكەۋ وبلىسىنداعى ەگەرەۆكا ازاماتتىق كوللەدجىمەن ۇشقىشسىز اپپاراتتار وپەراتورلىعىنا قازاقستاندىق جاستاردى وقىتۋ جونىندە ءتيىستى كەلىسىمشارت جاساپ ۇلگەرگەن. ولاردىڭ ورال قالاسىنداعى «الگوريتم» تەحنوپاركى جشس-مەن بىرلەسىپ جۇزەگە اسىرعالى وتىرعان ءىس-شارالار كەشەنى ءوز الدىنا ءبىر بولەك اڭگىمە. ياعني, «بەسپيلوتنايا تەحنولوگيا كازاحستانا» جشس ۇجىمى ينجەنەر-كونسترۋكتورلارىنىڭ ۇشقىشسىز تەحنيكا قۇرالدارىن وندىرىسكە ەنگىزۋ جونىندەگى جوباسىنا تمد اۋقىمىندا ەشقانداي بالاما جوق. اتالعان يننوۆاتسيالىق ءوندىرىس تەحنوپارك عيماراتىنداعى ارنايى الاڭدا جولعا قويىلماق. بۇعان تەحنوپارك جانىنداعى يننوۆاتسيالاردىڭ ايماقتىق ءوفيسى قاجەتتى قولداۋ كورسەتۋدى كوزدەپ وتىر. تەمىر قۇسايىن, «ەگەمەن قازاقستان» ورال