پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى اسقار مىرزاحمەتوۆ تالدىقورعاندا اۋىل شارۋاشىلىعى سالاسى قىزمەتكەرلەرىمەن, جەرگىلىكتى اتقارۋشى ورگاندار جانە بارلىق دەڭگەيدەگى قوعامدىق ۇيىمدار وكىلدەرىمەن كەزدەسىپ, ەسەپ بەردى. سونىمەن قاتار, وبلىستىق اكىمدىكتىڭ ءماجىلىس زالىنداعى 350 ادامنان تىس رەسپۋبليكا بويىنشا 1700-دەن استام ادام بەينەبايلانىستا بولدى.
«ەسەپ بەرۋ كەزدەسۋىمدى الماتى وبلىسىنان باستاۋىم كەزدەيسوق ەمەس. الماتى وبلىسى – ەلىمىزدىڭ بارلىق اۋىل شارۋاشىلىعى باعىتى قامتىلعان ءىرى اگرارلىق ءوڭىر. مۇنىڭ دالەلى – رەسپۋبليكامىزدا وندىرىلەتىن اۋىل شارۋاشىلىعى ءونىمىنىڭ 16,7 پايىزى جەتىسۋلىقتار ۇلەسىندە. بۇل ەلىمىزدەگى جوعارى كورسەتكىشتەردىڭ ءبىرى بولىپ سانالادى» دەپ باستاعان ءسوزىن ۆيتسە-پرەمەر ودان ءارى بىلاي ساباقتادى.
«ەلىمىزدە اۋىل شارۋاشىلىعى ءونىمىنىڭ كولەمى 2015 جىلى ونىڭ الدىنداعى جىلمەن سالىستىرعاندا 3,4 پايىزعا ارتىپ, 3,3 ترلن. تەڭگەنى قۇرادى. ونىڭ ىشىندە مال باسى جىل سايىن ورتاشا ەسەپپەن 3 پايىزعا ءوسىپ وتىردى. تاماق ونىمدەرىن ءوندىرۋ كولەمى وتكەن جىلى 1,0 ترلن. تەڭگەدەن استى. سالا بويىنشا نەگىزگى كاپيتالعا تارتىلعان ينۆەستيتسيا 28 پايىزعا ارتىپ, 56 ملرد. تەڭگەنى قۇرادى. بۇل رەتتە, ەڭ ۇلكەن ۇلەس وڭتۇستىك قازاقستان وبلىسىندا 28 پايىزدى, الماتى وبلىسىندا – 12 پايىزدى, قوستاناي وبلىسىندا 9 پايىزدى قۇرادى. جالپى اۋىل شارۋاشىلىعىنا قۇيىلعان ينۆەستيتسيالار كولەمى 167 ملرد. تەڭگەگە جەتتى. وسى ورايدا اتاپ وتۋگە تۇرارلىق جاعداي, تارتىلعان ينۆەستيتسيالاردىڭ 80 پايىزى – تاۋار وندىرۋشىلەردىڭ ءوز قاراجاتى. بۇل كورسەتكىش 2015 جىلى 138 ملرد. تەڭگەگە جەتتى. ءسويتىپ, اگرارلىق سەكتور بيزنەس ءۇشىن جىل وتكەن سايىن تارتىمدى بولىپ كەلەدى.
سونداي-اق, بىلتىرعى جىلى 13,7 ملن. توننا بيداي, 2,7 ملن. توننا ارپا جانە باسقا داقىلدار جينالدى. 174 مىڭ توننا قانت قىزىلشاسى ءوندىرىلدى. بۇل الدىڭعى جىلمەن سالىستىرعاندا 7 ەسە ارتىق. ارينە, ءتاتتى ءتۇبىر وسىرۋدە جەتىسۋ ءوڭىرىنىڭ ۇلەسى زور. مەملەكەت باسشىسىنىڭ تاپسىرماسى بويىنشا وسىمدىك شارۋاشىلىعىن ءارتاراپتاندىرۋ ماقساتىندا بيداي القاپتارى قىسقارتىلىپ, مال ازىعى جانە ەكسپورتقا باعىتتالعان داقىلدار الاڭى كەڭەيتىلۋدە. جەكەلەگەن تاۋارلار بويىنشا ىشكى تۇتىنىمداعى وتاندىق ءوندىرىس ۇلەسى ءالى دە تومەن دەڭگەيدە قالىپ وتىر. «اگروبيزنەس-2020» باعدارلاماسىن ىسكە اسىرۋدىڭ ءبىرىنشى باعىتى «قارجىلىق ساۋىقتىرۋ» بويىنشا بەرەشەك سوماسى 520,0 ملرد. تەڭگەنى قۇرايتىن 404 سۋبەكتىنىڭ وتىنىمدەرى ماقۇلدانعان. ستاتيستيكالىق دەرەكتەر بويىنشا رەسپۋبليكاداعى سۋارمالى ەگىستىك الاڭى 1,6 ملن. گەكتاردى قۇراپ, وسىمدىك شارۋاشىلىعى جالپى ءونىمىنىڭ 7 پايىزدان استامىن قامتاماسىز ەتتى. سۋ شارۋاشىلىعى نىساندارىن جوندەۋگە ينۆەستيتسيالاردىڭ تاپشىلىعى, سۋعا قويىلعان تاريفتەردىڭ تومەندىگىنە بايلانىستى فەرمەرلەردىڭ سۋدى ۇنەمدەۋگە دەگەن ىنتاسىنىڭ بولماۋى, سونداي-اق, سۋارمالى جەرلەردىڭ جاي-كۇيىنە جەتكىلىكتى دەڭگەيدە باقىلاۋدىڭ بولماۋى نەگىزگى سەبەبى بولىپ تابىلادى» دەپ ەسەپتى بايانداماسىن اياقتاعان سوڭ اسقار مىرزاحمەتوۆ سۇراقتارعا جاۋاپ بەردى.
الماتى وبلىسى, الاكول اۋدانىنىڭ فەرمەرلەرى, ولاردىڭ اقمولا, وڭتۇستىك قازاقستان جانە تاعى باسقا وڭىرلەردەگى ارىپتەستەرى اۋىل شارۋاشىلىعى داقىلدارىن وسىرۋگە قاجەتتى سۋبسيديا ءبولۋ ماسەلەسىن كوتەردى. وسى ماسەلەگە وراي بەرگەن جاۋابىندا ا.مىرزاحمەتوۆ اعىمداعى جىلى اۋىل شارۋاشىلىعى مينيسترلىگىندە 36 ملرد. تەڭگە كولەمىندە شارۋالارعا سۋبسيديا ءبولۋ ماسەلەسى قارالىپ جاتقانىن ايتتى. سونىمەن قاتار, جانار-جاعار مايمەن قامتۋ ماسەلەسى تۋرالى دا ناقتى جاۋاپ بەردى.
نۇربول الدىباەۆ,
«ەگەمەن قازاقستان»
تالدىقورعان