قولا وزىمىزدە قالدى

شورت-ترەك ازيا ويىندارىنىڭ ىشىندەگى اسا قىزىقتىلارىنىڭ ءبىرى – شورت-ترەك. جىلدامدىقپەن قوسا مۇز ايدىنىنداعى اينالمالى دو­عا­لاردى دۇرىس ءارى ءتيىمدى اي­نا­لۋدى تالاپ ەتەتىن قىسقى سپورت ويىندارىنىڭ بۇل ءتۇرى استانا­داعى رەسپۋبليكالىق ۆەلوترەكتە 31 قاڭتار كۇنى باستالعان بولا­تىن. ءۇش كۇنگە سوزىلعان قىزۋ دودا 2 اقپاندا ءوز مارەسىنە جەتتى. شورت-ترەك ويىنىندا قازاق­ستاننىڭ اتىنان نۇربەرگەن جۇ­ما­عازيەۆ, ايدار بەكجانوۆ, ارتۋر سۇلتانعاليەۆ, داريا ۆولوكيتينا, يننا سيمونوۆا سىندى سپورتشىلار باقتارىن سىنادى. جارىستىڭ العاشقى كۇنى 1500 مەترلىك قاشىقتىققا ەرلەر مەن ايەلدەردىڭ جۇگىرىسىنە ارنال­دى. وڭتۇستىك كورەيانىڭ شورت-ترەك­شىلەرى بۇل قاشىقتىقتا ءبارى­نەن دە وزا شاۋىپ, ءبىرىنشى جانە ەكىنشى ورىنداردان قاتار كورىندى. ەرلەر اراسىندا 2 ءمينوت 18,998 سەكونتتە سىرعاناپ شىققان وڭ­تۇس­تىككورەيا­لىق نو دجينكيۋ ال­تىن مەدالدى يەلەنسە, كۇمىس مەدال تا­عى دا ونىڭ وتانداسى ۋم چحىن­حوعا, ال قولا مەدال قىتاي­لىق سپورتشى ليۋ سيانۆەيعا بۇ­يىردى. ايەلدەر اراسىنداعى 1500 مەتر قاشىق­تىقتا التىن جانە كۇمىس جۇلدەنى وڭتۇستىك كورەيا وكىلدەرى چو حا ري مەن پاك سىنحي يەلەنسە, قولا مەدالدى ساكۋراي بيبا (جاپونيا) ولجالادى. شىنىن ايتۋ كەرەك, وسىعان دەيىن بىزگە العا ۇمتىلىپ شىعۋعا ءبىر نارسە جەتىسپەي-اق تۇراتىن. جارىستىڭ ەكىنشى كۇنى ءتاجىري­بەدەگى شيكىلىكتەر انىق كورىنە باستادى. بۇل كۇنى 500 مەترلىك قاشىقتىقتا ەرلەر مەن ايەلدەر ءوزارا سىنعا ءتۇستى. ويىننىڭ سو­ڭى­­نا دەيىن ءبىزدىڭ سپورتشى­لارى­مىز جۇلدەلى ورىنداردان ءۇمىت­تەرىن ۇزبەدى. مۇنىڭ ءبارىن ولار­دىڭ جەڭىسكە دەگەن كۇش-ءجى­گەر­لەرىنەن, مۇز ايدىنىنا شىق­قان­عا دەيىن جاساعان جاتتى­عۋ­لارىنان دا كورۋگە بولادى. ءوز­دەرى جاس بولسا دا جىگەرلى ءارى رۋح­تى سەزىمدەرى ولاردى ۇنەمى جە­ڭىسكە جەتە­لەۋ­مەن بولدى. شورت-ترەكتىڭ ەڭ سوڭ­عى كۇنىندە 1000 مەترلىك ەرلەر مەن ايەلدەردىڭ دودالارى, 3000 مەترلىك ايەلدەر ەستافەتاسى, 5000 مەترلىك ەرلەر ەس­تافەتاسى وتكى­زىلدى. ءبىر قۋا­نىش­تىسى, جارىس­تىڭ ءۇشىن­شى كۇنى قازاق سپورت­شىلارى ءۇشىن اسا ءساتتى بولدى دەۋگە بولادى. ءويت­كەنى, بۇل كۇنى ولار بۇرىن-سوڭدى جەتپەگەن جەتىستىككە جەتتى. 5000 مەترلىك ەرلەر ەستافەتا­سىندا ۋاقىت پەن جىلدامدىق جا­عىنان قىتايلاردى باسىپ وزعان ولار قولا مەدالعا يە بولدى. التىن مەدال كورەياعا بەرىلسە, كۇمىس جۇلدەنى جاپونيا ەنشىلەدى. ايەلدەر اراسىنداعى 3000 مەتر­لىك ەستافەتا دا ءساتتى ءوتتى. بۇل جەردە دە ءبىزدىڭ ارۋلار وزدەرىنىڭ شاپشاڭدىقتارىمەن جاپونيانى باسىپ وزىپ, ءۇشىنشى ورىندى يەلەندى. ءبىرىنشى ورىن قىتايعا, ەكىن­شى ورىن كورەياعا تيەسىلى بولدى. 1000 مەترلىك ەرلەر مەن ايەلدەر اراسىنداعى جارىستا ولجالى بولا المادىق. قىتاي, كورەيا مەن جاپو­نيا­نىڭ سپورتشىلارى سىرعاناۋ تەحنيكاسى جاعىنان شىنىمەن دە بىزدەن باسىمداۋ ەكەندىكتەرىن كور­سەتتى. قارسىلاستارىنىڭ الدارىنا شىعا بىلگەن نۇربەرگەن جۇما­عاليەۆ پەن ارتۋر سۇلتانعاليەۆتى, ايدار بەكجانوۆ پەن يننا سي­مونوۆانى قارسىلاستارى ۇزاتپاي باسىپ وزىپ كەتتى. اراي ۇيرەنىشبەكقىزى.

جاتتىعۋدان – جەڭىسكە

شورت-ترەكتەن جاپونيانىڭ باس باپكەرى يۋكا كامينامەن اڭگىمە.

– يۋكا كامينا, مۇز ايدى­نىنداعى جەلاياقتار جارى­سىنىڭ الەم چەمپيوناتى وسى­دان ءدال وتىز جىل بۇرىن وتكەن ەكەن. سىزدىڭشە, وسى ۋاقىت ارا­لىعىندا شورت-ترەك جارىسى­نىڭ دامۋ دەڭگەيى قانداي؟ – ءاربىر ءىستىڭ باستالۋى ءۇشىن ءبىراز ۋاقىت كەتىپ قالادى. سول چەمپيوناتقا 30 جىل تولسا, مەن دە وسى جىلى 30 جاسقا كەلىپ وتىر­مىن. العاشقى چەمپيونات كەزىندە ءسابي بولعانىممەن, كۇنى بۇگىنگە دەيىن, بۇل سالانى تەرەڭ مەڭگەرۋمەن كەلەمىن. 1988 جىلى كانادانىڭ كالگاري قالاسىندا وتكەن XV قىسقى وليمپيا ويىن­دارىندا شورت-ترەك كورسەتىلىم ويىن رەتىندە عانا ءوتتى. ول 1992 جىلى فران­تسيانىڭ البەرۆيل قالاسىندا ءوت­كەن قىسقى وليمپيادا باعدار­لا­ماسىنا ەنگىزىلدى. ال كانادانىڭ ۆانكۋۆەر قالا­سىن­دا وتكەن وليمپيا ويىن­دارىن­دا شورت-ترەكتەن 8 مەدال توپتا­ماسى ءۇشىن ەرلەر مەن ايەلدەر ارا­سىن­دا 500, 1000, 1 500 مەتر قاشىق­تىق­­تاعى جارىستار ءوتتى. وسىنداي ماز­مۇنى تەرەڭ, ءىرى جيىنداردىڭ ءبىرى ەندى مىنە, سىزدەردىڭ ەلدەرىڭىزدە ءوتىپ جاتىر. – شەتەلدىك باپكەر رەتىندە وسى ازياداداعى شورت-ترەك جا­رىسىنىڭ ءوتۋ دەڭگەيىن قالاي باعالايسىز؟ – بارلىعى دا ءوز دەڭگەيىندە وتۋدە. جارىستىڭ ويداعىداي ءوتۋى­نە بارىنشا جاعداي جاسالعان. ەرەكشە اتاپ وتەتىنىم, ستاديون­نىڭ حالىقارالىق تالاپقا ساي سا­ل­ىنعاندىعى. كەز كەلگەن سپورتشى ءۇشىن ونىڭ ونەر كورسەتەتىن ورنى ەرەكشە قىزمەت اتقاراتىنى بەلگىلى. مۇنداي جاڭا عيماراتتا ال­عاشقىلاردىڭ ءبىرى بوپ, ونەر كورسەتۋ – بىزگە كورسەتىلىپ جاتقان قۇرمەتتىڭ ءبىر ەلەمەنتى ىسپەتتەس. سپورتشىلارىم دا ءدان ريزا. كوزقاراسىم ءتۇزۋ, باعام وڭ. – ازيا ەلدەرى اراسىندا مۇز ايدىنىنداعى سپورتتىق جا­رىس­تاردا جاپوندىق سپورت­شى­لاردىڭ ءباسى باسىم. بۇنىڭ سىرى نەدە؟ – شورت-ترەك جارىسىن جاقسى مەڭگەرۋ ءۇشىن ەڭ باستىسى – شاپ­شاڭ­دىق كەرەك. ول – قىسقا قاشىق­تىقتا جىل­دام سىرعانايتىن كون­كي تەبۋ سپورتىنىڭ ءبىر ءتۇرى. سپورتشى­لار بۇل ويىندا ۇزاق قاشىقتىقتا ەمەس, كە­رىسىنشە, قىس­قا قاشىقتىقتا ەل­ليپس ءتارىز­دەس مۇز ايدىنىنداعى دوڭگە­لەكتى مۇز­جو­لاق­تا جىلدام سىر­عاناپ جا­رى­­سادى. ءبىز ءاردايىم جات­تىعۋ ءۇس­تىن­دەمىز. كۇندەلىكتى جاتتى­عۋ­دىڭ وزىنە ۇزاق ۋاقىت جۇمسايمىز. مە­رەيى­مىز­دىڭ ۇستەم بولۋىنىڭ قۇ­پيا­سى دا, ءبال­كىم, وسىندا بولار. ءما­سەلەن, ءبىز­دىڭ سپورتشىلار وسىن­دا كەلگەلى بەر­گى بار ۋاقىتىن تەك جات­تىعۋعا ارناۋدا. قاجەت دەسەڭىز, اسەم اس­تانانىڭ دەمالىس ورىن­دا­رىن تا­ما­شالاۋعا ۋاقىت تابا الماي كەلەمىز. ال, تاماق­تاناتىن اسىمىز سۋشي. ودان وزگە ەشقانداي دا قۇپيا جوق. اڭگىمەلەسكەن جۇلدىز ءبايدىلدا.