قاڭتار ايىندا ەلورداداعى №2 بالالار مۋزىكا مەكتەبىنىڭ «جىگەر» ۇلت اسپاپتار ءانسامبلى «GRAN FIESTA -2011» بايقاۋىنا قاتىسۋ ءۇشىن يسپانياعا اتتانعان بولاتىن. جۋىردا ءانسامبلدىڭ كوركەمدىك جەتەكشىسى مەيرام وماروۆ رەداكتسيامىزعا اتباسىن بارىپ, ول ەلدەن جاقسى جەتىستىكپەن ورالعاندارىن ءاڭگىمەلەپ بەردى. «GRAN FIESTA – ەۋروپالىق دەڭگەيدەگى كوپجانرلىق بايقاۋ. وعان ءارتۇرلى مەملەكەتتەردەن كەلگەن ونەرلى بالالار قاتىسا الادى. ال, ۇيىمداستىرۋشىلار القاسى يسپاندىق Fiestalonia فەستيۆال كوميتەتى. بايقاۋ جىل سايىن بارسەلونانىڭ ماڭايىنداعى للورەت دە مار قالاسىندا وتەدى ەكەن. ءبىز بۇل ءمالىمەتتەردى ينتەرنەت ارقىلى بىلدىك. سوسىن قالايدا باعىمىزدى سىناپ كورۋگە تىرىسىپ, ۇيىمداستىرۋشىلارمەن العاشقىدا ينتەرنەت ارقىلى بايلانىسىپ وتىردىق. ولارعا انسامبلگە قاتىستى ءمالىمەتتەردى, سۋرەتتەرىمىزدى, سوسىن ۆيدەوروليكتەر جىبەردىك. ءسويتىپ, بايقاۋ شاقىرتۋ كەلدى. سودان تاۋەكەلگە باس تىگىپ اتتانىپ كەتتىك. جەتىستىگىمىز جامان ەمەس. 30 مەملەكەتتەن 100 ۇجىم قاتىسقان ءۇلكەن بايقاۋدا ەكىنشى ورىندى يەلەندىك», دەيدى مەيرام وماروۆ.
«يسپان كورەرمەندەرىنىڭ قۇرمانعازىنىڭ «بالبىراۋىن», ج.ەڭسەپوۆتىڭ «بالبۇلاق», ا.جەلدىباەۆتڭ «ەركە سىلقىم» كۇيلەرىن ورىندادىق. تىڭداپ, ودان ۇلكەن اسەر العانىن بايقادىق. وسىنداي اۋقىمى كەڭ, كوپجانرلى بايقاۋدا (ياعني ۆيولەنچەل, سكريپكا, حورەوگرافيا, ۆوكال, تريو ءبارى بار) ەكىنشى ورىن الۋ ۇلكەن جەتىستىك دەسەك, يسپانياعا بارىپ ونەر كورسەتىپ قايتقان جەتكىنشەكتەردىڭ اتىن ايتپاي كەتۋ جاراماس. ولار «جىگەردىڭ» قۇرامىندا ونەر كورسەتەتىن ديليارا ءدۇيەنوۆا, ابىلاي جۇسىپبەكوۆ, سۇلتان قابدىراحمانوۆ, جانسايا قايراتقىزى, ءامىر قاميدوللينوۆ, ايدار قاركەنوۆ, ءالىشەر ءماجيتوۆ, اداق تايجانوۆ, تەمىرلان تەمىرتاەۆ, مادينا توقمۋرزينا, ءسانيا حۋسەينوۆا سەكىلدى ونەرلى بالالار»-دەيدى كوركەمدىك جەتەكشى.
ايگۇل سەيىلوۆا.