استانا كۇنىنە وراي ەلوردادا وتاندىق تاۋار ءوندىرۋشىلەردىڭ العاشقى ساۋدا ءۇيى اشىلادى. بۇل تۋرالى كەشە ورتالىق كوممۋنيكاتسيالار قىزمەتىندە وتاندىق تاۋار وندىرۋشىلەردى قولداۋ تاقىرىبىندا وتكەن ءباسپاسوز ءماسليحاتىندا ايتىلدى. وعان قازاقستان ساۋدا كاسىپورىندارى قاۋىمداستىعىنىڭ ۆيتسە-پرەزيدەنتتەرى قايىرلى تاۋكەن جانە جىبەك اجىباەۆا قاتىستى.
استانا كۇنىندە ىسكە قوسىلاتىن ساۋدا ۇيىندە بارلىق تاۋارلار مەن قىزمەتتەر «قازاقستاندا جاسالعان» جانە «حالىق ماركاسى» حالىقتىق ساپا بەلگىلەرىمەن ۇسىنىلادى. «جوبا ماقساتى – ەلوردا نارىعىندا وتاندىق تاۋارلاردىڭ ۇلەسىن كوبەيتۋ, قازاقستاندىق ونىمدەردى ناسيحاتتاۋ, قازاقستان برەندتەرىنىڭ تانىمالدىلىعىن ارتتىرۋ», دەدى ق.تاۋكەن.
قازاقستان ساۋدا كاسىپورىندارى قاۋىمداستىعىنىڭ مالىمەتىنشە, ساۋدا ءۇيى اۋماعىندا ەلىمىزدىڭ 14 وبلىسى, الماتى مەن استانا قالالارىنىڭ 300-گە جۋىق فيرما مەن كومپانيالارى ءوز ونىمدەرىن قويادى. العاشقى كومپانيالار كەلىپ, ساۋدا الاڭدارىن قۇرا باستادى. جوباعا قاتىسۋعا نيەت تانىتقان وتاندىق وندىرۋشىلەر, جارنامالىق ماقساتتا «حالىق ماركاسى» بەلگىسىن ەكى جىلعا دەيىن تەگىن پايدالانا الادى.
باستى ارتىقشىلىق – بارلىق تاۋارعا بەكىتىلەتىن ۇستەمە باعا 3-7 پايىزدان اسپايدى. سەبەبى, باعانىڭ وسىمىنە اسەر ەتەتىن دەلدالدىق جۇيە بولمايدى. بۇل داعدارىس كەزەڭىندە ەل تۇرعىندارىنا, اسىرەسە, الەۋمەتتىك از قامتىلعان توپ وكىلدەرىنە ەلەۋلى قولداۋ بولماق.
قازاقستاندىق وندىرۋشىلەر وتاندىق جانە شەتەلدىك ديستريبيۋتەرلەرمەن تىكەلەي جۇمىس ىستەۋگە مۇمكىندىك الادى. ياعني, ەل ەكسپورتىن ارتتىرۋعا جاعداي جاسالادى. ساۋدا ءۇيى بولشەك جانە كوتەرمە ساۋدا-ساتتىق ورتالىعى عانا ەمەس, شەتەلدىك مەيماندارعا قازاقستاندىق نارىقتىڭ جەتىستىگىن پاش ەتەتىن الاڭعا اينالماق.
ساۋدا ۇيىندە وتاندىق كومپانيالار وزدەرىنىڭ جەكە ساتۋ بولىمدەرىن اشۋ مۇمكىندىگىنە يە بولادى. سونىڭ نەگىزىندە تاۋارلارىن جەتكىزۋگە قاتىستى كەلىسسوزدەر جۇرگىزىپ, ناقتى كەلىسىمدەرگە قول قوياتىن بولادى دەپ كۇتىلۋدە. ءار كومپانيا ءوز ستەندىن ازىرلەپ, ونىمدەرىن قويۋعا قاجەت اۋماققا قول جەتكىزە الادى. سونداي-اق, تاۋار وندىرۋشىلەر پرومو-اكتسيالار, جاڭا ونىمدەرىنىڭ تۇساۋكەسەر ءراسىمىن, ءتۇرلى جارنامالىق شارالاردى وتكىزە الادى.
ساۋدا ءۇيىنىڭ اۋماعى باستاپقى كەزەڭدە 5 000 شارشى مەتردى قۇرايى. وندا كەڭ دە ىڭعايلى ساۋدا پاۆيلوندارى, ستوك-ورتالىقتار, بيزنەس-ورتالىقتار, شوۋ-رۋمدار, زەرتحانالار, توڭازىتقىش كامەرالارى, قويمالار, تاۋارلاردى تۇسىرۋگە ىڭعايلى الاڭدار, جۇك ليفتىلەرى, ەكسكالاتورلار, تەلەفون مەن ينتەرنەت سەكىلدى بارلىق كوممۋنيكاتسيالار بولادى ەكەن. ساۋدا ءۇيى استانا ىرگەسىندە, سارىارقا اۋدانى, س 359 كوشەسى, №3 عيمارات مەكەنجايى بويىنشا ورنالاسقان.
دينارا بىتىكوۆا,
«ەگەمەن قازاقستان»