شارا ازيا ويىندارىنا ارنالدى. وتكەن سەنبىدە پەستروە كولى جاعالاۋىنا ءتورت مىڭنان استام ادام جينالىپ, سپورتتىڭ شايبالى حوككەي, كونكي, شاڭعى, ارقان تارتۋ, تاعى باسقا تۇرلەرى بويىنشا ءوزارا باسەكەگە ءتۇستى.
7-ءشى قىسقى ازيا ويىندارىنىڭ اشىلۋ قۇرمەتىنە ارنالعان شارادا وبلىس اكىمىنىڭ ورىنباسارى فارحاد قۋانعانوۆ, پەتروپاۆل قالاسىنىڭ اكىمى نۇرجان اشىمبەتوۆ سويلەپ, ەلىمىزدىڭ تاريحىندا زور وقيعا سانالاتىن جانە الەم كوز تىگىپ وتىرعان ازيادا باسەكەسىنىڭ ءمان-ماڭىزىن اتاپ كورسەتتى. اتقارۋشى ورگاندار مەن ءتۇرلى ۆەدوموستۆولاردان, جوعارى, ارناۋلى, جالپى ءبىلىم بەرەتىن وقۋ ورىندارىنان قاتىسقان 40-تان استام كوماندانىڭ وكىلدەرى سپورتتىڭ بۇقارالىعىن كوتەرۋگە بەلسەنە اتسالىسىپ, ناعىز سپورتشىلارعا ءتان ءىس-ارەكەتتەرىمەن كوزگە ءتۇستى.
ءومىر ەسقالي. سولتۇستىك قازاقستان وبلىسى.
مۇددەلەس ارىپتەستەرمەن ىنتىماقتاستىق. ءوندىرىس, عىلىم سالالارىنان جانە ىسكەر توپتار وكىلدەرىنەن قۇرالعان وبلىس دەلەگاتسياسى سينگاپۋر, مالايزيا مەملەكەتتەرىندە بولىپ قايتتى. ونى ايماق باسشىسى سەرىك احمەتوۆ باستاپ باردى. قاراعاندىلىقتار مۇددەلەس ارىپتەستەرمەن كەزدەسۋلەر وتكىزىپ, ونەركاسىپتىك تەحنولوگيالار ترانسفەرتى مەن ينۆەستيتسيالار تارتۋ ماقساتىندا الدىڭعى قاتارلى كاسىپورىندار جۇمىسىمەن تانىستى. ساپار بارىسىندا وبلىس اكىمى مەن «دارت ەنەردجي» كومپانياسىنىڭ باسشىلىعى اراسىندا ءوزارا ىنتىماقتاستىق جونىندەگى مەموراندۋمعا قول قويىلدى. سينگاپۋردا ورنالاسقان بۇل كومپانيا ونەركاسىپتىك گاز ءوندىرۋ سالاسىندا الەمدىك كوشباسشى سانالادى. ال مالايزيادا تۇرعىنداردى سۋمەن قامتاماسىز ەتۋمەن شۇعىلداناتىن «Ranھill» كومپانياسىنىڭ تاجىريبەسىنە نازار اۋدارىلدى.
ايقىن نەسىپباي. قاراعاندى.
مەملەكەتتىك ءتىل مارتەبەسىن كوتەرۋ ءۇشىن. وبلىستىق تىلدەردى دامىتۋ جونىندەگى باسقارما «مەملەكەتتىك ءتىل جانە بۇقارالىق اقپارات قۇرالدارى» وبلىستىق كونكۋرسىن جاريالاپ, قوعامدىق ومىردە انا ءتىلىمىزدىڭ ماڭىزى مەن ساپاسىن جاقسارتۋدى العا قويدى. بايقاۋ «ۇزدىك باسىلىم», «ۇزدىك تەلەارنا», «ۇزدىك سايت» نوميناتسيالارى بويىنشا ءوتىپ, قورىتىندىسى مامىر ايىنىڭ اياعىندا شىعارىلماقشى. جىل سايىن بايقاۋ ءوز جەڭىمپازدارىن انىقتاپ, وندا جۋرناليستەردىڭ ءتىلدىڭ قازىرگى احۋالىنا بايلانىستى وتكىر سىن, ساراپتامالىق تالداۋعا قۇرىلعان ماقالالارى كوپتەپ جارىق كورىپ كەلەدى. بيىل دا بۇل ءۇردىس جالعاساتىنى كونكۋرس شارتتارىندا انىق كورسەتىلسە, ارىپتەستەر وعان كىرىسىپ تە كەتتى.
كۇمىسجان بايجان. الماتى وبلىسى.
جاڭا اكىم اقساقالدارمەن كەزدەستى. قالانىڭ جاڭا اكىمى ايبەك كارىموۆ بيىلعى قىستىڭ قىسىپ تۇرعان قاربالاس شاعىنا قاراماستان ەلمەن كەزدەسىپ, پىكىرلەسۋگە ۋاقىت تابا بىلۋدە. جۋىردا ول ارداگەر اقساقالدارمەن كەزدەسىپ, كەڭىنەن پىكىرلەستى. جىلى ءجۇزدى جۇزدەسۋدە جىلۋ ماسەلەسى دە, قالا بولاشاعى دا, جاستار تاربيەسى دە جان-جاقتى قوزعالدى. قارتتار قاتتى ايازدا قاتىپ قالعان ۇيلەردى تەزدەتىپ قاتارعا قوسقان جاڭا اكىمگە ءوز العىستارىن بىلدىرە وتىرىپ, اق باتالارىن بەردى. ەندى ەلدىڭ سول سەنىمىنەن شىعۋ جاڭا اكىم ءۇشىن سەرتپەن تەڭ دەپ بىلەمىز. ويتكەنى, بۇل جاقتا كوكتەمگە دەيىن ءالى ەرتە.
داۋلەت سەيسەن ۇلى. سەمەي.
وزەندەردىڭ وزەكتى ماسەلەسى قارالدى. «نۇر وتان» حدپ اقتوبە وبلىستىق فيليالى «باتىسەكوجوبا» عزي» جشس-مەن بىرلەسە وتىرىپ, «اقتوبە وبلىسىنداعى وزەندەردىڭ ەكولوگيالىق جاعدايى جانە ەكولوگيالىق قالىپتىلىعىن ساقتاۋدىڭ پەرسپەكتيۆالارى» دەگەن تاقىرىپتا ايماقتىق عىلىمي-تاجىريبەلىك كونفەرەنتسيا وتكىزدى. قازىر وبلىستاعى وننان استام وزەننىڭ باسسەينى مۇناي, قارا جانە ءتۇستى مەتالل وندىرەتىن كاسىپورىنداردان شىققان قالدىقتارمەن لاستانعان. كونفەرەنتسيادا بايانداما جاساعاندار مەن باسقا شىعىپ سويلەۋشىلەردىڭ سوزدەرىندە جەم, ەلەك, ويىل جانە ساعىز وزەندەرىنىڭ پروبلەمالارى تەرەڭىرەك تاراتىلىپ, ولاردىڭ ەكولوگيالىق جاعدايىن جاقسارتۋ بويىنشا ۇسىنىستار قابىلداندى.
ساتىبالدى ءساۋىرباي. اقتوبە وبلىسى.
ناسيحاتتاۋ جولىنداعى بەلسەندىلىك. بۋراباي اۋدانىنداعى قارابۇلاق نەگىزگى مەكتەبىندە ەلباسى نۇرسۇلتان نازارباەۆتىڭ قازاقستان حالقىنا ارناعان بيىلعى جولداۋىن ناسيحاتتاۋ شارالارى بەلسەندىلىكپەن ءجۇرىپ جاتىر. سونىڭ ءبىرى رەتىندە «انا ءتىلى – جۇرەك ءۇنى» اپتالىعىن ايتۋعا بولادى. تالىمدىك شارانىڭ العاشقى كۇنى «بولاشاقتى بىرگە جاسايمىز» اتتى ينتەللەكتۋالدى ۇنقاتىسۋ الاڭىمەن باستالىپ, جولداۋ العا تارتقان مىندەتتەر مەن ونىڭ رۋحاني قۋاتى اشىپ كورسەتىلدى. «سوزمەرگەن» سايىسىندا ايدانا تيىشتىباەۆا ونەگە كورسەتسە, 5 سىنىپ وقۋشىسى زارينا راحىموۆانىڭ شىعارماسى ۇزدىك دەپ تانىلدى. سونداي-اق, ء«بىلىم – تەڭىز», ء«بىر اۋەن اياسىندا». «قايىم ايتىس» باسەكەسى دە بولاشاقتىڭ تۋىن كوتەرىپ تۇرعانداي اسەر قالدىردى.
باقبەرگەن امالبەك. اقمولا وبلىسى.
جەرگىلىكتى سۋرەتشىنىڭ جەكە كورمەسى. ء«ومىر, ويلار, سەزىم» دەپ اتالاتىن كورمە بەلگىلى قوستانايلىق سۋرەتشى گەورگي سوكوۆتىڭ 70 جاسقا تولۋىنا ارنالدى. ونىڭ شىعارمالارى قالا ورتالىعىنداعى كوركەمسۋرەت گالەرەياسىنىڭ تۇتاس ەكى قاباتىنداعى زالدى الىپ تۇردى. سۋرەتشى بۇل جەكە كورمەسىنە وسى ۋاقىتقا دەيىن جازعان ەڭ تاڭداۋلى 93 كارتيناسىن قويىپتى. گەورگي ءميحايلوۆيچتىڭ ەڭبەكتەرى كورەرمەنىن ويعا جەتەلەيتىن تەرەڭ فيلوسوفيالىق مازمۇنىمەن ەرەكشەلەنەدى. ونىڭ «ەسكى قوستاناي», «ساق اۋەندەرى», «كوكپار» اتتى شىعارمالارى سونىڭ كۋاسى. تالانت يەسى تەك ءبىر جانردا عانا جۇمىس ىستەمەيدى. ونىڭ گرافيكالىق تۋىندىلارى دا كەڭىنەن تانىس. سونىمەن قاتار, سۋرەتشى كىتاپ بەزەندىرۋگە دە بەلسەنە قاتىسقان. ونىڭ ەڭبەكتەرى «قازاقستاننىڭ مونۋمەنتالدىق ونەرى» اتتى البومعا دا كىرگەن.
ءنازيرا جارىمبەتوۆا. قوستاناي.