حالىقارالىق كۇنتىزبەدەگى اتاۋلى كۇندەردىڭ قاتارىنا قازاقستاندىق سپورتشىلار مەن قازاقستان سپورت جۋرناليستەرى قاۋىمداستىعى ەلىمىزدە ويلاپ تابىلعان «دۇنيەجۇزىلىك شىرىن كۇنى» اتتى مەرەكەنى قوسپاق.
وتكەن جىلدىڭ قاراشا ايىنان باستاپ www.worldjuiceday.kz ينتەرنەت-سايتىندا الەم كۇنتىزبەسىندە «دۇنيەجۇزىلىك شىرىن كۇنى» دەپ اتالاتىن جاڭا مەرەكەنىڭ پايدا بولۋى ءۇشىن ونلاين-داۋىس بەرۋ جۇرگىزىلۋدە. سايتقا كىرگەن ءار ادام «قولدايمىن» پەرنەسىن باسۋ ارقىلى وسى كۇننىڭ پايدا بولۋىنا قاتىستى ءوزىنىڭ كەلىسىمىن راستاي الادى.
ەندىگى جەردە وسى كۇندى قولداۋعا قاتىستى نەعۇرلىم كوپ داۋىس جينالسا, اتالعان مەرەكەنىڭ رەسمي تۇردە پايدا بولۋىنىڭ ىقتيمالدىلىعى سوعۇرلىم ارتا تۇسپەك.
بۇل باستاماعا «قازاقستاندىقتاردى شىرىنمەن ساۋىقتىرۋ» قوعامدىق قوزعالىسى ۇيىتقى بولىپ وتىر. اتالمىش قوزعالىس – شىرىننىڭ پايداسى جونىندەگى بارلىق مالىمەتتى, سونداي-اق, سپورتشىلار, دارىگەرلەر, ديەتولوگتار سەكىلدى دۇرىس تاماقتانۋ مەن سالاماتتى ءومىر ءسۇرۋ سالتى سالاسىن جەتىك بىلەتىن تۇلعالاردى بىرىكتىرەتىن قازاقستانداعى جالعىز ۇيىم. قوزعالىسقا قاتىسۋشىلار اراسىندا اتاقتى الپينيست دەنيس ۋرۋبكو, وليمپيادا چەمپيونى ولگا شيشيگينا, قازاق تاماقتانۋ اكادەمياسىنىڭ, سالاماتتى ءومىر ءسۇرۋ سالتىن قالىپتاستىرۋ ماسەلەلەرى ءجونىندەگى ۇلتتىق ورتالىقتىڭ, قازاقستاننىڭ ىسكەر ايەلدەر قاۋىمداستىعىنىڭ ماماندارى مەن تاماقتانۋ, دەنساۋلىق جانە سۇلۋلىق سالالارىنىڭ باسقا دا ساراپشىلارى بار.
قازاقستاننىڭ سپورت جۋرناليستەرى قاۋىمداستىعىنىڭ پرەزيدەنتى مارات يساباەۆ:
– ءبىز سپورتشىلاردىڭ جەتىستىكتەرى مەن ولاردىڭ دەنە بىتىمىنە سۇيسىنەمىز. الايدا, دۇرىس تاماقتانۋ ارقىلى ءدال سونداي بەلسەندى جانە ساۋ بولۋ ءبىزدىڭ دە قولىمىزدان كەلەدى عوي. ال دەنساۋلىق ءۇشىن ەڭ پايدالى ءونىمدەردىڭ ءبىرى بولىپ تابىلاتىن تابيعي شىرىنعا جىلدىڭ ءبىر كۇنىن ارناۋعا ابدەن بولادى, – دەيدى.
جاھاندىق جوبانىڭ قازاقستان ءيميدجى ءۇشىن ماڭىزدىلىعى جايىندا سەرگەي دروزدوۆ بىلاي دەيدى: «جاڭا قازاقستان كۇننەن-كۇنگە وركەنيەتتى, زاماناۋي ءارى ءال-اۋقاتتى مەملەكەت رەتىندە الەمگە تانىلىپ كەلەدى. بۇل يميدجدىڭ ساقتالۋىنا قازاقستاندا العاش رەت وتكىزىلىپ وتىرعان ازيادا ويىندارى, قازاقستاننىڭ وتكەن جىلى ەقىۇ-عا ءتوراعالىق ەتۋى, سونداي-اق, كوپتەگەن باسقا دا وقيعالار سەپتىگىن تيگىزىپ وتىر. الايدا, بۇل وقيعالار ساياساتكەرلەر, سپورتشىلار سەكىلدى جەكەلەگەن ماماندىق يەلەرىنىڭ جەتىستىگى بولىپ تابىلادى. ال دۇنيەجۇزىلىك شىرىن كۇنى قابىلدانسا, بۇل ءاربىر قازاقستاندىقتىڭ ۇلەسى بولار ەدى. سوندىقتان, حالقىمىزعا ءبىر اۋىزدان بىرىگىپ, الەمدىك اۋقىمدا سالاماتتى ءومىر ءسۇرۋ سالتىن قولداۋشى ەلدىڭ تۇرعىندارى رەتىندە وزدەرىن نەگە تانىتپاسقا؟»
ايناش ەسالي.
الماتى.