اتىراۋ تۇرعىنى ەلەنا پريدانوۆا ءوزىنىڭ جەر باسىپ جۇرگەنىن سوت ارقىلى دالەلدەدى
ءار ادام ءوزىنىڭ الدىندا نە كۇتىپ تۇرعانىن ەشقاشان بىلە قويماس, ءسىرا. ايتپەسە, قاتەلىككە دە ۇرىندىرار شالىس قادام جاساماس ەدى. ءتىپتى, تاعدىردىڭ تەپەرىشىن دە كورمەگەن بولار ەدى. دەگەنمەن, اتىراۋدىڭ تۇرعىنى ەلەنا پريدانوۆانىڭ باسىنان وتكەنى ەرىكسىز ويعا قالدىرادى. ول ءوزىنىڭ ازاماتتىق نەكەدەگى كۇيەۋى نيكولاي ورلوۆپەن بىرگە ءۇش بالا تاربيەلەپ, قالا ىرگەسىندەگى شارۋا قوجالىقتارىنىڭ بىرىندە جالدامالى جۇمىس جاساعان. قوجالىق يەسىنىڭ ۋاقىتشا باسپاناسىندا تۇرعان. كۇندەلىكتى ىشەتىن تاماق, ۋاقىت وتكىزەر جۇمىس تابىلعاسىن, نيكولاي مەن ەلەنا الاڭسىز جۇرە بەرگەن. نيكولايدىڭ تۋىستارى بار-جوعى بەلگىسىز, ال ەلەنا ءوزىنىڭ تۋىسقاندارىمەن مۇلدەم حابارلاسپاي قويىپتى. الايدا, ولار تۇرىپ جاتقان باسپانا ورتەنىپ, ءبىر كۇندە ءارى جۇمىسسىز, ءارى باسپاناسىز قالدى.
قاقاعان قىستا ءۇش بالامەن دالادا قالعان وتباسىنىڭ احۋالى الەۋمەتتىك جەلى ارقىلى بەلگىلى بولدى. جەرگىلىكتى بيلىكتىڭ ارالاسۋىمەن نيكولاي مەن ەلەناعا قولداۋ كورسەتىلدى. سول كەزدە ازاماتتىق نەكەدەگى ەرلى-زايىپتىلاردىڭ دا, ولاردىڭ بالالارىنىڭ دا جەكە باسىن كۋالاندىراتىن قۇجاتتارى جوق ەكەنى انىقتالدى. ءبىر تاڭدانارلىعى, ەلەنا پريدانوۆا قايتىس بولعاندار ساناتىندا بولىپ شىقتى. تۇرمىستىڭ اۋىرلىعى ارقاعا باتقانى ازداي, ءوزىنىڭ ولىلەر ساناتىندا بولۋى ەلەناعا جىعىلعان ساتتە جەلكەسىنە تيگەن جۇدىرىقتاي اسەر ەتتى. ەندى وعان ءتىرى ەكەنىن دالەلدەۋ ءۇشىن نە ىستەۋ كەرەك ەدى؟
– ازاماتشا ە.پريدانوۆا ۇزاق ۋاقىت بويى اتىراۋ وبلىسىنداعى اۋىلدىق وكرۋگتەردىڭ بىرىندە ءومىر ءسۇرىپ, تۋىستارىمەن حابارلاسپاعان. بىرنەشە جىلدار وتكەننەن كەيىن تۇرمىستىق زورلىق-زومبىلىقتان زارداپ شەككەن ايەلدەرگە ارنالعان داعدارىس ورتالىعىنا تۇسكەن ۋاقىتتا ءوزىنىڭ قازا تاپقاندار ەسەبىندە تۇرعانىن بىلگەن. ءوز قۇقىعىن قورعاۋ ماقساتىندا اتىراۋ قالالىق سوتىنا وزىنە قاتىستى قايتىس بولۋ تۋرالى اكتىلىك جازبانىڭ جانە قايتىس بولۋ تۋرالى كۋالىكتى زاڭسىز دەپ تابۋ تۋرالى ارىزبەن جۇگىنگەن. سوت وتىرىسىندا جەدەل ىزدەستىرۋ شارالارىن جۇرگىزۋ بارىسىندا فوتوسۋرەتتەر ارقىلى ارىزدانۋشىنىڭ تۋىستارى ءمايىتتىڭ ۇقساس بولۋىنا بايلانىستى ە.پريدانوۆا دەپ تانىعانى انىقتالدى. كەيىننەن ارىزدانۋشىنىڭ تۋىستارىنىڭ ءبىرى ازاماتشا ە.پريدانوۆانى قايتىس بولدى دەپ تانۋ تۋرالى كۋالىگىن العان. سوت وتىرىسىندا ارىزدانۋشىنىڭ بارلىق تۋىستارى ە.پريدانوۆانى وزدەرىنىڭ اپكەسى, تاتەسى رەتىندە تانىعان. جيناقتالعان بارلىق دالەلدەمەلەردىڭ جيىنتىعىمەن سوت ارىزدانۋشى ە.پريدانوۆانىڭ تالابىن نەگىزدى دەپ تانىپ, وعان قاتىستى قايتىس بولۋ تۋرالى اكتىلىك جازبانى جانە قايتىس بولۋ تۋرالى كۋالىكتى زاڭسىز دەپ تانىدى, – دەپ حابارلادى اتىراۋ وبلىستىق سوتىنىڭ ءباسپاسوز حاتشىسى بورانباي عاليەۆ.
تەگىندە, ءتىرى ادامدى ءولدى دەۋگە بولا ما؟ دەسەك تە, تاعدىردىڭ تەپەرىشىن كورگەن, تۇرمىسىنىڭ اۋىرلىعىنا كونگەن ەلەنا پريدانوۆا ءوزىنىڭ ءتىرى ەكەنىن سوت ارقىلى دالەلدەدى. ەندى ول ءوزىن ومىرگە جاڭا كەلگەندەي سەزىنەدى. شىندىعىندا, ەندى ازاماتتىق نەكەدەگى كۇيەۋى نيكولاي ورلوۆپەن بىرگە ءۇش بالا تاربيەلەگەن ونىڭ ءومىرى جاڭا ارناعا بەت بۇراتىن بولار...
جولداسبەك شوپەعۇل,
«ەگەمەن قازاقستان»
اتىراۋ