ەلباسى نۇرسۇلتان نازارباەۆتىڭ باستاماسىمەن قولعا الىنعان رەسپۋبليكالىق «بەيبىتشىلىك پەن كەلىسىمنىڭ جول كارتاسى» مەگاجوباسى اياسىندا وڭىرىمىزدە وتكەن ۋاقىتتا ءجونى بولەك, جوسىعى ايرىقشا ءىس-شارالار ۇيىمداستىرىلىپ, وتە باي تاجىريبە جيناقتالدى. مىنە, مەگاجوبا بيىل دا جاراسىمدى جالعاسىن تاۋىپ, بارلىق اۋداندى قامتيتىن بولادى. ياعني, اۋدانداردان دەلەگاتسيالار ءبىر-بىرىنە ەستافەتانى اماناتتايدى. جۋىردا ونى وبلىس اكىمى التاي كولگىنوۆتەن قابىلداعان وبلىس ورتالىعىنىڭ وكىلدەرى اقجايىق اۋدانىنا تاپسىردى. اۋدان ورتالىعى – چاپاەۆتاعى بۇل كۇننىڭ باعدارلاماسى مازمۇندىلىعىمەن ەرەكشەلەنىپ, ۇزاق ەستە قالار اسەر اكەلدى.
ۇلى دالا كەڭىستىگىندەگى بيىك شاڭىراعىمىزدا تاتۋ-ءتاتتى ءومىر ءسۇرىپ, كيەلى جەرىمىزدى ەڭبەكتىڭ قۇدىرەتىمەن كوركەيتىپ, وتان الدىنداعى جاۋاپكەرشىلىكتىڭ الاۋىن جارقىراتقانعا نە جەتسىن دەڭىز. ورالدىق دەلەگاتسيامەن اۋدان ورتالىعىنىڭ باستى الاۋىنداعى ءجۇزدەسۋدەن باستالعان شارالار مۇنى جان-جاقتى جارقىراتىپ كورسەتىپ بەردى. الدىمەن قالالىقتار چاپاەۆتاعى تاربيە, ءبىلىم ۇيالارىنا, ونىڭ ىشىندە مەملەكەت پەن جەكەشە سەرىكتەستىگىنىڭ ايقىن ءبىر دالەلى بولىپ تابىلاتىن, جۋىردا دۇنيەگە كەلگەن «جىبەك» جانە «ايانا» جەكە بالاباقشالارىنا ورال اكىمى ناريمان تورەعاليەۆتىڭ اتىنان سپورت قۇرالدارى, ت.ب. سىيلىقتار تاپسىردى. بۇل ەرتەڭ ەل تاعدىرىنىڭ تىزگىنەن ۇستايتىن ۇل-قىزعا قامقورلىقتىڭ جارقىن ءبىر كورىنىسىنە اينالدى.
وسى قايىرىمدىلىق كەرۋەنى ودان ءارى اۋىلداعى ۇلى وتان سوعىسىنىڭ ارداگەرلەرى حاسەن قوسپاەۆ, زينەكەش ساقىباليەۆ, يۆان اكۋتين, قاماتاي ساربوپەەۆتىڭ ۇيلەرىنە بارىپ, ولارعا سىي-سياپات تاپسىرۋمەن جالعاستى. بقو قحا توراعاسىنىڭ ورىنباسارى, حاتشىلىق مەڭگەرۋشىسى عايسا قاپاقوۆ, «نۇر وتان» پارتياسى قالالىق فيليالى, ورال اكىمدىگى, كاسىپورىندار وكىلدەرى ۇلى جەڭىس ساربازدارىمەن ەمەن-جارقىن اڭگىمەلەستى.
قۇرىلعانىنا ءۇشىنشى جىلعا اياق باسقان «رادۋگا» سلاۆيان ەتنومادەني بىرلەستىگىندە ىستىق ىقىلاستى كەزدەسۋ ءوتتى. ازاماتتىق جانە رۋحاني قۇندىلىقتاردىڭ بىرلىگىن ناسيحاتتاۋ جونىندەگى جۇمىستارىمەن ءوڭىرىمىزدىڭ ءبىراز جەرىنە تانىلىپ ۇلگەرگەن رادۋگالىقتاردىڭ كوركەمونەرپازدىعىمەن, «جاستار» وتاۋىمەن, مۇراجايىمەن مەيماندار قىزىعا تانىستى. ازاتتىعىمىزدىڭ ۇلى قۇندىلىعىنىڭ ءبىرى – قحا شەجىرەسىن وقىپ-ۇيرەنۋ جونىندە دە ورتالىق مۇشەلەرى ايتۋلى ىستەر تىندىرۋدا.
تاريحى تەرەڭ ءبىلىم ورداسى – م.اۋەزوۆ اتىنداعى ورتا مەكتەپتە اۋدان اۋىلدارىنان وكىلدەر قاتىسۋىمەن دوڭگەلەك ۇستەل ءوتتى. اۋدان اكىمى ءا.جولامانوۆ ءماجىلىستى «100 ناقتى قادام» ۇلت جوسپارىنان تۋىندايتىن مىندەتتەردى سالماقتاۋمەن اشتى. قازاقستاندىقتاردىڭ مادەني ءارالۋاندىعىنىڭ قۋاتتى كۇشى, ەلدىك رۋحى, حالىق شىعارماشىلىعىنىڭ ارىندى ارناعا توعىسۋى, وڭىرىمىزدەگى بارلىق ەتنومادەني بىرلەستىكتەردىڭ سالت-ءداستۇردى كوزدىڭ قاراشىعىنداي ساقتاۋى ورالدىق ونەر ۇجىمدارىنىڭ «مەرەي» مادەني-دەمالىس ورتالىعىندا وتكەن كونتسەرتىنەن ءسوزسىز كورىندى.
قالا اكىمىنىڭ ورىنباسارى عالىم ورىنعاليەۆ مەگاجوباعا تەرەڭ ءمۇددەلىلىكپەن, ىرگەلى ىستەرمەن اتسالىسىپ كەلە جاتقان اقجايىقتىقتارعا اقجارما العىسىن ايتىپ, ورال قولتاڭباسى ايشىقتالعان, تاۋەلسىزدىك جىلدارىنداعى ەل جەتىستىكتەرى تاڭبالانعان سيمۆولدىق البومدى اۋدان اكىمى ءادىل جولامانوۆقا سالتاناتتى جاعدايدا تاپسىردى. اۋداننان وبلىس ورتالىعىنا ەستەلىك سىيلىق تابىستالدى.
وسى كۇنى چاپاەۆتا ورالدىق جەكە كاسىپكەرلەر, جشس, شارۋا قوجالىقتارىنان اكەلىنگەن تاۋارلارىنىڭ ءجارمەڭكەسى ءوتتى.
ورال اماناتتاعان ەستافەتامەن اقجايىق اۋدانىنىڭ وكىلدەرى بوكەي ورداسى اۋدانىنا جول تارتتى. مەگاجوبا تاۋەلسىزدىك كۇنى قارساڭىندا وبلىس ورتالىعىندا قورىتىندىلانادى.
تەمىر قۇسايىن,
«ەگەمەن قازاقستان»
باتىس قازاقستان وبلىسى,
اقجايىق اۋدانى