كۇنى كەشە رەسپۋبليكامىزدىڭ ماڭىزدى مەملەكەتتىك ورگاندارىندا لاۋازىمدى قىزمەتتەر اتقارىپ, بيلىك باسىنداعى الاش ازاماتتارىنىڭ العى ساپىندا جۇرگەن, ءومىرىنىڭ اقتىق ساتىنە دەيىن ەلىم دەپ ەمىرەنىپ, حالقىم دەپ قامىن جەپ وتكەن تەكتى تۇلعالارىمىزدىڭ ءبىرى, ساياسات ساردارى, كورنەكتى مەملەكەت جانە قوعام قايراتكەرى قاراتاي تۇرىسوۆتىڭ جارقىن بەينەسى ءالى كوز الدىمىزدا. سوناۋ كەڭەس زامانىندا ەڭبەك جولىن قاتارداعى ينجەنەر-گەولوگتان باستاپ, قالا, وبلىس باسقارىپ, رەسپۋبليكا كومپارتياسى ورتالىق كوميتەتىنىڭ حاتشىسى, مينيسترلەر كەڭەسى توراعاسىنىڭ ورىنباسارى, كاسىپوداقتاردىڭ بۇكىلوداقتىق ورتالىق كەڭەسىنىڭ حاتشىسى سىندى مارتەبەلى لاۋازىمداردىڭ تىزگىنىن ۇستاپ, ودان بەرگى تاۋەلسىزدىك جىلدارىندا دا پرەزيدەنتتىڭ سەنىمدى سەرىكتەرى قاتارىندا مينيستر, ورتالىق سايلاۋ كوميسسياسىنىڭ توراعاسى, پارلامەنت ماجىلىسىندەگى قارجى جانە بيۋدجەت جونىندەگى كوميتەتىنىڭ توراعاسى قىزمەتتەرىن قالتقىسىز اتقارعان ەكونوميكا عىلىمدارىنىڭ دوكتورى, ينجەنەرلىك اكادەميانىڭ اكادەميگى قاراتاي اعامىزدىڭ ەسىمىن ەلدىڭ زيالى قاۋىمى عانا ەمەس, كوزى اشىق, كوكىرەگى وياۋ بارشا جۇرتشىلىعى سىرتتاي ەستىپ, جاقسى ءبىلىپ قانا قويماي, ءبىر كورگەننەن ونى جازباي تانيتىن.
بىلايعى جۇرت قارەكەڭدى وزگەدەن ەرەك دارالاپ تۇراتىن كەسكىن-كەلبەتى مەن نۇرلى كوزدەرىنە, ءتىپ-تىك قايىرىلىپ, اجارىن اشا تۇسەتىن كۇمىستەي اپپاق شاشىنا تامسانا دا تاڭدانا قاراسا, سىيلاس دوس, جاقىن-جۋىقتارى مەن ارىپتەستەرى ونىڭ جانىنىڭ جايساڭدىعى مەن كوڭىلىنىڭ كەڭدىگىنە, ادامعا دەگەن شىنايى مەيىرىم-شاپاعاتى مەن مارتتىگىنە ءتانتى بولاتىن. ءوز ىسىنە شەكسىز بەرىلگەن, قىزمەتىنە ادال, جانى تازا قارەكەڭنىڭ ارىپتەستەرى مەن دوستارى اراسىندا عانا ەمەس, ەل ىشىندەگى ابىروي-بەدەلى دە كوپتەگەن زامانداستارىنان اسىپ ءتۇسىپ جاتاتىندىعى راس-تى. سونىسىنا قىزىعا دا قىزعانا قارايتىندار دا از بولمايتىن.
مىنە, مۇنىسىن جاقسى بىلەتىن, اعامىزبەن ءدام-تۇزداس بولعان سىرالعى دوس-جاران كەزىندە قارەكەڭنىڭ وسىنداي قادىر-قۇرمەتكە بولەنۋىندە وتباسىنىڭ بەرەكەسىن كەلتىرىپ وتىرعان ونىڭ سۇيىكتى جارى, ادال ومىرلىك سەرىگى اسكەركۇل جامبايبەكقىزىنىڭ وزىندىك ۇلەسى بار ەكەنىن, ونىڭ قوناقجايلىلىعى مەن پەيىلىنىڭ دارقاندىعىن, كىسىگە قايىرىمى مەن بيىك پاراساتىن, ادامگەرشىلىك ىزگىلىگى مەن ءىلتيپاتىن ريزالىقپەن ايتىپ وتىرادى. وسى اڭگىمەلەر قۇلاعىما تيگەن مەن وسىدان ون بەس جىل بۇرىن اسكەركۇل جەڭگەيگە جولىعىپ, ونىمەن جۇزدەسۋگە اسىققان ەدىم. ءسويتىپ, الدىن الا تەلەفون ارقىلى وزىمەن تىلدەسۋگە كەلىسىمىن الىپ, ۋاقىتىن بەلگىلەپ, استاناداعى پارلامەنت دەپۋتاتتارى تۇراتىن ءۇيدىڭ ەكىنشى قاباتىنا كوتەرىلىپ, پاتەر قوڭىراۋىن باسقانىمدا, ەسىكتى ءوزى اشىپ قارسى العان اسكەركۇل جەڭگەيدىڭ جىلى شىرايىن كورگەندە-اق قادامىمدى جاقسىلىققا جورىعانمىن.
قايران, قارەكەڭ دە ۇيىندە بولىپ شىقتى. ءبىزدىڭ العاش جۇزدەسۋىمىزدەن-اق بىردەن ءتىل تابىسىپ, ەمەن-جارقىن اڭگىمەمىز ءورىلىپ سالا بەرگەن. «ءاي, مۇنىڭ دا ءجون ەكەن», – دەپ اڭگىمەمىزگە جان بىتىرگەن دە قارەكەڭنىڭ ءوزى ەدى سوندا. ەكەۋىمىز قوناق بولمەدەگى جۇمساق ديۆانعا جايعاسقاننان كەيىن ماعان كوزىنىڭ قيىعىن ءبىر تاستاپ قويدى دا: – سەن دە ايەلدىڭ قادىرىن بىلەتىن جاسقا جەتىپ قالعان سياقتىسىڭ, بايقايمىن, – دەپ الىپ, اعىنان جارىلىپ سالا بەرگەن. – ايتارى جوق, وتباسىنىڭ ءوسىپ-ءونۋى مەن ءورىسى دە, جاقسىلىعى مەن تاپشىلىعى دا ايەلگە بايلانىستى. بەس بالامنىڭ قالاي تۋىپ, قالاي ادام بولعانىن دا وسى اسكەركۇل جەڭگەڭ بىلەدى. مەن 1955 جىلى ماسكەۋدەن ينستيتۋت ءبىتىرىپ كەلىپ, قاراعاندى وبلىسىنىڭ گەولوگيالىق-بارلاۋ پارتيالارىندا بويداق ينجەنەر گەولوگ بولىپ التى-جەتى جىل جۇرگەندە كۇرەپ تاپقان اقشام قۇمعا سىڭگەندەي بولاتىن. ول كەزدە 350 سوم ايلىق دەگەنىڭىز كوپ اقشا ەدى عوي. سودان 1962 جىلى ۇيلەنىپ, بىرگە تۇرعاننان كەيىن قولىما شەشەم, اعامنىڭ ەكى بالاسى كەلدى. ۇزاماي مەن پارتيا جۇمىسىنا اۋىسىپ, ءبارىمىز 150 سوم جالاقىعا قاراپ قالدىق. سوعان بەس جان تىرشىلىك ەتتىك. ايتايىن دەگەنىم, ءبارىنىڭ بەرەكەسىن كەلتىرگەن دە, ونىمەن قويماي, سول اقشاعا اعايىن مەن دوس-جاراننىڭ كوڭىلىن تاپقان دا وسى جەڭگەلەرىڭ.
پارتيا جۇمىسىندا جۇرگەندە تاڭعى ساعات 7-دە كەتىپ, تۇنگى 12- دە كەلەمىز. ۇيگە قاراۋعا مۇرشا قايدا؟ سوندا بار شارۋانى تىندىراتىن ءبىر ءوزى. قازىر بالالارى وسسە دە تىنىم جوق. كەيدە: «نە ىستەيمىز, ۇيگە قىزمەتشى جالدايمىز با, الدە توقال الايىن با؟» دەپ ايتىپ قويام. ارينە, قالجىڭ عوي. «جاقسى ايەل جامان ەركەكتى ادام ەتەر, جامان ايەل جاقسى ەركەكتى نادان ەتەر» دەمەكشى, ءبارى وسى جەڭەشەڭنىڭ جاقسىلىعى, ەگەر مەن قاندايدا ءبىر بيىككە كوتەرىلدىم دەسەم, اسكەركۇلدىڭ دە مۇندا ۇلەسى كوپ. اسكەركۇلگە اعايىن-تۋىس قانا ەمەس, ءتىپتى, سوناۋ گەولوگ كەزىمنەن ارالاسقان جورا-جولداستارىمنىڭ بالالارىنا دەيىن ىزدەپ كەلىپ, ءۇيىرىلىپ «اپالاپ» تۇرادى. جارايدى, ەندىگىسىن جەڭگەڭ ءوزى جەتكىزەر. سەندەردە جۇمىس بەسكۇندىك شىعار, بىزدە سەنبى دەگەن سيرەك بولادى...
قارەكەڭ وسىنى ايتىپ, مەنىمەن قوشتاسىپ, جۇمىسىنا جينالا باستادى. سول جولى اسكەركۇل جەڭگەمىزبەن جۇرگىزگەن سۇحباتىمىز «قازاقستان ايەلدەرى» جۋرنالىنىڭ 2001 جىلعى تامىز ايىنداعى سانىندا جاريالانعان بولاتىن. سودان كەيىن دە جۇزدەسۋىمىزدىڭ ورايى كەلگەن.
ال ەندى اسكەركۇل جەڭگەيدىڭ ءوزىنە كەلسەك, قىرعىزستاننىڭ تالاس وبلىسىنىڭ كيروۆ اۋدانىنا قاراستى گروزنىي اۋىلىندا ءوسىپ, مەكتەپتى ۇزدىك ءبىتىرگەن ول سول جىلى قىرعىز مەملەكەتتىك ۋنيۆەرسيتەتىنىڭ ماتەماتيكا فاكۋلتەتىنىڭ ءبىرىنشى كۋرسىندا وقىپ جۇرگەن كەزىندە اكەسى جامبايبەك شۇعىل تۇردە قازاقستانعا كوشۋ ءجونىندە شەشىم قابىلدايدى. ءسويتىپ, اسكەركۇلدىڭ قۇجاتتارىن دا قىزىنىڭ جىلاپ-سىقتاعانىنا قاراماي, ۋنيۆەرسيتەتتەن الدىرىپ, جامبىل وبلىسى, جامبىل اۋدانىنداعى كۋيبىشەۆ اتىنداعى اۋىلدان ءبىر-اق شىعادى. باقسا, اكەسى اناسى كەربەزدىڭ تۋعان جەرىندەگى پارتورگتىك قىزمەتىن دە الدىن الا كەلىسىپ قويسا كەرەك.
سودان مەكتەپتى قىرعىزشا ءبىتىرگەن اسكەركۇل بىردەن جوعارى وقۋ ورنىنا قۇجات تاپسىرۋعا باتىلى بارماي, ونىڭ ۇستىنە قابىلداۋ مەرزىمى ءوتىپ كەتكەندىكتەن ورتا ارناۋلى وقۋ ورنىن ءتامامداپ الىپ بارىپ, ينستيتۋتقا ءتۇسۋدى ويلايدى. ءسويتىپ جۇرگەندە «جامبايبەكتىڭ جۇزىكتىڭ كوزىنەن وتكەندەي بويجەتكەن قىزى بار ەكەن» دەپ بۇعان كوز تىگىپ, ءسوز سالىپ, قۇدا تۇسۋشىلەر كوبەيەدى. اقىرى, نە كەرەك, كولحوزدا ۇجىم باستىعى قىزمەتىن اتقاراتىن, كورشىسى, اكەسىمەن رۋلاس بەيسەنباي مارالوۆتىڭ ۇيىندەگى ءارى سىرلاس, ءارى سىيلاس جەڭگەسى تۇرسىننىڭ «ماسكەۋدە وقىعان, قازىر قاراعاندىدا جۇمىس ىستەيتىن مەنىڭ ءبىر قۇدا بالام بار» دەپ اڭگىمەنىڭ شەتىن شىعارعانىمەن, ونىڭ ۇستىنە بەيسەكەڭنىڭ دە: «ول مىنانداي!» دەپ باس بارماعىن شوشايتقانى دا تەگىن بولماي, اينالىپ كەلگەندە تاعدىر وسى قارەكەڭمەن تابىستىرىپ تىنعان. قارەكەڭ مەن اسكەركۇل جەڭگەمىز ەكەۋىنىڭ تانىسۋى مەن تابىسۋىنىڭ ءوزى ءبىر جىر-داستانعا بەرگىسىز حيكايا. «ماحاببات – ماڭگى ەرتەگىنىڭ» ناعىز ءوزى.
سونىمەن, جاراسىمدى جۇپ ەكى جاستىڭ اعادىردان باستالعان جۇبايلىق ءومىرى تۇرىسوۆتار اۋلەتىنىڭ شاڭىراعىن شاتتىققا بولەگەن. العاش اعادىر ستانساسىندا ارىپتەس گەولوگ دوستارى بۇلاردى پويىزدان قۇشاق-قۇشاق گۇل شوقتارىمەن, جۇرەكتەرى جارىلا قۋانا كۇتىپ الىپ, اياق-قولدارىن جەرگە تيگىزبەي, اق بوساعادان اتتاتقاندا قارەكەڭنىڭ اناسى ك ۇلىمحان مەن اعاسىنىڭ ۇل-قىزدارى تالجان مەن الىمقۇل قۇشاقتارىن جايا قارسى الىپ, اناسى اينالىپ-تولعانىپ, ەمىرەنە باۋىرىنا باسقاندا اسكەركۇل ءوزىنىڭ جار تاڭداۋدا جازا باسپاعانىن جان-جۇرەگىمەن سەزىنگەن. سەزىنىپ قانا قويماي, وسى التىن بوساعانىڭ باقىتى ءۇشىن بار كۇش-جىگەرى مەن عۇمىرىن ارناۋعا ىشتەي سەرت ەتكەندەي بولعان.
شىنىندا, انا مەيىرىمى جۇرەگىن تەبىرەنتكەن سول سەزىمى الداماپتى. قارەكەڭ العاشقى كۇننەن-اق اياۋلى جارىن ايالاپ, ناعىز ازاماتتىعىن تانىتسا, اسكەركۇل ءوزىن قىزىنداي كورىپ, باۋىرىنا تارتقان ەنەسىن اناسىنداي ۇكىلەپ كۇتىپ, بار جىلى-جۇمساعىن الدىنا توسىپ, قاباعىنا كىربىڭ تۇسىرمەۋگە جانىن سالعان. قاينىسى مەن قايىنسىڭلىسىنىڭ دە كوڭىلدەرىنەن شىعىپ, ۇيگە كەلگەن قوناقتىڭ دا بابىن تابا ءبىلىپ, از ۋاقىتتا قۇتتى كەلىن اتانعان. كوپ ۇزاماي, قارەكەڭنىڭ دە ومىردە جولى بولىپ, گەوفيزيكالىق ەكسپەديتسياداعى پارتيا باستىعىنان اقشاتاۋ وندىرىستىك اۋدانىنداعى پارتيالىق باقىلاۋ كوميتەتىنىڭ توراعاسى قىزمەتىنە جوعارىلاپ, وسىندا جۇرگەندە تۇلابويى تۇڭعىشتارى نۇرلانى دۇنيەگە كەلەدى.
مىنە, وسىدان كەيىن-اق قانداي دا بولسىن جاۋاپكەرشىلىكتى ءمىنسىز اتقارىپ, قاي ءىستى بولسىن ۇرشىقشا ءۇيىرىپ الا جونەلەتىن قارىمدى دا قاعىلەز قارەكەڭنىڭ قىزمەت ساتىسىمەن ورلەۋ جولى باستالعان. قاراجال قالالىق پارتيا كوميتەتىنىڭ ءبىرىنشى حاتشىسى قىزمەتىن اتقارىپ جۇرگەندە قۇداي قارەكەڭ مەن اسكەركۇل جەڭگەيگە ءۇش بىردەي قىزدى: عالياسىن, قورلانى مەن توعجانىن بىرىنەن كەيىن ءبىرىن بەرىپ, ۇيلەرى ءۇپىر-ءشۇپىر سابيلەرگە تولىپ, كوپ بالالى وتباسى بولىپ شىعا كەلگەن. دەگەنمەن, بالا بولعان سوڭ اۋىرىپ-سىرقاماي تۇرا ما؟ وسىنى ويلاپ, كورىنگەنگە جۇگىرە بەرگەنشە دەپ, سول قاراجالدا تۇرعاندا مەديتسينا ۋچيليششەسىنە ءتۇسىپ, ونى قىزىل ديپلوممەن ءبىتىرىپ العان اسكەركۇل ءوز ءۇيىنىڭ وتباسىلىق دارىگەرىنە اينالعان.
تۇرمىسقا شىققاننان كەيىن كوپ ۇزاماي اعادىرعا جاعدايلارىن ءبىلىپ كەتۋگە كەلگەن اناسى ەكەۋى وڭاشا قالعان ءبىر ساتىندە: «ەسىڭدە بولسىن, ەكەۋىڭ بىردەي بىلگىش بولىپ اڭگىمە ايتساڭدار, ايەل ەرىنەن سىنىق سۇيەم تومەن تۇرماسا, ۇيدەن بەرەكە كەتەدى. بۇگىن ءبىر ءسوز ايتساڭ, ەرتەڭ ەكى, ءۇشىنشى كۇنى ءۇش ءسوز ايتىپ, سوسىن تىلدەن جامان ءسوز شىعادى, سوعان جەتكىزبە, سابىرلى بول. قادىر-قاسيەتىڭ بولماي قالادى» دەگەندى شەگەلەپ تۇرىپ ايتقان. وقىماسا دا توقىعانى, كورگەنى كوپ اياۋلى اناسىنىڭ وسى ءبىر وسيەت ءسوزىن جادىندا ماڭگى ۇستاعان اسكەركۇل جەڭگەي وتاعاسىنىڭ بار جاعدايىن جاساپ, ءۇيدىڭ شىرايىن, وتباسىنىڭ بەرەكەسىن كەلتىرۋدەن ەشقاشان اينىعان ەمەس.
ءيا, قاراتاي اعا مەن اسكەركۇل جەڭگەي جۇبايلىق ومىرلەرىن باستاعان قاراعاندىنىڭ اعادىرىنان بەرى 16 رەت كوشىپ-قونىپتى. سونىڭ ىشىندە تورعايدىڭ ارقالىعىندا, ماسكەۋدە, الماتىدا ەكى رەت بولىپ, وسى استاناعا كەلىپ تابان تىرەگەن ەكەن. سونىڭ قاي-قايسىسىندا دا قانشاما ادامدارمەن, جاقسى-جايساڭدارمەن دامدەس-تۇزداس, سىيلاس بولىپ, تۋىستاي بولىپ كەتۋىنىڭ ءتۇپ-توركىنى دە اينالىپ كەلگەندە وسى اسكەركۇل جەڭگەمىزدىڭ كىشىپەيىلدىگى مەن كەڭپەيىلدىگىندە جاتقانىن جۇرتتىڭ ءبارى جاقسى بىلەتىن. مىسالى, ارقالىقتا وبكومنىڭ حاتشىسى كەزىندە 1976 جىلدىڭ 8 ناۋرىزىندا دۇنيەگە كەلگەن ەڭ كەنجەتايلارىنىڭ ەسىمىن وبكومنىڭ ءبىرىنشى حاتشىسى ساقان قۇسايىنوۆ اعاسى ءاليا دەپ قويىپ, ونىڭ ۇيىندەگى شايزا اپاسى بار جول-جورالعىسىن جاساپ, ۇلكەندىك ۇلگىسىن كورسەتكەن. سونىمەن قاتار, اسكەركۇل جەڭگەي كارىم مۋسين دەگەن اعاسىنىڭ بايبىشەسى ءباديشا, اسانباي اسقاروۆ اعاسىنىڭ ۇيىندەگى وتاعاسىنىڭ باسىنا ءىس تۇسكەندە ناعىز قايسارلىق پەن جىگەرلىلىك تانىتىپ, قيىندىقتى قايىسپاي كوتەرىسكەن فاتيما اپالارىنان دا كوپ تاعىلىم-تاربيە العانىن اعىنان جارىلا ايتقان.
اۋىلدىڭ وزىندە دە ءبىلىمى بولماسا دا, ومىردەن توقىعانى كوپ, ءىلىمى مەن پاراساتى مول, ۇلپانداي ۇلاعاتتى, ايعانىمداي اقىلمان, رۋحى مىقتى, جان دۇنيەسى باي, تۇلابويى دانالىق تۇنعان انالار قانشاما. ولاردىڭ مىناۋ قالادان, مىناۋ دالادان دەپ ايىراتىنى جوق دەپ بىلەدى اسكەركۇل اپا. ءبىر عانا مىسال. اسكەركۇلدىڭ اناسى قايتىس بولعاننان كەيىن بىردە اكەسى اۋرۋحاناعا ءتۇسىپ قالىپتى. مۇنى ەستىگەن قارەكەڭنىڭ مايدانعا اتتانعان ءۇش اعاسىنان امان كەلگەن ۇلكەنى ءمامىتالى قايناعاسىنىڭ ايەلى ءدىلداش ابىسىنى ۇيدەگىلەرگە: «سەندەر ەندى ءوز قامدارىڭدى جاساي بەرىڭدەر. قاتيپا بولسا جوق. قىزى اسكەركۇل بولسا انا جاقتا. بالالارى شيەتتەي. مەن ەندى سول بالالاردىڭ جانىنا بارايىن. قايبىر جەتىسىپ جاتىر دەيسىڭ», – دەپ سولاردىڭ ىستىق-سۋىعىن ازىرلەپ, قۇداسى وزىنە-ءوزى كەلىپ: «قۇداعي, شۇكىر, ەندى جاقسىمىن. ۇيگە قايتا بەرىڭىز, راحمەت سىزگە, اللا رازى بولسىن!» – دەگەنشە كەتپەپتى. ال ەندى بۇعان نە ءۋاج ايتارسىز.
سويتكەن ءدىلداش ابىسىنىنىڭ ۇلدارى الىمقۇل مەن رايىمحان دا, قىزى تالجان دا قارەكەڭ مەن اسكەركۇلدىڭ قامقورلىعىندا بولىپ, كەيىن جەنپي-ءدى ءبىتىرگەن تالجاندى قورعالجىننىڭ جىگىتىنە ءوز قولدارىنان ۇزاتقان دا وسى اعاسى مەن جەڭگەسى بولسا نە دەرسىڭ. اعايىن اراسىنداعى سىيلاستىقتىڭ بۇدان ارتىق قانداي ۇلگىسى كەرەك. نەمەسە, قارەكەڭ الماتىدان تورعايعا وبكوم حاتشىسى قىزمەتىنە باراتىندا بۇعان دەيىن قولدارىندا بولعان ەنەسى: «سەندەرگە بارىپ-كەلىپ تۇرارمىن. بىراق ەندى ەلدە قالايىن», – دەپ ءوز ريزاشىلىعىمەن ۇلكەن ۇلىنا بارىپ, ەكى جىلدان كەيىن قايتقان عوي. ءدال سول قايتاتىن كۇنى ماسكەۋدە وقۋدا جۇرگەن قارەكەڭنەن بۇرىن تورعايداعى اسكەركۇلگە حابار بەرگىزىپ, قايناعاسىنىڭ بالاسى: «جەڭەشەم ەرتەڭ جەتەدى», – دەگەن ءسوزىن ەستىگەن بويدا تىنىسىن تەرەڭ ءبىر الىپتى دا جۇرە بەرگەن ەكەن ەنەسى مارقۇم.
ەسەسىنە قارەكەڭ دە اسكەركۇل جەڭگەمىزدىڭ بىردە-ءبىر تۋىسىن شەتقاقپاي ەتپەي, اكە-شەشەسىن دە اقتىق ساپارلارىنا ءوز قولدارىمەن اق جۋىپ, ارۋلاپ اتتاندىرىپ سالىپ, باۋىرلارىن قاناتىنىڭ استىنا العانىن, ولار دا قارەكەڭە كوزى تىرىسىندە «اعاتايلاپ» قۇراق ۇشىپ, قۇرمەت كورسەتكەنىن ريزالىقپەن ەسكە الادى. البەتتە, وسىنىڭ ءبارى اينالىپ كەلگەندە اسكەركۇل جەڭگەمىزدىڭ جان بالاسىن جاتسىنبايتىن جاقسىلىعى مەن ادامعا دەگەن جاناشىرلىعىنىڭ, ءىلتيپاتى مەن ىزگىلىگىنىڭ, سونىمەن قاتار قارەكەڭنىڭ دە بيىك ادامگەرشىلىگى مەن ۇلكەن پاراسات يەسى بولعاندىعىنىڭ ايعاعى ەكەندىگىندە داۋ جوق.
اتتەڭ, تاعدىرعا نە شارا؟! قارەكەڭ دە, اسكەركۇل جەڭگەمىز دە باقىتتى-اق ەدى. بىراق 2002 جىلعى 14 قاراشادا ورىن العان سول ءبىر اسا قايعىلى وقيعا – ۇلى نۇرلان مەن كەلىنى باياننىڭ قاندىقول قاراقشىلاردىڭ قولىنان قاپىدا قازا بولۋى وشاعىنىڭ ويرانىن شىعارىپ, جارقىراعان كۇندەرىن تۇنەككە اينالدىرىپ, كوڭىلدەرىن سۋ سەپكەندەي باسىپ, وزەكتەرىن وكىنىش ورتەپ, ءبارىن دە ەسەڭگىرەتىپ جىبەرگەن. تەك باستارىنا قارا بۇلت ۇيىرىلگەن وسى ءبىر اسا قيىن كۇندەردە قارەكەڭنىڭ قايعىنى قايىسپاي كوتەرگەن قايسارلىعى مەن سابىرلىلىعى عانا اڭىراعان انا مەن باۋىرىنان ايىرىلىپ شىرقىراعان قىزدارىن شاراسىزدان ساباسىنا ءتۇسىرىپ, ەستەرىن جيعىزعان.
اسكەركۇل انا ەندى نۇرلانىنىڭ ارتىندا قالعان تۇياقتارى اسەت پەن تايىرعا, نەمەرەلەرىنە عۇمىر تىلەپ, بارىنا تاۋبە ەتىپ جۇرگەندە جۇرەگى كوپتەن سىر بەرىپ, مازالاۋىن قويماسا دا پارلامەنتتەگى جۇمىسىنان قالماي, سوڭعى دەمى ۇزىلگەنشە حالقىنا قالتقىسىز قىزمەتىنەن تانباعان قارەكەڭنەن دە كوز جازىپ قالعاندا تاعدىردىڭ ىسىنە قاسقايا قارسى تۇرىپ, بەلىن بەكەم بۋعا بەكىنگەن. سونىڭ ءبىر كۋاسى – قارەكەڭ تۋرالى زامانداستارىنىڭ ەستەلىك كىتابىنىڭ جارىققا شىعۋىنا ۇيىتقى بولعانى. بۇل قارەكەڭنىڭ ەل جادىنداعى ەكىنشى ءومىرىنىڭ باستاماسى عانا بولاتىن. بۇل كۇندەرى 75-ءتىڭ تورىنە شىققان اسكەركۇل جەڭگەي نەمەرەلەرى مەن شوبەرەلەرىنىڭ مەيىربان اجەسى بولىپ وتىرعانىنا تاۋبە ەتەدى. ءيا, بۇكىل سانالى عۇمىرىندا سۇيىسپەنشىلىك پەن سىيلاستىقتىڭ, ءبىرىن-ءبىرى ايالاۋدىڭ جارقىن ۇلگىسىن پاش ەتكەن قاراتاي اعا مەن اسكەركۇل جەڭگەمىزدىڭ جۇرەكتە جانعان جۇلدىزدارى ەشقاشان وشپەك ەمەس.
مۇرات ك ۇلىمبەت,
جۋرناليست