ەلباسىنىڭ 2020 جىلعا دەيىنگى ەل دامۋىنىڭ ستراتەگياسى ايقىندالعان «بولاشاقتىڭ ىرگەسىن بىرگە قالايمىز» اتتى قازاقستان حالقىنا جولداۋى جەر-جەردە ناقتى ءىس-قيمىل باعدارلاماسى رەتىندە قابىلدانۋدا. وسىناۋ باعدارلامانىڭ ىسكە اسۋى رەسپۋبليكامىزدىڭ ەكونوميكاسى ءتيىمدى جانە حالىقتىڭ تۇرمىس دەڭگەيى جوعارى كۇشتى مەملەكەتكە اينالۋىنا مۇمكىندىك بەرمەك. اسا ماڭىزدى قۇجاتتى تالقىلاۋعا ارنالعان الماتى قالاسى اكتيۆىنىڭ جينالىسىندا وسى سوزدەر التىن وزەك بولىپ ءورىلدى. جيىنعا قالا اكىمى احمەتجان ەسىموۆ قاتىسىپ, ءسوز ءسويلەدى. ەل تاۋەلسىزدىگىنىڭ جيىرما جىلدىعى قارساڭىندا جاريا ەتىلۋى جولداۋدىڭ تاريحي ءمان-ماڭىزىن ايعاقتاي تۇسكەندەي. وندا ەكونوميكانى جەدەلدەتە جاڭالاندىرۋعا ۇلكەن كوڭىل ءبولىنگەن. پرەزيدەنت اتاپ كورسەتكەنىندەي, ءبىزدىڭ ەكونوميكامىزدىڭ باسەكەگە قابىلەتتىلىگى ەنەرگيا شىعىندارىن كەمىتۋدى قامتاماسىز ەتەتىن ءتيىمدى تەحنولوگيالارعا نەگىزدەلۋى ءتيىس.
– يندۋستريالاندىرۋ وڭىرلىك ساياساتتىڭ جاڭا پاراديگماسىن قالىپتاستىرادى, ال مۇنىڭ ءوزى بيلىكتىڭ جەرگىلىكتى ورگاندارىنا ەرەكشە جاۋاپكەرشىلىك جۇكتەيدى, – دەدى ا.ەسىموۆ. – بۇگىنگى تاڭدا الماتىدا ەل پرەزيدەنتى جولداۋدا العا قويعان مىندەتتەردى ورىنداپ شىعۋ ءۇشىن بارلىق العىشارتتار بار.
شىنىندا دا قالا ەكونوميكاسى ورگە باسۋدا. وتكەن جىلدىڭ قورىتىندىلارى بويىنشا ەكونوميكاعا سوڭعى جىلداردا بولىپ كورمەگەن ءمولشەردە كۇردەلى قارجى سالىندى. ازيادا نىساندارىنىڭ قۇرىلىسى جونىندەگى ەلباسى تاپسىرماسى ورىندالعاندىعى اتاپ ءوتىلدى.
جولداۋدا بيىك رۋح, ۇلكەن ساياسي ءمان بار ەكەندىگى ايتىلدى. ول ۇلتتى ءوزىنىڭ بارشا مۇمكىندىكتەرىن, حالىق قۋاتىن جارقىن بولاشاق ءۇشىن جۇمىلدىرۋعا شاقىرادى.
قالا اكىمىنىڭ ورىنباسارى سەرىك سەيدۋمانوۆ, باسقا دا ءسويلەۋشىلەر رەسپۋبليكامىزدا جانە الماتىدا قول جەتكەن تابىستار نۇرسۇلتان نازارباەۆتىڭ جوعارى بەدەلىنىڭ ارقاسىندا مۇمكىن بولىپ وتىرعاندىعىن مالىمدەدى.
اكتيۆ جينالىسىندا الماتىلىقتار مەملەكەت باسشىسىنىڭ سەنىمىن اقتاپ, العا قويىلعان مەجەلەردى ابىرويمەن ەڭسەرەتىنىنە سەنىم ءبىلدىردى.
قورعانبەك امانجول.
الماتى.