مارەدەن وتكەن كوكبايراق
شىعىسقازاقستاندىق شاڭعىشىلار وكسانا ياتسكايا مەن ەلەنا كولومينا تاعى دا سولداتسايداعى ستاديوندا ازيادانىڭ كەشەگى كۇنىنىڭ قاھارماندارىنا اينالدى. ءسويتىپ, ەركىن ءمانەردەگى كوماندالىق سپرينت ەستافەتاسىنىڭ جەڭىمپازدارى اتاندى. ءبىزدىڭ بۇل ەكى قىزىمىز ءىس جۇزىندە جارىستىڭ ونە بويىندا كوش باستاپ, قورىتىندىسىندا 20 ءمينوت 39,9 سەكونت ۋاقىت كورسەتتى. قازاق ەلىنىڭ مەرەيىن اسىرعان جەڭىمپازدار ەكىنشى ورىن العان قىتاي قۇراماسىنىڭ وكىلدەرى مان داندان مەن لي حونسيۋدان مارەگە 36,5 سەكونت بۇرىن جەتتى. جۇلدەگەرلەر ءۇشتىگىن جاپوندىق قىزدار وموري ناوكو مەن كوباياسي يۋكي تۇيىندەدى. ولار قازاقستاندىق شاڭعى شەبەرلەرىنەن 54,5 سەكونتكە قالىپ قويعان ەدى.
وسىلايشا كەشە تاڭەرتەڭ وكسانا مەن ەلەنا قازاقستان كومانداسىنىڭ قورجىنىنا ءوتىپ جاتقان ويىنداردىڭ 7-ءشى التىن مەدالىن سالدى.
ازيادانىڭ شىتتاي جاڭا چەمپيونى و.ياتسكايا مارە سىزىعىن قيعاننان كەيىن قۋانىش ۇستىندە ءوز اسەرىن ءبولىسىپ: «ءبىز بۇگىن قۇرمەت تۇعىرىنىڭ ەڭ بيىك ساتىسىنا كوتەرىلۋگە قۇلشىنىپ شىققانبىز. ويتكەنى, بۇل التىن بىزگە وتە قاجەت بولدى. التىن مەدالداردىڭ كوبىرەك بولعانى جالپىكوماندالىق ەسەپتە ەلىمىزدى الدىڭعى شەپكە شىعارادى ەمەس پە؟ ءبىز ءۇشىن ەڭ زور ابىروي دا سول. جارىس جولىنىڭ ونە بويىندا «وكسانا, وكسانا!» دەپ ايعايلاعان جانكۇيەرلەردىڭ داۋىستارى ماعان دەم بەرىپ, جەڭىسكە جەتەلەگەندەي بولدى», – دەدى.
ال ەرلەر اراسىنداعى كوماندالىق سپرينتتە شىعىسقازاقستاندىق الەكسەي پولتورانين مەن اقمولالىق نيكولاي چەبوتكو ەرلەدى. ولار التى اينالىمدى ءبىر-بىرىمەن الماسا, 22 ءمينوت 46,2 سەكونت ۋاقىتتا ەركىن مانەردە ەكپىندەي ءجۇرىپ ءوتىپ, ايقىن باسىمدىلىقپەن جەڭىسكە جەتتى. ءتىپتى, قازاقستاندىقتاردىڭ باسىمدىعى ايتارلىقتاي بولعاندىعى سونشالىق, اقىرعى التىنشى اينالىمدى اياقتاعان كەزدە چەبوتكو قولىنا العان كوكبايراقتى جەلبىرەتە جۇگىرىپ مارە قيدى. مۇنىڭ ءوزى وسىناۋ ازيادانىڭ ۇمىتىلماس جارقىن ءساتى بولىپ جادىمىزدا ساقتالارى انىق.
كۇمىس مەدال كۇنشىعىستان كەلگەن جاپونيا وكىلدەرى كيمۋرا ماسايا مەن نارۋسە نوبۋدىڭ ەنشىلەرىنە ءتيدى. ولار جەڭىمپازداردان 13 سەكونت كەيىن قالدى. جەڭىس تۇعىرىنىڭ ءۇشىنشى ساتىسىنا وڭتۇستىككورەيالىق شاڭعى سپورتى شەبەرلەرى پاك بيۋن دجۋ جانە يۋن ەۋ ميۋن كوتەرىلدى.
التىننان القا تاققان جىگىتتەرىمىز ءوز قۋانىشتارىن جاسىرا المادى. ولار ءار اينالىمعا بار كۇش-جىگەرلەرىن سالىپ, شاڭعى جولىنىڭ ءورى مەن ەڭىسىندە, قيىن بۇرىلىستارىندا شەبەرلىكتەرىنەن جازباي, وزدەرىنىڭ شىن ءجۇيرىك شاڭعىشى ەكەندەرىن دالەلدەدى. ءسويتىپ, العاشقى بىرەر اينالىمدا بۇلارمەن تالاسىپ, تايتالاسىپ باققان جاپوندىقتاردى ەكىنشى ورىندى قاناعات تۇتۋعا ءماجبۇر ەتتى. ويتكەنى, شەبەرلىك پەن تاجىريبە, كۇش-قايرات پەن جىلدامدىق, جالىن-جىگەر مەن وتانشىلدىق سەزىم ءبىزدىڭ الەكسەي مەن نيكولايدىڭ بويىندا مولىراق بولىپ شىقتى.
* * *
قازاقستان بياتلونشىسى الەكساندر چەرۆياكوۆتىڭ 10 شاقىرىمدىق سپرينتەرلىك بىرىنشىلىكتەگى ويدا جوق جەردەگى عاجاپ جەڭىسىن سپورت جۇرتشىلىعى «فانتاستيكا!» دەپ باعالاۋعا پەيىل ءبىلدىردى. ونىڭ سەبەبىنە كەلەر بولساق, ءبىزدىڭ سپورتشىمىز ەكىنشى نىسانا كوزدەۋ شەبىندە ەكى رەت ءمۇلت كەتتى. سودان كەيىن ۋاقىتشا جارىس كوشىن باستاپ كەلە جاتقان قىتايلىق رەن لوننان 12,1 سەكونت ۋاقىت كەمدىگىمەن ءۇشىنشى بولىپ جولعا شىقتى. مىنە, ناق وسى كەزدە الەكساندر تاباندىلىق پەن قايسارلىقتىڭ, شىمىرلىق مەن شىنىققاندىقتىڭ ۇلگىسىن كورسەتە ءبىلدى. ساتسىزدىككە مويىماي, قايتا جىگەرلەنىپ شيرىعا تۇسكەن ول جارىس جولىندا بار كۇش-قايراتىن سارقا جۇمساپ, جەڭىس ءۇشىن سوڭعى ساتكە دەيىن ايانباي كۇرەستى. جۇرت ەكى ايىپ اينالىمىن موينىنا بايلاعان ا.چەرۆياكوۆتىڭ جالپى ءجۇلدەلى ورىن الاتىندىعىنان بۇل كەزدە كۇدەرلەرىن ابدەن ءۇزىپ قويعان بولاتىن. بىراق مارەگە جاقىنداعان شاقتا نايزاعايداي جارقىلداعان الەكساندر چەرۆياكوۆ التىن مەدال الۋدان دامەلى بولىپ تۇرعان قىتاي سپورتشىسىن 6,3 سەكونتكە ارتتا قالدىردى. ءسويتىپ, جوقتان بار جاساعان, بولماستى بولدىرعان, ۋىستان شىعىپ كەتىپ بارا جاتقان جەڭىستى وزىمىزگە قايتارىپ العان جەڭىمپازدىڭ ءناتيجەسى 29 ءمينوت 1,6 سەكونت بولدى. مارە سىزىعىن قيىپ وتكەن سوڭ قالجىراپ بار كۇشىنەن ايىرىلعان الەكساندر قۇلاپ جىعىلسا دا, جانكۇيەرلەر سونشالىقتى كۇتكەن جەڭىستى ءوز ەلىنە سىيلاپ ۇلگەردى.
ءبىر ايتا كەتەرلىگى, كۇمىس مەدالدى ولجالاعان قىتايلىق رەن لون بياتلوندىق جارىستىڭ ەكى اتىس شەبىندە ءبىر دە رەت ءمۇلت كەتپەگەن بىردەن-ءبىر سپورتشى بولدى. اتىس شەبىندە ءبىر عانا رەت ءمۇدىرگەن جاپون بياتلونشىسى ناگاي دجۋندجي قولا مەدالدى ولجالادى. بياتلون جارىسىنا قاتىسقان قازاقستاندىق تاعى ءبىر سپورتشى دياس كەنەشەۆ جۇيرىك جۇگىرەتىن ءتاۋىر شاڭعىشى بولعانىمەن, ءاسىرەسە, ەكىنشى اتىس شەبىندە وكىنىشتى قاتەلىكتەرگە جول بەرىپ الدى.
قورعانبەك امانجول.
الماتى.
_______
سۋرەتتەردى تۇسىرگەن بەرسىنبەك سارسەنوۆ.