كوكشەتاۋ. 26 مامىر. اقمولا وبلىسىنىڭ ورتالىعىندا جەر رەفورماسى جونىندەگى قوعامدىق كەڭەستىڭ كەڭەيتىلگەن وتىرىسى بولدى. بۇل تۋرالى وبلىستىق اكىمدىك ءباسپاسوز قىزمەتىنىڭ دەرەگىنە سۇيەنگەن egemen.kz ءتىلشىسى حابارلادى.
وتىرىسقا وبلىس قالالارى مەن اۋداندارىنداعى قوعامدىق كەڭەستەردىڭ توراعالارى, ساياسي پارتيالاردىڭ, قوعامدىق جانە ەتنومادەني بىرلەستىكتەردىڭ وكىلدەرى, شارۋا قوجالىقتارىنىڭ جەتەكشىلەرى, اۋداندار اكىمدەرىنىڭ اۋىل شارۋاشىلىعى جونىندەگى ورىنباسارلارى, كوكشەتاۋ قالاسىنىڭ قۇرمەتتى ازاماتتارى جانە بۇقارالىق اقپارات قۇرالدارىنىڭ وكىلدەرى, بارلىعى 120 ادام قاتىستى.
وبلىستىق قوعامدىق كەڭەستىڭ توراعاسى دۋلات نۇرمولدين اتالمىش شارانىڭ قوعامداستىقتار وكىلدەرىنىڭ پىكىرلەرىن تىڭداۋعا, كەلىپ تۇسكەن پىكىرلەر مەن ۇسىنىستاردى سارالاۋعا سونداي-اق ولاردى جەر رەفورماسى تۋرالى رەسپۋبليكالىق كوميسسياعا جولداۋعا ارنالعان ديالوگ الاڭى بولۋعا ءتيىس ەكەنىن اتاپ ءوتتى.
وبلىستىق جەر قاتىناستارى باسقارماسىنىڭ باسشىسى الماگۇل قادىرالينا جەر تۋرالى زاڭناماعا ەنگىزىلگەلى تۇرعان قازىرگى وزگەرىستەر مەن تولىقتىرۋلار تۋرالى حابارلاما جاسادى.
جيىندا سونداي-اق وبلىستىق ءماسليحاتتىڭ دەپۋتاتى, جەر رەفورماسى تۋرالى رەسپۋبليكالىق كەڭەستىڭ مۇشەسى نارتاي ىسقاقوۆ كوميسسياعا قانداي ۇسىنىستاردىڭ تۇسكەنى جونىندە كەڭىنەن اڭگىمەلەپ بەردى. كورشى مەملەكەتتەرمەن شەكتەسەتىن اۋماقتارداعى جەرلەردى جالعا بەرۋگە بولمايتىنى تۋرالى ويدى «اق جول» دەموكراتيالىق پارتياسىن وبلىستىق فيليالىنىڭ توراعاسى سەرىك بەيسەمباەۆ جەتكىزدى. وتىرىستا بۇدان باسقا «قازاق ءتىلى مەن مادەنيەتى» وبلىستىق قوعامدىق بىرلەستىگىنىڭ توراعاسى مەيرامبەك كيىكوۆ, كوكشەتاۋ قالاسىنىڭ قۇرمەتتى ازاماتى, دەنساۋلىق ءىسىنىڭ ۇزدىگى بولات ءجانادىلوۆ, ەكونوميكا پروفەسسورى قاسىمحان قۇسايىنوۆ, وبلىستىق قوعامدىق كەڭەستىڭ مۇشەسى بولات جۇپىنوۆ جانە باسقالار ءوز ويلارىن ورتاعا سالدى.
قورىتىندىدا دۋلات نۇرمولدين كەزدەسۋدە ايتىلعان ماسەلەلەر مەن ۇسىنىستاردىڭ ءبارى ەسكەرۋسىز قالمايتىنىن, ولاردىڭ رەسپۋبليكالىق كوميسسياعا جولداناتىنىن ايتتى.
باقبەرگەن امالبەك.
دەرەك: اقمولا وبلىستىق اكىمدىگىنىڭ ءباسپاسوز قىزمەتى.