• RUB:
    6.68
  • USD:
    520.93
  • EUR:
    609.07
باستى سايتقا ءوتۋ
01 اقپان, 2011

«ەگەمەننىڭ» ەڭبەك تورىسى

590 رەت
كورسەتىلدى

ارقالى اقىن, بەلگىلى جازۋشى, اۋدارماشى ءابىراش ءجامىش ۇلى سىر ءوڭىرىنىڭ تۋماسى. 1945 جىلى ورتا مەكتەپتى ءتامامداپ, قازاق مەملەكەتتىك ۋنيۆەرسيتەتىنىڭ جۋر­­نا­ليستيكا فاكۋلتەتىنەن ءدارىس العان ونىڭ ەڭبەك جولى قاتارداعى قالامگەرلىكتەن باستاۋ الادى. بەرتىن كەلە ول «سوتسياليستىك قازاقستان», «قازاق ادەبيەتى» گازەتتەرىندە باسشىلىق قىزمەتتەر اتقارعان. بارىنشا قاراپايىم­دىلىعىمەن اقىرىن ءجۇرىپ, انىق باسقان ابەكەڭ مەرزىمدى باسپا­سوزدىڭ تىنىمسىز تىرشىلىگىندە جۇرسە دە, قولىنان قالامى ءتۇس­پەگەن جان. «اراي», «كۇمىس كىرپىكتەر», «دالا شۇعىلاسى», «ءتوس­كەي» جانە ت.ب. جۇرەك جازبالارى سونىڭ ناتيجەسى. ايتا كەتۋ كەرەك, ءابىراش ءجامىش ۇلى اۋدارما سالا­سىندا دا از ەڭبەكتەنگەن جوق. ول اتى الەمگە ايگىلى اقىن ا.س.پۋش­كيننىڭ جىر جولدارىن قالىڭ قازاق وقىرماندارىنا تارتۋ ەتتى. سونداي-اق تاتار, وزبەك, ارميان, تاجىك اقىندارى شىعارمالارى­نىڭ شىرايىن كىرگىزۋمەن قاتار شىعىستىڭ ۇلى شايىرلارى حافيز بەن فيزۋلي عازالدارىن, قوجا احمەت ياساۋي حيكمەتىن قازاق وقىر­ماندارى جاتا-جاستانا وقي­تىن دۇنيەگە اينالدىردى. قازاق حالقى قاشاندا ارتىندا ولمەيتۇعىن ءسوز قالدىرعان قالام­گەرلەرىن اسا قۇرمەت تۇتىپ, قا­دىرلەگەن. ەسىمى سىر ايماعىنا عانا ەمەس, ەلىمىزگە ەتەنە تانىمال ابە­كەڭدى كەيىنگى ۇرپاقتارىنا ۇلا­عات ەتۋدى مۇرات تۇتقان اۋىل تۇر­عىندارىنىڭ اقىنعا جاساپ جاتقان قۇرمەتىنە ەل ريزا. ءوزى تۋعان شىركەيلى اۋىلىنىڭ تۇر­عىن­دارىنىڭ سۇرانىسىنا سايكەس, 1996 جىلى قر مينيسترلەر كابينەتىنىڭ شەشىمىمەن شىركەيلى اۋىلىنداعى №129 ورتا مەكتەپكە ءابىراش جامىشەۆتىڭ ەسىمى بەرىلدى. ءابىراش بەينەسىن ءماڭ­گىلىككە مۇرا ەتۋدى, ياعني تۇعىرعا قوندىرۋدى كوزدەگەن اۋىل تۇرعىن­دارىنىڭ تاعى ءبىر باستاماسى ءوز شە­شىمىن تاپتى. ياعني, اۋىل تۇر­عىندارى اسى­عا كۇتكەن ءا.ءجامى­شەۆ­تىڭ تۇ­عىر­­عا قونعان تۇلعاسى ءوز اتىن­داعى مەكتەپ الدىنان ورىن تەپتى. اقىن ەسكەرتكىشىنىڭ اشىلۋ سالتا­ناتىنا قاتىسۋشىلار ءابىراش ءجا­مى­شەۆ جايلى جۇرەكجاردى لەبىزدەرىن جەتكىزدى. العاشقى ءسوز ال­عان اۋدان اكىمى سۇلتانبەك ءتاۋىپ­باەۆ: – ابەكەڭنىڭ ءوزى ولسە دە, ونىڭ ارتىندا قالعان ءسوزى ولمەيدى. سودان دا ونىڭ جازبالارى ءبىزدىڭ ءجۇ­رە­گىمىزدە ماڭگىلىككە جازىلىپ قال­عان, – دەگەن ول اۋىل تۇر­عىن­دا­رىنا, ونىڭ ىشىندە قارىمدى قا­لام­گەردىڭ ءمۇسىنىن تۇعىرعا قون­دى­رۋ­عا قارجىلاي دەمەۋشىلىك جا­ساعان «ءمادي قاجى» جشس دي­رەك­تورى, اۋداندىق ءماسليحات دە­پۋتاتى ابباس كامالاتدينگە ريزا­شىلىق سەزىمىن ءبىلدىردى. سالتا­نات­تى شارادا وبلىس اكىمىنىڭ كەڭەسشىسى ەرجان ءۋايىس, ۇلاعاتتى ۇستاز قاناتبەك ابىلقاسىموۆ, دەمەۋشى ابباس كامالاتدين, ءا.ءجا­مىش ۇلىنىڭ قىزى گۇلنار ءابى­راش­قىزى, اۋىل ارداگەرلەرى ءسوز سويلەپ, تۇعىرلى تۇل­عاعا تاعزىم جاسادى. ەركىن ءابىل. قىزىلوردا وبلىسى. سىرداريا اۋدانى.