اتالمىش سەريال بۇرىنعىلاردان وزگەرەك. قازاق حاندىعىنىڭ تاعدىرىن بەينەلەيتىن كوپتەن كۇتكەن سەريال وسى كۇزدە كورەرمەن نازارىنا ۇسىنىلادى. قازىرگى تاڭدا ءتۇسىرىلىم اياقتالۋعا جاقىن. بۇل تۋرالى مادەنيەت جانە سپورت ءمينيسترى ارىستانبەك مۇحامەدي ۇلى 2015 جىلدىڭ قورىتىندىسى بويىنشا حالىققا ەسەپ بەرگەن كەزىندە مالىمدەدى.
ءمينيستردىڭ ايتۋىنشا, ۇكىمەت تاپسىرماسىمەن قازىر, وتاندىق كينويندۋستريانى دامىتۋدىڭ تۇجىرىمداماسى دايىندالىپ جاتىر. تاعى ءبىر قۋانىشتى جاڭالىق, بيىلعى كۇزدە جاڭا ءبىر تۋىندى – «28 پانفيلوۆشىلار» ءفيلمى جارىققا شىعادى. ماسكەۋ تۇبىنە تاياپ قالعان 18 نەمىس تانكىسىن توقتاتقان داڭقتى 316-شى اتقىشتار ديۆيزياسى تۋرالى فيلم رەسەيدىڭ مادەنيەت مينيسترلىگىمەن بىرلەسىپ دايىندالعان. – كينو مادەنيەتىن جاڭا ءبىر ساتىعا كوتەرەتىن ۋاقىت كەلدى.
بۇل ءۇشىن قۇقىقتىق, سالالىق وزگەرىستەر قاجەت. قازىرگى تاڭدا «قازاقفيلم» سياقتى كينوستۋديامىز بار. الايدا, ءبىز سول ستۋديانىڭ بار مۇمكىنشىلىگىن پايدالانا الماي كەلەمىز. مۇنىڭ بارلىعىن ءبىر جۇيەگە كەلتىرۋ قاجەت. ەڭ ءبىرىنشى, كوركەم فيلمدەردى كەڭ پروكاتقا شىعاتىنداي ەتۋ قاجەت. سەبەبى, جاقسى فيلمدەرىمىز تۇسىرىلگەنىمەن, ولاردى حالىقارالىق دەڭگەيدە كورەرمەنگە ۇسىناتىن تەتىكتەر جوق, – دەدى ارىستانبەك مۇحامەدي ۇلى.
ايان ءابدۋالي,
«ەگەمەن قازاقستان»