مەملەكەت باسشىسى نۇرسۇلتان نازارباەۆ باس پروكۋرور جاقىپ اسانوۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋ بارىسىندا ج.اسانوۆ مەملەكەت باسشىسىنا پروكۋراتۋرا ورگاندارىنىڭ قازىرگى جانە پەرسپەكتيۆالى جوسپارلارى تۋرالى, سونداي-اق, ەلدەگى قۇقىق ءتارتىبى مەن زاڭدىلىق احۋالى تۋرالى باياندادى.
قازاقستان پرەزيدەنتى سوڭعى جىلدارى قابىلدانعان زاڭدار قىلمىسقا قاتىستى ساياساتتى ىزگىلەندىرۋگە, ەكونوميكالىق قىلمىستار ءۇشىن بالاما جازالاۋ شارالارىن ەنگىزۋگە باعىتتالعانىن اتاپ ءوتتى.
نۇرسۇلتان نازارباەۆ پروكۋراتۋرا ورگاندارىنا قوعام مەن مەملەكەت ءومىرىنىڭ بارلىق سالاسىندا, اسىرەسە, حالىق ءۇشىن الەۋمەتتىك ماڭىزدى ماسەلەلەردى شەشۋ اياسىندا ازاماتتاردىڭ قۇقىقتارىن قامتاماسىز ەتۋ تۇرعىسىنان ماڭىزدى مىندەت جۇكتەلگەنىن دە ايتتى.
مەملەكەت باسشىسى كەزدەسۋ قورىتىندىسى بويىنشا بىرقاتار ناقتى تاپسىرما بەردى.
سۋرەتتەردى تۇسىرگەندەر
س.بوندارەنكو, ب.وتارباەۆ