استانا. 22 مامىر. كەشە تۇندە رەسەيدىڭ ەكى قالاسىندا ءوتىپ جاتقان حوككەيدەن الەمنىڭ 80-ءشى چەمپيوناتىنىڭ جارتىلاي فينالدىق ويىندارى وينالدى. ماسكەۋدە سايىس قىزدىرعان ەكى ماتچتىڭ قورىتىندىسىندا فينليانديا مەن كانادانىڭ فينالعا شىققانى بەلگىلى بولدى. بۇل تۋرالى «ر-سپورت» اقپارىنا سۇيەنگەن egemen.kz ءتىلشىسى حابارلادى.
وسىلايشا بۇدان 9 جىل بۇرىن ماسكەۋدە وتكەن الەم چەمپيوناتىنىڭ فينالدىق جۇبى تاعى قايتالاندى. رەسەي استاناسىندا وسىنىڭ الدىندا, 2007 جىلى جالاۋ كوتەرگەن جاھاندىق جارىستا دا فينليانديا مەن كانادا التىن مەدال ءۇشىن كۇش سىناسقان ەدى.
بۇل جولعى جارتىلاي فينالدا فينليانديا رەسەيدى 3:1 ەتىپ ۇتسا, كانادا اسا تارتىستى وتكەن ماتچتا اقش-تى 4:3 ەسەبىمەن تىزە بۇكتىردى.
مۇز ايدىنىنا الدىمەن رەسەي جانە فينليانديا قۇرامالارى شىقتى. رەسەيلىكتەر وسىمەن قاتارىنان ءۇشىنشى چەمپيونات مەدال جەڭىپ الۋعا قادام باستى. وتكەن جىلى ولار پراگادا كۇمىس جۇلدەنى قاناعات تۇتسا, بۇرناعى جىلى مينسكىدە التىن جۇلدەگەر اتانعان ەدى.
رەسەي – فينليانديا 1:3 (1:0, 0:3, 0:0)
گولدار: سەرگەي شيروكوۆ 1:0 (3-مينۋت), سەباستيان احو 1:1 (26), يۋسي يوكينەن 1:2 (36), سەباستيان احو 1:3 (39).
ويىندا ءبىرىنشى بولىپ رەسەيلىكتەر ەسەپ اشتى. ونى 3-مينۋتتا سەرگەي شيروكوۆ ءتۇسىردى. بىراق وسىدان كەيىن چەمپيونات يەلەرى بار تىزگىننەن ايرىلىپ قالدى. بيىلعى چەمپيوناتتى وتە جاقسى قارقىندا, جوعارى دەيگەيدە وتكىزگەن, ءوز توبىندا ءتىپتى كانادانىڭ ءوزىن 4:0 ەتىپ ۇتىپ كەتكەن سۋومي بۇل بىرىنشىلىككە ءوزىنىڭ وتە جاقسى دايىندىقپەن كەلگەنىن وسى كەزدەسۋدە دە بايقاتتى. فيندەر ويىننىڭ تاعدىرىن ەكىنشى كەزەڭدە ءبىرجولا شەشىپ كەتتى. ءسويتىپ, فينالعا ەمىن-ەركىن ءوتتى.
ەندى اقتىق ايقاستا فينليانديا جەڭىس تۇعىرىنان كورىنسە, بۇرىن-سوڭدى بولماعان ءبىر رەكوردقا قول جەتكىزگەر ەدى. ازىرگە الەمنىڭ جاستار اراسىنداعى دا, ەرەسەكتەر اراسىنداعى دا چەمپيوناتتارىن ۇتىپ العان بىردە-ءبىر ەل جوق. مىنە, فيندەر سول رەكوردقا جاقىن تۇر. وسىنىڭ الدىندا ولاردىڭ جاستار كومانداسى الەمدە توپ جارعان. سول قۇراما ساپىندا ونەر كورسەتكەن ميككو رانتانەن (19-دا), سەباستيان احو (18) جانە پاتريك لاينە (18) سەكىلدى جاس حوككەيشىلەر ەندى ەرەسەكتەر جارىسىنا دا قاتىسىپ جاتىر. سونىڭ ىشىندە احو رەسەيمەن ويىندا شەشۋشى تۇلعا بولا ءبىلدى.
ءتۇننىڭ جارىمى اۋا الاڭعا امەريكا قۇرلىعىنىڭ ەكى كومانداسى بەتتەدى. اقش قۇراماسى وسى جولى ۇتىلىپ, 3-ورىن ءۇشىن تالاستا قارسىلاسىنان باسىم تۇسسە, سوڭعى 4 جىلدا ءۇشىنشى رەت قولا جۇلدەگەر اتانار ەدى. بۇعان دەيىن بۇل قۇراما 50 جىل ىشىندە ەكى-اق رەت قولا مەدال جەڭىپ العان ەكەن. ال فينالدا حوككەيدىڭ يەلەرى جەڭىسكە جەتە قويعان جاعدايدا ونىڭ كاپيتانى كوري پەرري وليمپيادا مەن الەم چەمپيوناتىندا جەڭىسكە جەتكەن, سونداي-اق ستەنلي كۋبوگىن ۇتقان ويىنشىلارعا ارنالعان «ءۇش دۇركىن التىن» كلۋبىنىڭ 28-ءشى مۇشەسى اتانادى.
كانادا – اقش 4:3 (2:0, 1:3, 1:0)
گولدار: برەندەن گاللاحەر 1:0 (9-مينۋت), برەد مارشان 2:0 (19), وستون مەتتيۋس 2:1 (22), داۆيد ۆاورۆسكي 2:2 (24), تايلەر موتت 2:3 (29), دەرەك براسسار 3:3 (36), رايان ەلليس 4:3 (42).
ماتچ بىردەن ۇيەڭكى جاپىراعى ەلى قۇراماسىنىڭ قاۋىرت شابۋىلىمەن باستالدى. سوعان وراي ولار تەز العا دا شىعا ءبىلدى. ءبىرىنشى كەزەڭنىڭ سوڭىندا ەسەپ سوندىقتان 2:0 بولىپ, كانادالىقتاردىڭ پايداسىنا شەشىلىپ تۇردى. بىراق اقش-تىڭ قۇرامىندا 6 ستۋدەنت وينايتىن جاس كومانداسى بۇعان اسا كوپ قايمىعا قويعان جوق. ولار ەكىنشى كەزەڭدە باس-اياعى 7 مينۋتتىڭ ىشىندە ەكى شايبا ايىرماشىلىعىن جاۋىپ, العا دا شىعىپ كەتتى. بۇعان كانادالىقتار سوڭعى ساتتەردە ءبىر شايبامەن جاۋاپ قايتارىپ, كەزەڭدى تەڭگە جەتكىزدى. ولار سوڭعى كەزەڭنىڭ باسىندا تاعى ءبىر شايبا سالىپ, تارازى باسىن وزدەرىنە قاراي ءبىرجولا اۋدارىپ الدى.
سونىمەن, بۇگىن الەم چەمپيوناتى ءوزىنىڭ مارەسىنە جەتەدى. الدىمەن رەسەي جانە اقش قۇرامالارى قولا مەدالدىڭ تاعدىرىن شەشىپ الادى. سودان كەيىن التىن مەدال ءۇشىن كۇرەسكە فينليانديا مەن كانادا كىرىسىپ كەتەدى.
ەستەرىڭىزگە سالا كەتەيىك, بۇل چەمپيوناتقا وتكەن جىلى ءبىرىنشى ديۆيزيوندا ۇتقاننان كەيىن قازاقستان قۇراماسى دا قاتىسقان ەدى. ءبىزدىڭ حوككەيشىلەر شۆەيتساريامەن وتكىزگەن ءبىرىنشى ماۋسىماشار ماتچتا 3:2 ەسەبىمەن بۋلليتتە جەڭىسكە جەتتى دە, قالعان ويىنداردىڭ بارىندە پىرداي بولىپ ۇتىلىپ شىقتى. ناتيجەسىندە ماسكەۋدە تۋ تىككەن ا توبىندا 2 ۇپايمەن ەڭ سوڭعى ورىندا قالىپ, توپتاپ شىعا المادى. سونىمەن بىرگە بىردەن ءبىرىنشى ديۆيزيونعا ءتۇسىپ قالعان بولاتىن.
تالعات رايىمبەك.
دەرەك: ر-سپورت, فوتو: سوۆەتسكي سپورت.