كوكشەتاۋ. 21 مامىر. اقمولا وبلىسىنىڭ ورتالىعىندا پوليتسەيلەرگە شابۋىل جاسادى دەگەن كۇدىكپەن ەكى ادام ۇستالدى. بۇل تۋرالى وبلىستىق ىشكى ىستەر دەپارتامەنتى ءباسپاسوز قىزمەتىنىڭ دەرەگىنە سۇيەنگەن egemen.kz ءتىلشىسى حابارلادى.
كۇدىكتىلەر ۇيىمداسقان قىلمىسقا قارسى كۇرەس باسقارماسىنىڭ جەدەل ۋاكىلدەرىنە شابۋىل جاسادى دەلىنىپ وتىر. ولار قارا-كوك ءتۇستى ۆاز-21014 ماركالى اۆتوماشينامەن كەلىپ, قۇقىق قورعاۋ قىزمەتكەرلەرىنىڭ بىرىنە پىشاق ۇرعان. سودان سوڭ وقيعا ورنىنان قاشىپ كەتكەن.
ۇستالعاندار كوكشەتاۋ قالاسىنىڭ 1984 جانە 1985 جىلدارى تۋعان تۇرعىندارى بولىپ شىقتى. ولاردىڭ ءبىرى بۇرىن سوتتى بولعان. وسىعان دەيىن بۇل ەكەۋى جاسىرىن قارۋ جاساۋمەن اينالىسىپ كەلگەن.
«سىرتتان ۆيدەوباقىلاۋ كامەرالارىنىڭ كومەگىمەن اتالمىش ۋچاسكەدەن وسى ۋاقىتتا وتكەن كولىكتەردىڭ ءبارى مۇقيات تەكسەرىلدى. وسىنىڭ ناتيجەسىندە كۇدىكتىلەردىڭ قىلمىس جاساپ بولعاننان كەيىن وقيعا ورنىنان بوي جاسىرىپ, كولىكتەرىن بۋراباي اۋدانىنا, تاۋدىڭ اراسىنا اپارىپ, جاسىرىپ قويعانى انىقتالدى. سول جاقتان وزدەرى قالاعا قايتقان. قازىر كۇدىكتىلەر قولعا ءتۇستى. ولار ۋاقىتشا ۇستاۋ وقشاۋلاعىشىندا وتىر», - دەدى وبلىستىق ىشكى ىستەر دەپارتامەنتىنىڭ ءباسپاسوز حاتشىسى گۇلنار پينچۋك.
باقبەرگەن امالبەك.
دەرەك: اقمولا وبلىستىق ىشكى ىستەر دەپارتامەنتىنىڭ ءباسپاسوز قىزمەتى.