تالدىقورعان. 21 مامىر. كەشە الماتى وبلىسىندا مادەنيەت سالاسىنىڭ ۇزدىك مەكەمەلەرى مەن جەكەلەگەن قىزمەتكەرلەرى انىقتالىپ, وبلىس اكىمىنىڭ سىيلىقتارى مەن ماراپاتتارىنا يە بولدى. بۇل تۋرالى وبلىستىق اكىمدىك ءباسپاسوز قىزمەتىنىڭ دەرەگىنە سۇيەنگەن egemen.kz ءتىلشىسى حابارلادى.
ول مادەنيەت جانە ونەر قىزمەتكەرلەرىنىڭ كاسىبي مەرەكەسىنە وراي ءى.جانسۇگىروۆ اتىنداعى مادەنيەت سارايىندا وتكەن جيىندا جاريا ەتىلدى. سالتاناتتى جيىندى ءسوز سويلەپ اشقان وبلىس اكىمى اماندىق باتالوۆ وڭىردەگى مادەنيەت جانە ونەر ۇجىمدارىنىڭ جەتكەن جەتىستىكتەرىنە, ەل تاۋەلسىزدىگىنىڭ 25 جىلىندا اتقارىلعان يگى ىستەردى ناسيحاتتاۋداعى ونەر ادامدارىنىڭ سىڭىرگەن ەڭبەگىنە جوعارى باعا بەردى. ايماق باسشىسى سونىمەن قاتار, وبلىس مادەنيەت قىزمەتكەرلەرى الدارىندا تۇرعان مىندەتتەرگە توقتالىپ, سالانى دامىتۋعا ەرەكشە نازار اۋدارىلىپ وتىرعانىن اتاپ ءوتتى. مادەنيەت نىساندارىنا كۇردەلى جوندەۋ جۇرگىزىلىپ, جاڭا نىسانداردىڭ قۇرىلىستارى باستالۋدا, شتات ءبولىنىپ, ماتەريالدىق-تەحنيكالىق بازالارى نىعايتىلىپ كەلەدى.
ا. باتالوۆ ءسوزىنىڭ سوڭىندا سالا قىزمەتكەرلەرىن ءتول مەرەكەلەرىمەن قۇتتىقتاپ, ولارعا الداعى ۋاقىتتاردا دا ەل يگىلىگى جولىندا جەمىستى قىزمەت ەتە بەرۋگە تىلەكتەستىك ءبىلدىردى. سودان كەيىن ءوز ءىسىنىڭ ۇزدىكتەرىنە مادەنيەت جانە سپورت مينيسترلىگىنىڭ, وبلىس اكىمدىگىنىڭ قۇرمەت گراموتالارىن تابىس ەتتى. وسى ورايدا 16 اتالىم بويىنشا ۇزدىك تانىلعان وزاتتارعا اقشالاي-زاتتاي سىيلىقتار تاپسىردى.
م. تىنىشباەۆ اتىنداعى تاريحي-ولكەتانۋ مۇراجايىنىڭ «ۇزدىك مادەنيەت مەكەمەسى» بولىپ تانىلدى. وسى ءۇشىن مەكەمەگە اۆتوكولىك بەرىلدى. بۇدان ءارى ءتۇرلى نوميناتسيالار بويىنشا ۇزدىك اتانعاندار ماراپاتتالدى. اتاپ ايتقاندا, ب. ريموۆا اتىنداعى وبلىستىق دراما تەاترىنىڭ ءارتىسى بازارباي توقىمتاەۆ «ۇزدىك اكتەر», وسى ۇجىمنىڭ اكتريساسى تولعاناي اعلاموۆا «ۇزدىك اكتريسا», ءسۇيىنباي اتىنداعى وبلىستىق فيلارمونيانىڭ ءانشىسى باقبەرگەن اسقاربەكوۆ «ۇزدىك ءانشى», وسى ونەر ۇجىمىنىڭ مۇشەلەرى التىناي كۇرىشباەۆا «ۇزدىك ءبيشى», الما كىشىكباەۆا «ۇزدىك مۋزىكالىق اسپاپتا ورىنداۋشى» نوميناتسيالارىنا يە بولدى.
ۇزدىكتەر قاتارىنان سونداي-اق ىلە اۋداندىق جانە جامبىل اۋدانى, قاراكەستەك اۋىلدىق كىتاپحانالارى, پانفيلوۆ اۋدانىنداعى «ايجانقىز» حالىقتىق بي ءانسامبلى كورىندى. جەڭىمپازدارعا ديپلوم مەن 100 مىڭ تەڭگەنىڭ سەرتيفيكاتى تابىس ەتىلدى. بۇدان بولەك, «ءسۇيىنباي سازى» فولكلورلىق-ەتنوگرافيالىق انسامبلىنە جاڭا اۆتوبۋستىڭ كىلتى بەرىلدى.
مەرەكەلىك كەشتە مادەنيەت سالاسىنىڭ ارداگەرلەرى اتىنان نادەجدا لۋشنيكوۆا, سالا قىزمەتكەرلەرى اتىنان الاكول اۋداندىق مادەنيەت جانە تىلدەردى دامىتۋ ءبولىمىنىڭ باسشىسى ارنۇر سادىقوۆ ءسوز سويلەدى.
مەرەكە قورىتىندىسى ونەر شەبەرلەرىنىڭ كونتسەرتىنە ۇلاستى.
نۇربول الدىباەۆ.
دەرەك, فوتو: الماتى وبلىستىق اكىمدىگىنىڭ ءباسپاسوز قىزمەتى.