استانا. 21 مامىر. بۇگىن استاناداعى ۇلتتىق مۋزەيدە جەر رەفورماسى جونىندەگى كوميسسيانىڭ كەزەكتى وتىرىس ءوتتى. بۇل تۋرالى egemen.kz ءتىلشىسى حابارلادى.
القالى جيىندا پرەمەر-ءمينيستردىڭ ءبىرىنشى ورىنباسارى, كوميسسيا توراعاسى باقىتجان ساعىنتاەۆ ساعات 10:00-دە باستادى. ول بۇگىنگى جيىنعا 67 ادامنىڭ قاتىسىپ وتىرعانىن, باسقوسۋدىڭ نەگىزگى باعىتى جەردى ساتۋ ماسەلەسىن جان-جاقتى تالداپ, ۇسىنىس-پىكىرلەر ايتىلاتىنىن جەتكىزدى.
«كوميسسيانىڭ نەگىزگى ماقساتى – جەر ماسەلەسى جونىندە ەگجەي-تەگجەيلى تالداۋ جاساپ پارلامەنت قاراۋىنا ءوز ۇسىنىسىمىزدى جىبەرۋ. ءبىز ۋاكىلەتتى ورگان ەمەسپىز. ناقتى شەشىم شىعارىپ, ءمور باساتىن. سوندىقتان ءبىز حالىققا پايدالى جاعىن قاراستىرايىق», – دەدى كوميسسيا توراعاسى. باقىتجان ساعىنتاەۆ سونداي-اق, كوميسسيا مۇشەلەرىن ءتورت توپقا ءبولىپ, جان-جاقتى جۇمىس جاساۋ كەرەكتىگىن ايتتى. ول ءۇشىن توپ جەتەكشىلەرىن سايلاۋ كەرەك.
سونىمەن, «ەكونوميكالىق» توپقا اقىلبەك كۇرىشباەۆ, «قۇقىقتىق» توپقا مۇحتار تايجان, «اقپاراتتىق» توپقا مۇرات ابەنوۆ جانە «ۇيىمداستىرۋ» جونىندەگى توپقا دوس كوشىم جەتەكشى بولىپ تاعايىندالدى.
مۇنان كەيىن كوميسسيا قۇرامى رەت-رەتىمەن ءسوز الىپ, جەر ساتۋ ماسەلەسىنە قاتىستى ءوز ويلارىن ايتىپ, ۇسىنىستارىن ءبىلدىردى.
«جەردى جالعا بەرۋ كەزىندە شەتەلدىكتەرگە شەكتەۋ قويۋ كەرەك. ەڭ ءبىرىنشى كەزەكتە ەل ازاماتتارىنا بەرۋ كەرەك دەپ ەسەپتەيمىن», – دەدى كوميسسيا مۇشەسى جەكسەنباي دۇيسەباەۆ. ال بەرىك ابىعاليدىڭ پىكىرىنشە, جەر جەكە مەنشىككە بەرىلۋى كەرەك.
«جەردى جەكەگە بەرۋگە كەلىسەمىن. الايدا, جايلىمدىق جانە شابىندىق جەرلەر جەكەگە ءوتىپ كەتپەۋى ءتيىس. ويتكەنى, مال شارۋاشىلىعىمەن اينالىساتىندارعا وتە قيىن» – دەدى ول.
جالپى, كوميسسيا وتىرىسىندا كوپتەگەن پىكىرلەر ايتىلدى. ءبىرى جەردى جالعا بەرۋ كەرەك, وتاندىق كاسىپكەرلەردىڭ وڭ جامباسىنا كەلەتىندەي جاعداي جاساۋ قاجەت دەسە, كەيبىرى ءوزىمىزدىڭ ازاماتتارعا تەگىن ۇلەستىرۋ كەرەك دەگەن پىكىرلەر ءبىلدىردى. جيىندا ءسوز العانداردىڭ اراسىندا جەردى شەتەلدىك ينۆەستورلار ارقىلى يگەرۋ كەرەك دەپ سانايتىندار دا بولدى.
وتىرىس قورىتىندىسىندا توراعا ايتىلعان ۇسىنىستار مەن پىكىرلەر جان-جاقتى تالداپ-تارازىلاتىنىن مالىمدەدى. سونىمەن قاتار, باقىتجان ساعىنتاەۆ كەلەسى وتىرىس 28 مامىر كۇنى وتەتىنىن حابارلادى.
«ءبىز كەلەسى جيىندا وسى ايتىلعانداردى ابدەن سۇزگىدەن وتكىزىپ, ءوز ۇسىنىستارىمىزدى ناقتىلاپ الامىز. سوسىن بارىپ ەلگە شىعامىز. وندا اعايىن-جۇرت كۇتىپ وتىر. ءبىزدىڭ نە ايتاتىنىمىزىدى كۇتىپ ءجۇر. سول ءۇشىن دايىندالىپ الۋىمىز كەرەك» – دەدى توراعا.
تالعات رايىمبەك.
دەرەك: egemen.kz.
فوتو: ورىنباي بالمۇراتوۆ.