تۇرىك پرەزيدەنتى ەردوعاننىڭ قىزى سيۋمەيە تۇرمىسقا شىقتى

استانا. 15 مامىر. كەشە تۇركيا پرەزيدەنتى رەدجەپ تايپ ەردوعاننىڭ قىزى سيۋمەيە ەردوعان تۇرمىسقا شىقتى. بۇل تۋرالى Hürriyet اقپارىنا سىلتەمە جاساعان ras.kz مالىمەتىنە سۇيەنگەن egemen.kz ءتىلشىسى حابارلادى. تۇرىك پرەزيدەنتىنىڭ قىزى سيۋمەيە ەردوعان مەن سەلجۋك بايراكتاردىڭ ۇيلەنۋ تويلارى ىستانبۋلداعى ياحيا كەمال اتىنداعى مادەنيەت ورتالىعىندا ءوتتى. وسى جەردە جاستاردىڭ نەكەلەرى قيىلدى. ونىڭ بارىسىندا «ادام تۋعان كەزدە جىلايدى, بۇل جىلاۋدىڭ سوڭعىسى بولسىن» دەگەن ءان شىرقالدى. شارانىڭ سوڭىندا رەدجەپ ەردوعان قاتتى تولقىپ ءسوز سويلەپ, ۇيلەنىپ جاتقان قىزى مەن كۇيەۋ بالاسىن قۇتتىقتادى. نەكە قيۋ سالتىنا ىستانبۋل قالاسىنىڭ مەرى كادير تورباش, ەلدىڭ بۇرىنعى پرەزيدەنتى ابدۋللا گۋل مەن پرەمەر-مينيستر احمەت داۆۋتوگلۋ قاتىستى. تۇركيا پرەزيدەنتىنىڭ كۇيەۋ بالاسى پيلوتسىز ۇشاتىن اپپاراتتار ءوندىرۋ جونىندەگى ينجەنەر, بەلگىلى كاسىپكەر بولىپ شىقتى. پاكىستاننىڭ The News گازەتىنىڭ مالىمەتىنشە, تۇرىك پرەزيدەنتى قىزىنىڭ ۇيلەنۋ تويىنا ازەربايجان پرەزيدەنتى يلحام اليەۆ, پاكىستان پرەمەر-ءمينيسترى ناۆاز شەريف پەن ونىڭ ءىنىسى شاحباز شەريف, كاتار شەيحى تاميم بين حاماد ءال-تاني جانە باسقالار شاقىرىلعان. ىستانبۇلدا پرەزيدەنت قىزىنىڭ ۇيلەنۋ تويىنا بايلانىستى قاۋىپسىزدىكتىڭ بارلىق شارالارى قاراستىرىلعان. قاۋىپسىزدىكتى قامتاماسىز ەتۋ ءۇشىن ءتىپتى سپۋتنيكتەر دە ىسكە قوسىلىپتى. تالعات رايىمبەك. دەرەك, فوتو: Hürriyet.