ءۇندىستاندا 72 جاستاعى ايەل العاشقى ءسابيىن بوساندى

استانا. 11 مامىر. ءۇندىستاننىڭ حاريانا شتاتىندا 72 جاستاعى دالدجينجەر كاۋر ەسىمدى ايەل ادام العاش رەت انا اتاندى. بۇل تۋرالى ريا «نوۆوستي» اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. تۇرمىس قۇرعانىنا 46 جىل بولسا دا, بالا كوتەرە الماعان. ءۇمىتىن ۇزبەگەن 79 جاستاعى كۇيەۋى موحيندەر سينگ گيللا ەكەۋى سوڭعى ەكى جىل بويى اتالعان شتاتتاعى كلينيكالاردىڭ بىرىندە ۇزبەي ەم قابىلداعان. France-Press اگەنتتىگىنىڭ حابارلاۋىنشا, وتباسىنداعى قۋانىشتى جاعداي 19 ءساۋىر كۇنى بولعان. الايدا, بۇل مالىمەت وتكەن سەيسەنبىدە, ياعني 10 مامىر كۇنى بەلگىلى بولدى. «جاراتقان مەنىڭ ۇزبەي جاساعان دۇعالارىمدى قابىل الدى. ەندى مەن تولىققاندى وتباسىدا ءومىر ءسۇرىپ جۇرگەنىمدى سەزىنۋدەمىن. بويىمداعى كۇش-قۋاتىم ءالى قايتقان جوق, بالامدى ءوزىم باعىپ-قاعامىن. جۇبايىم دا قامقور ادام, ماعان بارىنشا كومەك كورسەتىپ ءجۇر. ءسابيىمىزدىڭ ەسىمىن ارماان (Armaan) دەپ قويدىق», – دەيدى دالدجينجەر كاۋر. National Fertility and Test Tube مەديتسينالىق ورتالىعىنىڭ حابارلاۋىنشا, ول جاساندى جولمەن ۇرىقتاندىرۋ (ەكستروكورپورالدىق ۇرىقتاندىرۋ) ارقىلى ءسابي كوتەرگەن. ايتا كەتەيىك, بۇل ءۇندىستاندا بولعان العاشقى جاعداي ەمەس. وسىدان 8 جىل بۇرىن, ياعني 2008 جىلى ۋتتار-پرادەش شتاتىنىڭ تۇرعىنى دا 72 جاسىندا ەگىز بالانى بوسانعان. ايان ءابدۋالي. دەرەك: ريا «نوۆوستي». فوتو: inform.kz.