الەمدەگى ەڭ ۇلكەن گاۋھارتاس 63 ملن. دوللارعا ساتىلدى

استانا. 10 مامىر. كانادانىڭ Lucara Diamond Corporation كەن ءوندىرۋ كومپانياسى دۇنيەجۇزىندەگى ەڭ ۇلكەن گاۋھاردى 63 ميلليون دوللارعا ساتتى. بۇل تۋرالى inform.kz-كە سىلتەمە جاساعان egemen.kz ءتىلشىسى حابارلادى. وسىعان دەيىن وڭدەلمەگەن كۇيى ساتىلعان اسىل تاستاردىڭ ىشىندە بۇل الماز ەڭ قوماقتى باعاعا ساتىلعانداردىڭ ءبىرى بولدى. Lucara Diamond كومپانياسىنىڭ كەنشىلەرى گاۋھاردى وتكەن جىلى بوتسۆانە مەملەكەتىندە تاپقان بولاتىن. BBC-ءدىڭ حابارلاۋىنشا, الداعى ماۋسىم ايىندا ءدال وسى ەلدە تابىلعان تاعى ءبىر ءىرى تاس ارنايى ۇيىمداستىرىلاتىن اۋكتسيوندا ساتىلادى. ايتا كەتەيىك, وسى جىلدىڭ ءساۋىر ايىندا گونكونگتا سيرەك كەزدەسەتىن كوگىلدىر ءتۇستى گاۋھار 32 ميلليون دوللارعا ساتىلعان بولاتىن. سالماعى 10,1 كاراتتى قۇرايتىن قۇندى زاتتى زەرگەرلەر اق التىننان دايىندالعان جۇزىككە ورنالاستىرىپ, اينالاسىن شاعىن ەكى المازبەن ساندەگەن. ايان ءابدۋالي. دەرەك, فوتو: inform.kz.