قاستەرلى مەيرامداردىڭ ءبىرى

قىزىلوردادا ۇلى جەڭىس مەرەكەسىنە ارنالعان «قاھارمان ۇرپاققا مىڭ تاعزىم» اتتى ءراسىم ءوتتى. شاراعا ۇلى وتان سوعىسى جانە تىل ارداگەرلەرى باستاعان سىر جۇرتشىلىعى قاتىستى. الدىمەن قان مايداننان ورالماعان بوزداقتار ءبىر مينۋت ۇنسىزدىكپەن ەسكە الىندى. سودان سوڭ جينالعان قاۋىم «ماڭگىلىك الاۋعا» گۇل شوقتارىن قويدى. ەكىنشى دۇنيەجۇزىلىك سوعىسقا سىر وڭىرىنەن 70 مىڭ سارباز اتتانسا, سونىڭ تەڭ جارتىسىنا جۋىعى ەلگە ورالعان جوق. قازىر ايماقتا 64 مايدانگەر بار. – ۇلى وتان سوعىسى وتانى مەن تاريحي ادىلدىك ءۇشىن جان قيۋعا دايىن قاھارمان حالقىمىزدى كۇللى الەمگە تانىتقان قاسيەتتى مايدان بولسا, ۇلى جەڭىس – سىزدەردىڭ ەرلىكتەرىڭىزدى ماڭگىلىك ەل جادىندا ساقتاۋعا ارنالعان ەڭ قاستەرلى مەرەكە. بۇل جەڭىس بولماعاندا, بۇگىنگى تاۋەلسىز قا­­زاقستان دا بولماس ەدى. سون­دىقتان, دا ۇلى جەڭىسكە ولشەۋ­­سىز ۇلەس قوسقان ءاربىر اردا­­گەرگە كەيىنگى ۇرپاق اتىنان مىڭ مارتە العىس ايتامىز. بار­شا­ڭىزدى ۇلى جەڭىس كۇنىمەن شىن جۇرەكتەن قۇتتىقتايمىن,– دەدى وبلىس اكىمى قىرىمبەك كوشەرباەۆ. مۇنان سوڭ «جاسامپاز جاساق» شەرۋى ءوتتى. بۇل جوبا بيىل قاتا­رى­­نان ءتورتىنشى جىل جۇزەگە اسىپ وتىر. ەرىكتى ازاماتتاردان قۇ­رالعان شەرۋ ساپىندا ۇلى وتان سو­عىسىندا شەيىت بولعان, ەلگە ورالعان, سەمەي-نەۆادا, چەر­نو­بىل اپاتى, اۋعان سوعىسى اردا­گەرلەرىنىڭ ۇرپاقتارى, باتىر انالار, جاستار بار. بۇل – بۇگىنگى ۇر­پاق زۇلمات سوعىستا كەۋدەسىن وق پەن وتقا توسقان جاۋىنگەر بابالارىن ۇمىت­پايتىندىعىنىڭ ءبىر كورىنىسى. ەرجان بايتىلەس, «ەگەمەن قازاقستان» قىزىلوردا