باتىر ءمۇسىنى

وسكەمەندە جەڭىس كۇنى قارساڭىندا كەڭەس وداعىنىڭ باتىرى ىزعۇتتى ايتىقوۆقا بيۋست قويىلدى. وبلىس ورتا­لىعىنىڭ مەتاللۋرگتەر كەنتىندەگى باتىر اتىنداعى كوشەنىڭ جيەگىنەن ورىن تەپكەن ەسكەرتكىشتى جاڭاباي ءاشىموۆ باستاعان جەرلەستەرى ورناتتى. ەسكەرتكىشتىڭ تۇساۋكەسەرىنە جي­نال­عان جۇرت حاس باتىردىڭ بەينەسى وي­دا­عىداي سومدالعانىن جەتكىزدى. جەرگىلىكتى اقىن نۇرتاي تىلەۋجان ۇلى: «...ءوس­كەمەننىڭ شىعىسىنان كىرگەن ەلدى, قا­زاقتىڭ حاس باتىرى قارسى الادى» دەپ جىردان شاشۋ شاشتى. راسىندا, ءوزىنىڭ 22 جىل قىسقا عۇمىرىندا وشپەس ەرلىگىمەن تاريحتا قالعان ءباھادۇردىڭ ەسكەرتكىشى قالاعا كىرگەن جولاۋشىنىڭ نازارىن بىردەن اۋداراتىن وڭتايلى جەرگە قويىلعانىن ايتا كەتكەن ءلازىم. كەڭەس وداعى باتىرىنىڭ اتىندا وسىعان دەيىن شىعىس ءوڭىرىنىڭ ۇلان اۋدانىندا ءبىر مەكتەپ پەن ءبىر اۋىل بار ەدى. ەندى وبلىس ورتالىعىنان كوشە بەرىلىپ, ەسكەرتكىشى ورناتىلدى. «ەر ەسىمى – ەل ەسىندە» دەگەن وسى. ۇلان اۋدانى اقساقالدار كەڭەسىنىڭ ءتور­اعاسى راشيدبەك مۇحامەدجان ەس­كەرت­­كىشتى قۇيۋعا كومەك قولىن سوزعان اتىم­­تاي ازاماتتارعا العىسىن ايتتى. اشىلۋ سالتاناتىنا جينالعان جۇرت­شى­لىق باتىر رۋحىنا تاعزىم ەتىپ, ەسكەرت­كىشتەرگە گۇل شوقتارىن قوي­دى. ءى.ايتىقوۆ اتىنداعى مەكتەپتىڭ ورەن­دەرى باتىر اتالارىنا ارناعان جىرلارىن وقىپ, ەل رۋحىن كوتەرەر اسقاق اندەرىن شىرقادى. دۋمان اناش, «ەگەمەن قازاقستان» وسكەمەن