مۇز ايدىنىنداعى باسەكەلەر

كۇن ساناپ قارقىن الىپ, قىزا ءتۇستى 6 مامىردا رەسەيدىڭ ماسكەۋ جانە سانكت-پەتەربۋرگ قالالارىندا حوككەيدەن كەزەكتى 80-ءشى الەم چەمپيوناتى باستالدى. وعان قاتىسۋشى 16 كوماندا ەكى توپقا ءبولىنىپ, ەكى قالادا ىرىكتەۋ ءتۋرنيرى ويىندارىن وتكىزىپ جاتىر. بۇلاردىڭ قاتارىندا بىلتىر ءبىرىنشى ديۆيز­يون­نان شىققان قازاقستان حوككەيشىلەر جاساعى دا بار. جاھاندىق جارىس العاشقى كۇندەردەن سەنساتسيالار مەن كۇت­پەگەن وقيعالارعا تولى بولدى. ول ماسكەۋدە شۆەتسيا مەن لاتۆيا, سانكت-پەتەربۋرگتە اقش پەن كا­نادا قۇرامالارى اراسىنداعى كەزدەسۋلەرمەن باستالدى. العاشقى سەنساتسيا بۇلاردىڭ ءبىرىنشى جۇبىندا تىركەلدى. اسا تارتىستى وتكەن ماتچتىڭ نەگىزگى ۋاقىتىندا جەڭىمپازدار انىقتالمادى. لا­تىش­تار وزدەرىنەن قاشاننان ءبىر يىعى جوعارى تۇرىپ كەلگەن شۆەدتەرگە وۆەر-تايمدا عانا ەسە جىبەرىپ الدى. ەسەپ – 1:2. ال امەريكانىڭ ەكى قۇراماسى اراسىنداعى ماتچ­تا «ۇيەڭكى جاپىراعى ەلىنىڭ» حوككەيشىلەرى تۇستىكتەگى ەجەلگى قارسىلاستارىن 5:1 ەتىپ تالقانداپ شىقتى. مۇنى دا سەنساتسياعا بالاۋعا بولاتىن شىعار. بۇل كۇنى سونداي-اق, الاڭ يەلەرى – رەسەي تەرمە جاماعاتى كۇتپەگەن جەردەن چەحيادان 0:3 بولىپ ۇتىلىپ قالدى. ال فينليانديانىڭ بەلارۋستى 6:2 ەتىپ ۇتۋىن ماماندار قالىپتى جاعداي رەتىندە قابىلدادى. كەلەسى كۇنى سەنساتسيانى قازاق­ستاننىڭ مۇزدى ايدىن سەرىلەرى ومىرگە اكەلدى. ولار وزدەرىنەن دەسى باسىم, نەگىزىنەن ءتۇبى كانادالىق ويىنشىلاردان قۇرالعان شۆەيتساريا كومانداسىمەن نەگىزگى ۋاقىتتا دا, قوسىمشا كەزەڭدە دە 2:2 ەسەبىمەن تەڭ ءتۇستى. بۇدان كەيىن بۋلليتتە نايدجەل دوۋستىڭ مەرگەندىگى ارقاسىندا قارسىلاسىنان جەڭىستى سوڭعى مەزەتتە تارتىپ اكەتتى. بىزدەن العاشقى شايبانى رومان ساۆچەنكو ءوز الاڭى بەتتە, كوك سىزىقتىڭ بويىندا ۇرىپ, قارسى قاقپانىڭ «توعىزدىعىنا» ءتۇسىرۋ ارقىلى سوعىپ, ەسەپتى تەڭەستىردى. ەكىنشى شايبانى رومان ستارچەنكو سالدى. بۇل كۇنى تاعى ءبىر سەنساتسيانى چەحيادان بۋلليت قورىتىندىسىندا 3:4 بولىپ ۇتىلعان لاتۆيا جاسادى. ال دانيا نورۆەگيانى 3:0, سلوۆاكيا ۆەنگريانى 4:1, اقش بەلارۋستى 6:3 ەتىپ ۇتتى. فران­تسيا گەرمانيانى بۋلليتتەن 3:2 ەسەبىمەن ءسۇرىندىردى. مامىردىڭ 8-ءى كۇنى قازاقستان قۇراماسى رەسەي كومانداسىمەن ءۇشىنشى كەزەڭنىڭ باسىنا دەيىن 4:4 بولىپ تەڭ ءتۇسىپ تۇرىپ, تاعى ءبىر سەنساتسيا جاساپ كەتە جازدادى. تەك سودان كەيىن كوپشىلىك بولىپ ويناعان ساتتەرىن ءتيىمدى پايدالانىپ كەتكەن الاڭ يەلەرى 6:4 (3:3, 1:0, 2:1) ەسە­بىمەن جەڭىپ كەتتى. جەڭىمپازدار ساپىنان ەۆگەني دادونوۆ (7-مينۋت), رومان ليۋبيموۆ (10, 49), سەرگەي موزياكين (12) جانە انتون بەلوۆ (39, 44) مەرگەندىكتەرىمەن كوزگە تۇسسە, قازاقستاندىقتار قاتارىندا داستين بويد (9), رومان ستارچەنكو (10), ەۆگەني رىمارەۆ (20), ماكسيم سەميونوۆ (41) گول سالدى. ال قالعان ويىندار مىناداي ناتيجەلەر اكەلدى: نورۆەگيا – شۆەيتساريا 4:3 وت, شۆەتسيا – دانيا 5:2, ۆەنگريا – كانادا 1:7, فينليانديا – گەرمانيا 5:1, فرانتسيا – سلوۆاكيا 1:5. وسى ويىنداردان كەيىن ا توبىندا شۆەتسيا, ۆ توبىندا كانادا 6 ۇپايمەن توپ باستادى. رۋسلان يگىلىك