كەشە استاناداعى «وتان قورعاۋشى» مونۋمەنتىنە ۇلى وتان سوعىسىنداعى جەڭىستىڭ 71 جىلدىعىنا وراي سالتاناتتى گۇل قويۋ ءراسىمى ءوتتى. سالتاناتتى شاراعا پرەمەر-مينيستر كارىم ءماسىموۆ, پارلامەنت سەناتىنىڭ توراعاسى قاسىم-جومارت توقاەۆ, پارلامەنت ءماجىلىسىنىڭ توراعاسى باقتىقوجا ىزمۇحامبەتوۆ, مەملەكەتتىك حاتشى گۇلشارا ابدىقالىقوۆا, قورعانىس ءمينيسترى يمانعالي تاسماعامبەتوۆ, سوعىس جانە ەڭبەك ارداگەرلەرى, مەملەكەتتىك ورگان باسشىلارى, سونداي-اق, ۇلى وتان سوعىسىندا قازا بولعان قازاقستاندىقتاردى ەسكە الۋ ءۇشىن جينالعان ەلوردا تۇرعىندارى مەن قوناقتارى قاتىستى.
«وتان قورعاۋشى» ەسكەرتكىشىنە گۇل قويۋ ءراسىمى مەملەكەتتىك كۇزەت قىزمەتى پرەزيدەنتتىك وركەسترىنىڭ ورىنداۋىنداعى مۋزىكالىق شىعارمالارمەن سۇيەمەلدەندى. سوعىس كەزىندە جانە ودان كەيىن دە حالىققا جىگەر بەرىپ, رۋحاني ازىق بولعان اۋەزدى تۋىندىلاردىڭ ورىندالۋى شاراعا قاتىسۋشىلاردى ەرەكشە كۇيگە بولەدى. جينالعان قاۋىمنىڭ جۇزىنەن قۋانىش پەن تولقىنىس, ەرەكشە ماقتانىش سەزىمى انىق بايقالىپ تۇردى. وسى كۇنى «وتان قورعاۋشى» ەسكەرتكىشىنە 1 500-گە جۋىق گۇل شوقتارى قويىلدى.
مەرەكەلىك شاراعا قۇرمەتتى قوناق رەتىندە شاقىرىلعان ۇلى وتان سوعىسىنىڭ 45 ارداگەرىنە ەرەكشە ءىلتيپات كورسەتىلدى. وكىنىشكە قاراي, جىل وتكەن سايىن ەلىمىزدە سوعىسقا قاتىسقان, تىلداعى ەڭبەگىمەن ۇلى جەڭىستى جاقىنداتقان ارداقتى ارداگەرلەر قاتارى ازايىپ كەلەدى. وسى ورايدا, جۇرتشىلىق, اسىرەسە, جاستار جاعى قاھارمان ارداگەرلەردىڭ دەنىنە ساۋلىق تىلەپ, ولاردىڭ ەرلىگى ءماڭگىلىككە ەل جادىندا قالاتىنىن جەتكىزدى.
مەرەكەلىك جيىن بارىسىندا ءانۇران شىرقالىپ, قان مايداندا ەرلىكپەن قازا بولعان وتانداستارىمىزدىڭ رۋحىنا تاعزىم جاسالىپ, ءبىر مينۋت ۇنسىزدىك جاريالاندى.
گۇل قويۋ ءراسىمى اياقتالعاننان كەيىن شاراعا قاتىسقان قوناقتار اسكەري ءتۇرلى تاعامداردان ءدام تاتتى. ال جەڭىمپاز ارداگەرلەر ارنايى شاتىرلاردا دەمالىپ, جەرگىلىكتى اكىمدىك تاراپىنان سىيلىقتار الدى.
«بارلىعى جاقسى ءوتىپ جاتىر. شاتىردىڭ ىشىندە ارداگەرلەرگە ارنايى كونتسەرتتىك باعدارلاما ۇيىمداستىردىق. قالالىق ارداگەرلەر كەڭەسىنىڭ توراعاسى ءبىزدىڭ جۇمىسىمىزدىڭ باسى-قاسىندا ءجۇردى. ۇستەل باسىندا ىزگى, جىلى تىلەكتەر ايتىلدى. بارلىعىن قۇتتىقتادىق. ولار جاقسىلاپ تاماقتاندى. مايدان دالاسىندا وزدەرىنە قۋات بەرگەن سارباز بوتقاسىنان ءدام تاتتى. ارنايى سىيلىقتار ۇلەستىردىك. 11 شاتىر تىگىلدى. ارداگەرلەردى قالاي كۇتەتىنىمىز تۋرالى ارنايى جوسپار قۇرىلعان بولاتىن», – دەدى جيىندى ۇيىمداستىرۋشىلار.
– بارشاڭىزدى جەڭىس مەرەكەسىمەن قۇتتىقتايمىن! زور دەنساۋلىق تىلەيمىن, امان بولىڭدار, بالالارىم! اسپانىمىز اشىق, بەيبىتشىلىك بولسىن! حالقىمىز بەن ەلىمىزگە يگىلىك پەن ءوسىپ-ءوركەندەۋ تىلەيمىن! – دەدى ۇلى وتان سوعىسىنىڭ ارداگەرى ءراتباي مەدەتبەكوۆ.
ال ۇوس ارداگەرى ءازىمباي مايرىقوۆ: «ەلىمىز تىنىش بولسىن. حالقىمىز امان بولسىن. حالىقپەن بىرگە ءبارىڭ دە امان بولىڭدار. سوعىس بولماسىن. جاستار وسە بەرسىن!» – دەپ اق باتاسىن بەردى. سول سياقتى, ءبىر توپ تىل ارداگەرى بۇگىنگى مەرەكەنىڭ ءمان-ماڭىزىن, سونداي-اق, ەلىمىزدىڭ ءوسىپ-وركەندەۋى ىشكى بىرلىك پەن ىنتىماقتىڭ بولۋىنا تىكەلەي بايلانىستى ەكەنىن ايتا كەلىپ, بۇگىنگى قازاقستاننىڭ ۇستانعان باعىتىنان جاڭىلماۋىن تىلەدى.
ۇلى وتان سوعىسىنداعى جەڭىستىڭ 71 جىلدىعىن مەرەكەلەۋ قارساڭىندا جەرگىلىكتى اتقارۋشى ورگاندار ارداگەرلەردى قولداۋ, ولارعا قۇرمەت كورسەتۋ شارالارىنىڭ اۋقىمدى جوسپارىن ىسكە اسىرۋدا. 2016 جىلعا ارنالعان جەرگىلىكتى بيۋدجەتتە ارداگەرلەرگە ءبىر جولعى ماتەريالدىق كومەك كورسەتۋ ءۇشىن 2,6 ملرد. تەڭگە قاراستىرىلعان. ال استانالىق ارداگەرلەر بيىل 1 ملن. تەڭگەدەن الادى دەپ شەشىم قابىلدانعان. بۇل – رەسپۋبليكا بويىنشا ەڭ جوعارى ماتەريالدىق كومەك.
ەسكە سالا كەتەيىك, 2016 جىلدىڭ 1 ساۋىرىندەگى مالىمەتكە سۇيەنسەك, قازاقستاندا ۇوس-قا قاتىسقان 3668 ارداگەر, 146 342 تىل ارداگەرى, 220 لەنينگراد قورشاۋىن كورگەن ازامات, 548 كونتسلاگەر تۇتقىنى تۇرادى.
جولدىباي بازار,
«ەگەمەن قازاقستان»
سۋرەتتەردى تۇسىرگەن
ەرلان وماروۆ
