كەشە, 9 مامىر كۇنى ۇلى وتان سوعىسىنداعى جەڭىستىڭ 71 جىلدىعىن مەرەكەلەۋ اياسىندا استانا جانە الماتى قالالارىندا «ماڭگىلىك پولك» اكتسياسى بولىپ ءوتتى. شەرۋ تۇرىندە قانات جايعان شاراعا ۇلى جەڭىسكە تاعزىم ەتەتىن, سول تەڭدەسسىز جەڭىستى اكەلگەن اتالارىنىڭ وشپەس ەرلىكتەرىنە باس يەتىن جۇرتشىلىق قاتىستى.
«ماڭگىلىك پولك» – سوڭعى جىلدارى ۇلى جەڭىس كۇنى وتكىزىلىپ كەلە جاتقان حالىقارالىق قوعامدىق مارش-اكتسيا. ونىڭ بارىسىندا كولوننا ءتۇزىپ ءجۇرۋشىلەر قولدارىنا ۇلى وتان سوعىسىنا قاتىسقان جاقىندارىنىڭ سۋرەتتەرى مەن ترانسپورانتتار الىپ شىعىپ, ولاردىڭ رۋحتارىن ۇلىقتاي تۇسەدى. اكتسيا ءبىرىنشى رەت 2007 جىلى رەسەيدىڭ تۇمەن قالاسىندا قولعا الىنعان. سودان كەيىن بۇكىل ەلدى قامتىپ, بارا-بارا الەمنىڭ كوپتەگەن ەلدەرىنە تاراي باستادى. 2013 جىلى وسى ساپتان قازاقستاننىڭ سەمەي, ەكىباستۇز قالالارى دا تابىلدى. ال 2015 جىلى جاھاننىڭ 15 ەلى اكتسيانى قولداۋشىلار قاتارىنا قوسىلدى. ولاردىڭ لەگىندە رەسەيدەن بولەك, قازاقستان, اۆستريا, اقش, ازەربايجان, بەلارۋس, گەرمانيا, يزرايل, يرلانديا, قىرعىزستان, موڭعوليا, نورۆەگيا, ۋكراينا, ەستونيا سەكىلدى ەلدەر بولدى. بيىل بۇل ءتىزىم اۆستراليا, ارگەنتينا, بولگاريا, گرۋزيا, يتاليا, كانادا, كاتار, مالتا, وار, سەربيا, شۆەيتساريا, ۇلىبريتانيا مەملەكەتتەرىمەن تولىقتى. جالپى سانى 26-عا جەتكەن ەلدەردەگى 600 قالادا وتەتىن اكتسياعا 24 ملن. ادام اتسالىستى.
استانا قالاسىندا بيىل وتكەن شارا 5 مىڭ ادامنىڭ باسىن بىرىكتىردى. وتكەن جىلى ءبىرىنشى رەت قولعا الىنعان اكتسيا 1,5 مىڭ ادامنىڭ ساپىن تۇزگەن ەدى. بۇل ۇلاعاتتى ۇرپاقتار ساپىن ەلوردا تۇرعىندارى مەن قوناقتار وزدەرىنىڭ وتباسى مۇشەلەرىمەن, بالالارىمەن بىرگە قۇرادى. قاتىسۋشىلار «Astana mall» ساۋدا, ويىن-ساۋىق ورتالىعىنان شىعىپ, تاۋەلسىزدىك داڭعىلى بويىمەن ءجۇرىپ وتىرىپ, «وتان قورعاۋشى» مونۋمەنتىنە دەيىنگى 1,8 شاقىرىم جەردى كوكتەي ءوتتى. ولار قولدارىنا ۇلى وتان سوعىسىندا قازا بولعان اتالارى مەن اكەلەرىنىڭ پورترەتتەرىن ۇستاپ, سوعىس جىلدارىنداعى اندەردى شىرقادى. كەۋدەلەرىن ماقتانىش پەن ورلىك سەزىمى كەرنەگەن شەرۋشىلەر سوڭىنان اتالمىش مونۋمەنتكە گۇل شوقتارىن قويدى.
داڭقتى ەرلەردىڭ رۋحتارىنا تاعزىم ەتۋگە ارنالعان شاپاعاتتى شارادان الماتى قالاسى دا تىس قالعان جوق. بۇل كۇنى وڭتۇستىك استانادا سورعالاپ جاڭبىر جاۋىپ تۇردى. بىراق اكتسياعا جالىن قوسۋشى ءارتۇرلى جاستاعى جۇرتشىلىق وكىلدەرى نوسەردىڭ توپەۋىنە قاراماستان, «استانا» الاڭىنا ءبىر كىسىدەي ۇيىمشىلدىقپەن جينالدى. سول جەردەن شەرۋشىلەر لەگى 28-ءشى پانفيلوۆشىلار اتىنداعى پاركىنە دەيىن جاياۋ ءجۇرىپ جەتتى. وسى القاپتا ولار «ماڭگىلىك الاۋعا» گۇل شوقتارىن اپارىپ قويدى.
مۇندا دا شەرۋ بويىندا جۇرتشىلىق قولدارىنا ۇلى وتان سوعىسىنا قاتىسقان اكەلەرى مەن اتالارىنىڭ, تۋعان-تۋىستارىنىڭ پورترەتتەرىن زور ماقتانىشپەن جوعارى ۇستاپ كەلە جاتتى. اۋعان سوعىسى ارداگەرلەرىنىڭ ۇيلەستىرۋشى كەڭەسىنىڭ توراعاسى مۇرات ابدىشۇكىروۆ شارانىڭ بيىل وسىمەن ءۇشىنشى رەت ءوتكىزىلىپ وتىرعانىن اتاپ ءوتتى. ول سونداي-اق قاتىسۋشىلار قاتارى جىل ساناپ كوبەيىپ كەلە جاتقانىنا دا نازار اۋداردى. «بۇگىن بۇل جەرگە ۇلى وتان سوعىسىنا قاتىسىپ, وتان ءۇشىن قان توككەن اتا-بابالارىمىزدىڭ سانالى ۇرپاقتارى كەلدى. اكتسيا اعا ۇرپاقتىڭ ەرلىكتەرى ەشقاشان ۇمىتىلمايتىنىن, بۇگىنگى ۇرپاقتىڭ بەيبىتشىلىكتى, قازاقستانىڭ ءوسىپ-وركەندەۋىن قالايتىنىن ءبىلدىردى», – دەدى ول.
«مىنا سۋرەتتە مەنىڭ اتام بەينەلەنگەن. ول سوعىسقا العاشقى كۇندەردەن الىنىپ, 1945 جىلعى جەڭىسكە دەيىن شايقاسقان. ول بەيبىت زاماندا ومىردەن ءوتتى. مەن بۇل اكتسياعا ەكىنشى رەت قاتىسىپ جاتىرمىن. ادامداردى وسىلايشا وتانعا دەگەن زور سۇيىسپەنشىلىك سەزىمنىڭ بىرىكتىرىپ جاتقانى مەنى ەرەكشە قۋانتادى», – دەدى الماتىلىق الەكساندر سوكولوۆ.
ۇيىمداستىرۋشىلاردىڭ ايتۋلارىنشا, الماتى قالاسىندا اكتسياعا قاتىسۋشىلار سانى 20 مىڭعا جەتكەن.
رۋسلان يگىلىك
