جەڭىس كۇنگى جەڭىس

قانات يسلام قارسىلاسىن 6-راۋندتا نوكاۋتقا جىبەردى كەشە, 9 مامىر كۇنى تاڭەرتەڭ اقش-تىڭ فلوريدا شتاتىن­داعى لەيكلەند قالاسىندا جەرلەسىمىز قانات يسلام كولۋمبيالىق قارسىلاسى حۋان دە انحەلدى 6-راۋند­تا تەحنيكالىق نوكاۋتپەن جەڭدى. ءسويتىپ, 21 ۇرى­سىنىڭ ءبارىن جەڭىسپەن اياقتاۋعا قول جەتكىزدى. ول وسىمەن ءوزىنىڭ 18-ءشى شايقاسىن مەرزىمىنەن بۇرىن ءبىتىرىپ وتىر. قازاقستاندىق سپورتسۇيەر قاۋىم جەرلەستەرىنىڭ بۇل جەكپە-جەگىن كوپتەن اسىعا كۇتتى. مۇ­نىڭ ءجونى بار. كاسىپقويلار رين­گىنە اۋىسقانىنا 3,5 جىلداي ۋاقىت بولعان قانات ءالى ەليتالى توپقا جاقىنداي الماي كە­لە جاتىر ەدى. ال Premier Boxing Champions بوكس شوۋى شەڭبەرىندە ۇيىمداستىرىلعان بۇل ايقاس سو­عان قا­­­راي ناقتى قادام باستىردى. وسى جولى قا­نات­تىڭ كا­سىپ­قويلار توبىنداعى شايقاسى «قازاق­ستان» تە­لە­ار­­ناسىنىڭ تىكەلەي ەفيرىنەن ءبىرىنشى رەت كورسەتىلدى. جەكپە-جەك الدىندا ماقساتى ءوزىنىڭ جانكۇيەرلەرىن قۋاندىرۋ بولعانىن جەتكىزگەن ءبىزدىڭ بوكس­شى سالعاننان سول مەجەگە جەتۋ ءۇشىن بارىن سالدى. بىراق بۇل بىردەن وڭاي بولا كەتكەن جوق. بۇعان, شاماسى, قارسىلاسىنىڭ سالماعى اۋىرلاۋ, دەنەسى دە ۇلكەن جانە قولدارى ۇزىن بولعانى ايتارلىقتاي اسەر ەتكەن سياقتى. بەزبەن ۇرىس قارساڭىنداعى رەسمي ولشەۋ ۇدەرىسىندە قازاقستاندىق سپورتشىنىڭ سالماعى 152,8 فۋنت بولسا, قارسىلاسىنىڭ 154,2 فۋنت تار­تاتىنىن كورسەتىپ بەردى. م­ۇنىڭ ۇستىنە, 28 جاسار حۋان­نىڭ كاسىپقويلار شارشى الاڭى توسىندەگى تاجىريبەسى 31-دەگى قاناتتىڭ تەرگەندەرىنەن تومەن بولماي شىقتى. كولۋمبيالىق بىلعارى قولعاپ شەبەرى قازىرگە دەيىن 22 رەت قارسىلاستارىمەن قولعاپ ءتۇيىستىرىپ, سولاردىڭ 18-ىندە مەرەيىن ۇستەم ەتكەن ەكەن. بۇدان بولەك, 3 كەزدەسۋدى تەڭ اياق­تاپ, 1 ويىندا جەڭىلىسكە ۇشى­راعان. ال نوكاۋتتارى سانىن 17-دەن قايىرىپتى. دەمەك, 1 ۇرىستى عانا ۇپاي سانىمەن ۇتقان. وسىنىڭ ءوزى ونىڭ جويقىن كۇشتىڭ يەسى ەكەنىن بىلدىرەدى. قانات يسلام 2010 جىلى ءوزىنىڭ اتا-بابالارى مەكەنى – قازاقستان جەرىنە تۇراقتى قونىس تەبۋ ءۇشىن كەلەدى. 2011 جىلدىڭ قاڭتارىندا ەلىمىزدىڭ ازاماتى بولادى. ال 2012 جىلعى قىركۇيەكتەن كاسىپقويلار رينگىندە شايقاسا باستادى. ونداعى ءبىرىنشى شايقاسىن 28 قىركۇيەكتە وتكىزدى. سول جىلعى 19 جەلتوقساندا WBA Fedecaribe نۇسقاسى بويىنشا ءبىرىنشى ورتا سالماقتا العاشقى اتاعىنا قول جەتكىزدى. تاعى ءبىر ايتا كەتەتىن جايت, قانات كاسىپقويلار رينگىنە قا­دام باسقالى «قازاق» دەگەن لاقاپ اتپەن شايقاستارعا شى­عادى. جانە ونىڭ قۇجاتتاعى اتى-ءجونى دە قانات يسلام ەمەس, قانات يسلام ۇلى. ول ءدال قازىرگى تاڭ­دا BoxRec رەيتينگىسىندە 74 ۇپاي­مەن 79-شى پوزيتسيادا تۇر. بۇل ءبىزدىڭ بوكسشىمىزدىڭ جوعارى ورلەي ءتۇسۋ ءۇشىن ءالى تالاي تەر توگۋى كەرەك ەكەنىن, سول ارقىلى بەدەل-دەڭگەيلەرى جوعارى شەبەرلەرمەن كوبىرەك شايقاسۋى ءتيىس ەكەنىن كورسەتەدى. وسى جىلداردىڭ بارىندە وعان باۋىرجان وسپانوۆ ەسىمدى قازاقستاندىق كاسىپكەر ۇدايى دەمەۋشىلىك جاساپ كەلەدى. بوكسشى كوپتەن بەرى اقش-تىڭ نيۋ-يورك قالاسىندا تۇرىپ, جات­تىعىپ ءجۇر. ەندى قانات يسلام مەن حۋان دە انحەل اراسىنداعى جەكپە-جەك جايىنا كەلەيىك. شايقاس العاشقى سەكۋندتاردان ءبىزدىڭ جەرلەسىمىزدىڭ شابۋىلىمەن باستالدى. ول بىردەن ورشەلەنە العا ۇمتىلدى. قولدارى ۇزىن, تۇلعاسى زور قارسىلاسىن وزىنە باعىندىرۋدىڭ, ىرقىنا كوندىرۋدىڭ, ءسويتىپ, تۋرا سوققىلار جاساي الۋدىڭ بىردەن-ءبىر جولى دا وسى ەدى. الايدا, انحەل جاع­دايدىڭ بۇلايشا ءوربۋىن الدىن الا كۇتكەن سياقتى. ول قانات­تىڭ ەكپىنىن باسا وتىرىپ, ءوزى دە بىرنەشە جاقسى سوققى جاساپ ءۇل­گەردى. بۇل كەزدە ءبىزدىڭ بوكس­شىنىڭ ۇتىپ شىعاتىنىنا اسا ءبىر كۇشتى سەنىم بولعان جوق. ەكىنشى راۋند تا وسى ىزبەن كەتتى. تاعى دا قانات ءبىرىنشى نومىرمەن ويناسا, حۋان قارسى شابۋىلدى كوبىرەك دىتتەدى. ال ءۇشىنشى كەزەڭدە قازاق بوكسشىسىنىڭ قارقىنى ءسال باسەڭدەپ كەتتى. ايتكەنمەن, بىرنەشە سوققىسى قارسىلاسىنا ءدوپ ءتيىپ, ونى ازداپ تەڭسەلدىرىپ جىبەرگەندەي بولدى. كەلەسى راۋندتا قانات جاتتىقتىرۋشىسىنىڭ نۇسقاۋىمەن بەلسەندىلىگىن بۇرىن­عىدان دا تومەندەتىپ الدى. بىراق راۋند سوڭىندا كەنەت جىلدام اينالىمعا تۇسكەن ونىڭ قۋاتتى قارقىنى كولۋمبيالىقتى قاتتى ساستىردى. ونى سۇراپىل سوق­قىلاردان تەك گونگ داۋسى عانا امان الىپ قالدى. بەسىنشى راۋند تا قاناتتىڭ باسىمدىلىعىمەن ءوتتى. ال التىنشى راۋند ءبارىنىڭ نۇكتەسىن قويىپ بەردى. قاناتتىڭ ءبىر جويقىن سوققىسى كەنەت ار­بيعان كولۋمبيالىقتى جالپاسىنان ءتۇسىردى. ودان ەس جيىپ, ەندى ورتاعا كەلە بەرگەنىندە تاعى ءبىر سوققى جەرگە وتىرعىزىپ تاستادى. سودان حۋان ەسىن دۇرىس جيا المادى. مۇنى بايقاعان اربيتر بىردەن جەكپە-جەكتى توقتاتتى. ءبىر ايتا كەتەتىن جايت, قانات يسلام ءوزى ۇتقان 15 ۇرىستى ال­عاشقى ءۇش راۋندتا بىتىرسە, سونىڭ 7-ەۋىنە ءبىرىنشى راۋندتا قول جەت­كىزگەن ەدى. ءسوز ورايى كەلگەندە, تاعى ءبىر جاڭالىقتىڭ جايىن ايتىپ وتپەكپىز. مامىردىڭ 8-ءى كۇنى اقش-تىڭ لاس-ۆەگاس قالاسىندا 72, 6 كگ سالماقتاعى مەكسيكالىق ساۋل الۆارەس بريتانيالىق امير حاندى 6-راۋندتا نوكاۋتپەن ۇتىپ, ءوزىنىڭ بۇكىلالەمدىك بوكس كەڭەسىنىڭ (WBC) نۇسقاسى بويىنشا الەم چەمپيونى اتاعىن قورعاپ قالدى. وسىدان كەيىن ونىڭ وكىلى دە لا حويا گەننادي گولوۆكيننىڭ پروموۋتەرى توم لەففلەرگە شىعىپ, جاقىن ارادا ءوز شاكىرتتەرىنىڭ ءبىر-بىرىمەن قولعاپ ءتۇيىستىرۋ مۇمكىندىكتەرى تۋرالى ءسوز قوزعادى. تاراپتار شايقاستىڭ دالمە-ءدال ۋاقىتى جونىندە الداعى كۇندەردە كەلىسىمگە كەلۋگە ۇيعارىم جاساستى. سەرىك ءپىرنازار, «ەگەمەن قازاقستان»