«ەرتىس» پرەمەر-ليگادا كوش باستادى

استانا. 9 مامىر. بۇگىن فۋتبولدان قازاقستان پرەمەر-ليگاسىنىڭ 10-تۋرى اياسىندا ءۇش ويىن وينالدى. بۇل تۋرالى egemen.kz ءتىلشىسى حابارلادى. «ەرتىس» (پاۆلودار) – «تاراز» (تاراز) 2:1 گولدار: رومان مۇرتازاەۆ 16, مارات شاحمەتوۆ 56 (اۆتوگول) – ماليك مانە 34. بۇگىنگى كەزدەسۋلەردىڭ ىشىنەن پاۆلودارداعى «ەرتىس» – «تاراز» ويىنىن اسا تارتىستى بولدى دەۋگە تولىق نەگىز بار. ماتچتىڭ 16-مينۋتىندا پاۆلودارلىقتاردىڭ ساپىنان رومان مۇرتازاەۆ (سۋرەتتە) ناتيجەلى سوققى جاساپ, ەسەپ اشتى. ايتا كەتەيىك, بۇل – روماننىڭ بيىلعى ماۋسىمداعى 7-گولى. ءۇشىنشى ويىندا قاتارىنان مەرەيى ۇستەم بولعان ول ازىرگە مەرگەندەر كوشىندە جەكە-دارا توپ باستاپ كەلەدى. «تاراز» ويىنشىلارى ۇزىلىسكە دەيىن ماليك مانەنىڭ كومەگىمەن تارازى باسىن تەڭەستىرگەن بولاتىن. الايدا, قارسىلاستارىنىڭ ەكىنشى تايمداعى تولاسسىز شابۋىلى ءوز جەمىسىن بەرمەي قويمادى. سونداي ساتتەردىڭ بىرىندە مارات شاحمەتوۆ ءوز قاقپاسىنا گول سوعۋعا ءماجبۇر بولدى. بۇل ويىننىڭ 56-مينۋتى بولاتىن. قالعان ۋاقىتتا تابلوداعى ەسەپ وزگەرىسسىز قالىپ, الاڭ يەلەرى جەڭىسكە جەتتى. وسى جەڭىستەن كەيىن «ەرتىس» 26 ۇپايمەن تۋرنير كەستەسىندە كوش باستادى. الايدا, ەرتەڭ ءوز الاڭىندا ورالدىڭ «اقجايىعىن» قابىلدايتىن «استانا» كومانداسىندا پاۆلودارلىقتاردى ەكىنشى ورىنعا ىعىستىرۋعا مۇمكىندىك مول. ول ءۇشىن ەلوردالىقتار اتالعان كەزدەسۋدە ۇپاي جوعالتپاۋى ءتيىس. «ورداباسى» (شىمكەنت) – «شاحتەر» (قاراعاندى) 2:0 گولدار: ازات نۇرعاليەۆ 22 (پەنالتي), ەركەبۇلان تۇڭعىشباەۆ 47. شىمكەنتتە جەرگىلىكتى «ورداباسى» قاراعاندىنىڭ «شاحتەرىمەن» كەزدەسىپ, 2:0 ەسەبىمەن جەڭىسكە جەتتى. ءبىرىنشى تايمدا ازات نۇرعاليەۆ ون ءبىر مەترلىكتەن ەسەپ اشسا, ەكىنشى بولىكتە ەركەبۇلان تۇڭعىشباەۆ مەرگەندىگىمەن كوزگە ءتۇسىپ, ەسەپتى ەسەلەدى. بۇل جەڭىستەن كەيىن «ورداباسى» تۋرنير كەستەسىندە 3-ورىنعا كوتەرىلدى. دەگەنمەن, 10-تۋردىڭ سوڭعى قورىتىندىسى بويىنشا شىمكەنتتىكتەردى «وقجەتپەس» كومانداسى باسىپ وزۋى ابدەن مۇمكىن. اتاپ ايتقاندا, ەرتەڭ كوكشەتاۋلىقتار سىرت الاڭدا تالدىقورعاننىڭ «جەتىسۋىن» جەڭسە, قايتادان ۇزدىك ۇشتىكتىڭ قاتارىنا قوسىلادى. «اقتوبە» (اقتوبە) – «اتىراۋ» (اتىراۋ) 1:0 گول: ديدار جالمۇقان 74 (پەنالتي). اقتوبەدە وتكەن باتىس دەربيىندە الاڭ يەلەرى باسىم ءتۇستى. بۇل ماتچتا ويىن تاعدىرىن پەنالتيدەن سوعىلعان جالعىز گول شەشتى. كەزدەسۋدىڭ 74-مينۋتىندا ديدار جالمۇقان ون ءبىر مەترلىكتى ءدال ورىنداپ, كومانداسىنا جەڭىس سىيلادى. وسىلايشا, «اقتوبە» 15 ۇپايمەن تۋرنير كەستەسىندە 5-ورىنعا نىق تابان تىرەدى. ەرتەڭ, ياعني 10 مامىردا تۋردىڭ قالعان ءۇش ويىنى وينالادى. اتالعان ماتچتاردا مىنا كوماندالار كەزدەسەدى: «استانا» (استانا) – «اقجايىق» (ورال) «توبىل» (قوستاناي) – «قايرات» (الماتى) «جەتىسۋ» (تالدىقورعان) – «وقجەتپەس» (كوكشەتاۋ). ەلامان قوڭىر. دەرەك: egemen.kz. فوتو: vk.com.