مەملەكەت باسشىسى ماسكەۋدە وتكەن اسكەري پارادقا قاتىستى

استانا. 9 مامىر. مەملەكەت باسشىسى نۇرسۇلتان نازارباەۆ قىزىل الاڭدا وتكەن اسكەري پارادتا بولدى. اسكەري پارادتا ەلباسى بەلگىسىز سولدات زيراتىنا گۇل قويۋ راسىمىنە قاتىستى. بۇل تۋرالى akorda.kz-كە سىلتەمە جاساعان egemen.kz ءتىلشىسى حابارلادى. ماسكەۋدەگى جەڭىس پارادىنا 16 مىڭنان استام اسكەري قىزمەتشى, 194 قۇرلىقتىق اسكەري تەحنيكا, 143 ۇشاق جانە تىكۇشاق قاتىستى. قىزىل الاڭنان ۇلى وتان سوعىسىنداعى اسكەريلەردىڭ فورماسىن كيگەن تاريحي جاۋىنگەرلىك ەسەپتوپتار ساپ تۇزەپ ءجۇرىپ ءوتتى. پاراد بارىسىندا تمد-عا قاتىسۋشى مەملەكەتتەردىڭ قارۋلى كۇشتەرى مەن باسقا دا بىرقاتار شەت ەلدەردەن ون ەسەپتوپ سالتاناتتى شەرۋ تارتتى. قازاقستاننان پارادقا ەلىمىزدىڭ قارۋلى كۇشتەرى قۇرلىق اسكەرلەرىنىڭ اسكەري ينستيتۋتىنىڭ كۋرسانتتارى قاتىستى. قىزىل الاڭداعى جەڭىس پارادىنا 2 300-دەن استام ادام, سونىڭ ىشىندە تاياۋ جانە الىس شەتەلدەردەن ارداگەرلەر شاقىرىلدى. ماسكەۋدەگى سالتاناتتى ءىس-شارالارعا 30-عا جۋىق شەتەلدىڭ مەملەكەت جانە ۇكىمەت باسشىلارى, حالىقارالىق ۇيىمداردىڭ جەتەكشىلەرى قاتىستى. داستان كەنجالين. دەرەك, فوتو: akorda.kz