استانا. 9 مامىر. قىزىلوردادا جەڭىستىڭ 71 جىلدىعىنا ارنالعان «قاھارمان ۇرپاققا مىڭ تاعزىم» اتتى ميتينگ جانە گۇل قويۋ ءراسىمى ءوتتى. شاراعا ۇلى وتان سوعىسى جانە تىل ارداگەرلەرى باستاعان سىر جۇرتشىلىعى قاتىستى. بۇل تۋرالى قىزىلوردا وبلىسى اكىمدىگىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
شاراعا قاتىسۋشىلار الدىمەن قان مايداننان ورالماعان بوزداقتاردى ءبىر مينۋت ۇنسىزدىكپەن ەسكە الدى. مۇنان كەيىن وبلىس اكىمى قىرىمبەك كوشەرباەۆ باستاعان جۇرتشىلىق ەسكەرتكىشكە گۇل شوقتارىن قويدى.
ەكىنشى دۇنيەجۇزىلىك سوعىسقا سىر وڭىرىنەن 70 مىڭ سارباز اتتانسا, سونىڭ تەڭ جارتىسىنا جۋىعى ەلگە ورالعان جوق. قازىر 64 مايدانگەردىڭ عانا كوزى ءتىرى.
« ۇلى وتان سوعىسى وتانى مەن تاريحي ادىلدىك ءۇشىن جان قيۋعا دايىن قاھارمان حالقىمىزدى كۇللى الەمگە تانىتقان قاسيەتتى مايدان بولسا, ۇلى جەڭىس سىزدەردىڭ ەرلىكتەرىڭىزدى ماڭگىلىك ەل جادىندا ساقتاۋعا ارنالعان ەڭ قاستەرلى مەرەكە. بۇل جەڭىس بولماعاندا, بۇگىنگى تاۋەلسىز قازاقستان دا بولماس ەدى. سوندىقتان دا ۇلى جەڭىسكە ولشەۋسىز ۇلەس قوسقان ءاربىر ارداگەرگە كەيىنگى ۇرپاق اتىنان مىڭ مارتە العىس ايتامىز. سىزدەر سياقتى جەڭىمپازداردىڭ ۇرپاعى, حالىقتار اراسىنداعى دوستىق پەن بىرلىكتى قاستەرلەگەن اعا بۋىننىڭ جالعاسى ەكەنىمىزدى ءاردايىم ماقتان ەتەمىز. بارشاڭىزدى بۇگىنگى مەرەكەمەن شىن جۇرەكتەن قۇتتىقتايمىن», – دەدى وبلىس اكىمى قىرىمبەك كوشەرباەۆ.
مۇنان سوڭ جاسامپاز جاساق شەرۋى ءوتتى. بۇل جوبا بيىل قاتارىنان ءتورتىنشى جىل جۇزەگە اسىپ وتىر. ەرىكتى زاماتتاردان قۇرالعان شەرۋ ساپىندا ۇلى وتان سوعىسىندا شەيىت بولعان, ەلگە ورالىپ قايتىس بولعان, سەمەي – نەۆادا, چەرنوبىل اپاتى, اۋعان سوعىسى ارداگەرلەرىمىزدىڭ ۇرپاقتارى, باتىر انالار, جاستار بار. بۇل بۇگىنگى ۇرپاق زۇلمات سوعىستا كەۋدەسىن وق پەن وتقا توسقان جاۋىنگەر بابالارىن ۇمىتپايتىندىعىنىڭ ءبىر كورىنىسى.
سالتاناتتى شارادا قوناقتار مەن سوعىس جانە ەڭبەك ارداگەرلەرى ارنايى دايىندالعان شاتىرلاردان اسكەر بوتقاسىنان ءدام تاتتى.
تالعات رايىمبەك.
دەرەك, فوتو: قىزىلوردا وبلىسى اكىمدىگىنىڭ ءباسپاسوز قىزمەتى.
