استانا. 9 مامىر. بۇگىن استانادا 1941-1945 جىلدارداعى ۇلى وتان سوعىسىنداعى جەڭىستىڭ 71 جىلدىعىنا وراي «وتان قورعاۋشىلار» مونۋمەنتىنە سالتاناتتى گۇل قويۋ ءراسىمى ءوتتى. بۇل تۋرالى egemen.kz ءتىلشىسى حابارلادى.
شاراعا پرەمەر-مينيستر كارىم ءماسىموۆ, پارلامەنت سەناتىنىڭ توراعاسى قاسىم-جومارت توقاەۆ, ءماجىلىستىڭ توراعاسى باقتىقوجا ىزمۇحامبەتوۆ, مەملەكەتتىك حاتشى گۇلشارا ابدىقالىقوۆا, قورعانىس ءمينيسترى يمانعالي تاسماعامبەتوۆ, سوعىس جانە ەڭبەك ارداگەرلەرى, مەملەكەتتىك ورگان باسشىلارى, سونداي-اق, ۇلى وتان سوعىسىندا قازا بولعان قازاقستاندىقتاردى ەسكە الۋ ءۇشىن جينالعان ەلوردا تۇرعىندارى مەن قوناقتارى قاتىستى.
«بۇگىن مەرەكەلىك شاراعا ۇلى وتان سوعىسىنىڭ 45 قاتىسۋشىسى قۇرمەتتى قوناق رەتىندە قاتىستى. اۋا-رايىنىڭ قولايسىزدىعىنا قاراماستان ارداگەرلەردىڭ كوڭىل-كۇيى كوتەرىڭكى. وكىنىشكە وراي, جىلدان-جىلعا ولاردىڭ سانى ازايىپ بارادى. ارداگەر اتالارىمىزعا دەنساۋلىق تىلەيمىن. بالالارى مەن نەمەرە, شوبەرەلەرىنىڭ ورتاسىندا امان-ەسەن جۇرسە ەكەن دەيمىن» , دەپ اتاپ ءوتتى استانا قالاسى قورعانىس ىستەرى جونىندەگى دەپارتامەنتى باستىعىنىڭ ورىنباسارى باحتيار پەرنەبەكوۆ.
بۇل كۇنى «وتان قورعاۋشىلار» ەسكەرتكىشىنە 1 500-گە جۋىق گۇل شوقتارى قويىلدى. گۇل قويۋ ءراسىمى مەملەكەتتىك كۇزەت قىزمەتى پرەزيدەنتتىك وركەسترىنىڭ ورىنداۋىنداعى مۋزىكالىق شىعارمالارمەن سۇيەمەلدەندى. شارا قاتىسۋشىلارىنىڭ جۇزىنەن قۋانىش پەن تولقىنىس, ەرەكشە ماقتانىش سەزىمى بايقالىپ تۇردى. قان مايداندا ەرلىكپەن قازا بولعان وتانداستارىمىزدىڭ رۋحىنا تاعزىم جاسالىپ, ءبىر مينۋت ۇنسىزدىك جاريالاندى.
داستان كەنجالين.
دەرەك, فوتو: قورعانىس مينيسترلىگى.
