قوستاناي. 9 مامىر. ەۋرازيالىق توپ (ERG) قۇرامىنا كىرەتىن سوكولوۆ-سارىباي كەن بايىتۋ وندىرىستىك بىرلەستىگىندە «اعاش وتىرعىز» اكتسياسى باستالدى. بۇل تۋرالى كاسىپورىننىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
كوكتەمگى اعاش وتىرعىزۋ جۇمىستارىنا كاسىپورىن 3 ملن. تەڭگە ءبولدى. بۇل قاراجاتقا 1000 پيراميدالىق تەرەك, قاراعاش, الما اعاشى, تاتار ۇيەڭكىسى, سونداي-اق, حوش ءيىستى مامىرگۇل مەن يتمۇرىن بۇتالارى ساتىپ الىندى. جاسىل جەلەكتىڭ نەگىزگى وتىرعىزىلاتىن اۋماعى رەتىندە وڭتۇستىك-سارىباي كەنىشىنىڭ سانيتارلىق-قورعاۋ زوناسى تاڭدالدى. اعاش كوشەتتەرىنىڭ قالعان بولىگى جەلەزورۋدنىي ستانساسىنىڭ تۇرعىن ۇيلەر اۋماعىندا ورىن تەبەتىن بولادى.
سوكولوۆ-سارىباي كەن بايىتۋ وندىرىستىك بىرلەستىگىنىڭ ەكولوگيا جانە جەر قويناۋىن پايدالانۋ دەپارتامەنتى باسشىسى ەربولات كوپپاەۆ: «مۇنداعى بارلىق بولىمشەلەردە ەكولوگيانى جاقسارتۋ ماسەلەسىنە ەرەكشە نازار اۋدارىلادى. 2005 جىلدان باستاپ بىرلەستىكتە قورشاعان ورتانى قورعاۋدى باسقارۋ جۇيەسى ەنگىزىلىپ, تابىستى جۇمىس ىستەپ كەلەدى. 2014 جىلدىڭ قورىتىندىسى بويىنشا, بيزنەستىڭ الەۋمەتتىك جاۋاپكەرشىلىگىن ىنتالاندىرۋعا ارنالعان «پارىز» رەسپۋبليكالىق كونكۋرسىندا «ەكولوگياعا قوسقان ۇلەسى ءۇشىن» نوميناتسياسىن يەلەنۋىمىز – وسىنىڭ دالەلى. سول جىلى كاسىپورىن جۇمىسكەرلەرىنىڭ كۇشىمەن 10 مىڭنان استام پيراميدالىق تەرەك, شەگىرشىن, قايىڭ, شىرشا, قاراعاي مەن بۇتالار ونەركاسىپتىك الاڭنىن سانيتارلىق-قورعاۋ زوناسىنىڭ شەكاراسىندا وتىرعىزىلعان بولاتىن», – دەدى.
بيىل جاسىل جەلەكتى وتىرعىزۋدا بىرلەستىك جۇمىسكەرلەرىنە «جاستار» قوعامدىق بىرلەستىگى كومەككە كەلىپ وتىر. ۇيىم مۇشەلەرى ءوز ميسسيالارىن زور جاۋاپكەرشىلىكپەن اتقارىپ كەلەدى.
سوكولوۆ-سارىباي كەن بايىتۋ وندىرىستىك بىرلەستىگىنىڭ جاستار رەسۋرستىق ورتالىعى جەتەكشىسى ماكسيم فرولوۆ: «اعاش وتىرعىز» اكتسياسىنا قاتىسۋ – ءبىز ءۇشىن ۇلكەن ابىروي. ءبىز قالا قۇراۋشى كاسىپورىن باسشىلىعى ەكولوگيالىق ماسەلەلەردى شەشۋگە قاشان دا دايىن ەكەندىگىن جاقسى بىلەمىز. ناۋرىز ايىندا باق-تا جاريالانعان ماتەريالدار نەگىزىندە زەرتتەۋلەر جۇرگىزىلدى. ونىڭ ناتيجەسى بويىنشا رۋدنىي ەڭ از لاستانعان قالالاردىڭ قاتارىنا كىرگەن. بۇل اعاشتار دا جاڭا جەردە تامىر الىپ, بولاشاقتا ادامدارعا تەك قانا پايداسىن اكەلەدى دەگەن ۇمىتتەمىن», – دەدى.
اعاشتاردى وتىرعىزۋ ناۋقانى مامىر ايىنىڭ ورتاسىنا دەيىن جالعاسادى. ودان كەيىن وسى جاسىل جەلەكتى كۇتىپ-باعۋ جۇمىستارىنا كەزەك بەرىلمەك.
ءنازيرا جارىمبەتوۆا.
دەرەك, فوتو: سوكولوۆ-سارىباي كەن بايىتۋ وندىرىستىك بىرلەستىگىنىڭ ءباسپاسوز قىزمەتى.
