كاسىپقوي بوكسشى قانات يسلام 21-جەڭىسىنە قول جەتكىزدى (ۆيدەو)

استانا. 9 مامىر. بۇگىن ءبىرىنشى ورتا سالماقتا باق سىنايتىن قازاقستاندىق كاسىپقوي بوكسشى قانات يسلام شارشى الاڭداعى كەزەكتى جەڭىسىنە قول جەتكىزدى. اقش-تىڭ لەيكلەند قالاسىندا وتكەن بوكس كەشىندە ول كولۋمبيالىق حۋان دە انحەلمەن كەزدەسىپ, 6-راۋندتا قارسىلاسىنان تەحنيكالىق نوكاۋتپەن باسىم ءتۇستى. بۇل تۋرالى egemen.kz ءتىلشىسى حابارلادى. جەكپە-جەكتىڭ العاشقى سەكۋندتارىنان باستاپ العا ۇمتىلعان وتانداسىمىز ءبىرىنشى راۋندتىڭ وزىندە بىرنەشە جويقىن سوققى جۇمساپ ۇلگەردى. دەگەنمەن, قارسىلاسى قاناتتىڭ شابۋىلىنا لايىقتى تويتارىس بەرىپ, ءوزى دە قارىمتا شابۋىلعا شىعۋدى ۇمىتقان جوق. ەكىنشى راۋندتا دا جەرلەسىمىز ءبىرىنشى نومىرمەن جۇدىرىقتاسسا, حۋان دە انحەل كوبىنە قورعانۋعا ءماجبۇر بولدى. ءۇشىنشى راۋندتا قانات قارقىنىن ءسال باسەڭدەتكەنىمەن, جۇمساعان سوققىلارى دىتتەگەن جەرىنە ءدوپ ءتيىپ جاتتى. كەلەسى كەزەڭدە جاتتىقتىرۋشىسىنىڭ سوزىنە قۇلاق اسقان ءبىزدىڭ بوكسشى تاعى دا ەكپىنىن باياۋلاتتى. الايدا, راۋند سوڭىندا شابۋىلىن كۇشەيتكەن ول دە انحەلدى سوققىنىڭ استىنا الدى. كولۋمبيالىقتىڭ باعىنا وراي ءدال سول مەزەتتە راۋند اياقتالىپ, ول نوكداۋننان امان قالدى. كەلەسى بەسىنشى راۋند تا الدىڭعىلارىنداي قازاقستاندىقتىڭ باسىمدىعىمەن ءوتتى. ۋاقىت وتكەن سايىن قارقىنىن كۇشەيتكەن قاناتتىڭ سوققىلارىنان ەسەڭگىرەگەن كولۋمبيالىق ءۇشىن ەكى اياققا تۇرۋدىڭ ءوزى مۇڭعا اينالدى. ايتسە دە, بۇل جولى دا ونى راۋندتىڭ اياقتالعانىن بىلدىرەتىن گونگ قۇتقارىپ قالدى. ال التىنشى راۋندتا دە انحەلدىڭ كۇشى سارقىلىپ, نوكداۋنعا ءتۇستى. الايدا, جەكپە-جەكتى جالعاستىرۋعا مۇمكىندىك تاپقانىمەن, ەسىن تولىق جيناپ ۇلگەرمەگەن كولۋمبيالىقتىڭ ودان ارىگە شاماسى جەتپەدى. ناتيجەسىندە تورەشى جەكپە-جەكتى توقتاتىپ, قانات يسلامنىڭ جەڭىسكە جەتكەنىن حابارلادى. وسىلايشا, جەرلەسىمىز كاسىپقوي رينگتەگى 21-جەڭىسىنە قول جەتكىزىپ وتىر. بۇعان دەيىن 21 جەكپە-جەك وتكىزگەن قاناتتىڭ سونىڭ 18-ىندە مەرزىمىنەن بۇرىن جەڭىسكە جەتكەنىن اتاپ وتكەن ءجون. تاعى ءبىر نازار اۋدارار جايت, يسلام مەن دە انحەل كەزدەسۋى 10 راۋندقا جوسپارلانعان بولاتىن. ەلامان قوڭىر. دەرەك: egemen.kz. فوتو: vk.com.