استانادا العاش رەت «اسكەر بارىسى» ءتۋرنيرى ءوتتى

استانا. 8 مامىر. استانادا قازاق كۇرەسىنەن قورعانىس مينيسترلىگىنىڭ ەلباسى نۇرسۇلتان نازارباەۆتىڭ جۇلدەسى ءۇشىن وتەتىن «قازاقستان بارىسى» رەسپۋبليكالىق تۋرنيرىنە  ىرىكتەۋ جارىسى ءوتتى. بۇل تۋرالى egemen.kz ءتىلشىسى حابارلادى. جارىسقا 16 بالۋان قاتىستى. بەلدەسۋدە باس جۇلدەنى تالعات امىرەنوۆ جەڭىپ الدى. ەكىنشى ورىندى ارمان ابەۋوۆ, ءۇشىنشى ورىندى دارحان داۋىتبەكوۆ يەلەندى. «قازاقستان بارىسى» قازاق كۇرەسىن دامىتۋ قورىنىڭ توراعاسى ارمان شوراەۆتىڭ ايتۋىنشا, جارىس العاش رەت اسكەريلەر اراسىندا ءوتتى. بۇل بەلدەسۋدىڭ ماقساتى – قازاق كۇرەسى قامتىلماي جاتقان سالالاردا ۇلتتىق كۇرەسىمىزدى ناسيحاتتاۋ, كۇرەس دەسە دەلەبەسى قوزاتىن جىگىتتەردىڭ ۇلكەن جارىستارعا شىعىپ, كورىنۋىنە مۇمكىندىك بەرۋ. «قازىرگى كەزدە ستۋدەنتتەر, جاستار اراسىندا ۇلتتىق كۇرەسىمىزدى دامىتۋدى قولعا الىپ جاتىرمىز. بولاشاقتا قازاق كۇرەسىن ەلىمىزدىڭ بارلىق سالالارىندا قامتۋدى ماقسات ەتىپ وتىرمىز», دەدى ارمان تولەگەن ۇلى. جەڭىمپازعا التىن بەلبەۋ مەن 300 000 تەڭگە سىياقى, ونىڭ جاتتىقتىرۋشىسىنا 100 000 تەڭگە سىياقى تابىس ەتىلدى. سونىمەن بىرگە ول «قازاقستان بارىسى» رەسپۋبليكالىق ءتۋرنيرىنىڭ فينالىنا جولداما الدى. جۇلدەگەرلەرگە باعالى سىيلىقتار مەن مەدال, ديپلوم تاپسىرىلدى. داستان كەنجالين. دەرەك, فوتو: «قازاقستان بارىسى» قازاق كۇرەسىن دامىتۋ قورى.