الاپات ورتتەن 90 مىڭ ادام باسپاناسىن تاستاپ كەتۋگە ءماجبۇر بولدى

استانا. 7 مامىر. كانادانىڭ البەرتا پروۆينتسياسىندا ورمان ءورتى ءورشىپ تۇر. بۇل تۋرالى 24.kz-كە سىلتەمە جاساعان egemen.kz ءتىلشىسى حابارلادى. قىزىل جالىننىڭ سالدارىنان ەلدە مۇناي باعاسى قىمباتتادى. سەبەبى, كەن ورىندارىنىڭ نەگىزگى بولىگى ءدال وسى ايماقتا ورنالاسقان. وسىعان بايلانىستى, بىرنەشە كومپانيا شيكىزات ءوندىرۋ كولەمىن ازايتتى. الاپات ءورت كانادانىڭ باتىسىنداعى فورت-ماكميۋررەي قالاسىنداعى اۋەجايعا دا ۇلاستى. سونىمەن قاتار, اەروپورت قاسىنداعى قوناقۇي مەن دۇكەندەر قىزىل جالىنعا وراندى. جولاۋشىلار قاۋىپسىز ايماققا كوشىرىلىپ, اۋە رەيستەرىنىڭ ءبارى كەيىنگە شەگەرىلدى. قازىر تىلسىز جاۋدىڭ كولەمى 10 ەسەگە ارتقان. سونداي-اق, ايماقتا تۇراتىن 90 مىڭعا جۋىق تۇرعىن باسپانالارىن تاستاپ كەتۋگە ءماجبۇر بولدى. قازىر ولار جەرگىلىكتى حوككەي ارەنالارى مەن سپورت زالدارىن پانالاۋدا. زارداپ شەككەندەرگە تورونتو قالاسىنداعى ەرىكتىلەر گۋمانيتارلىق كومەك كورسەتىپ جاتىر. رەسمي مالىمەتتەر بويىنشا, الاپات ءورت 85 مىڭ گەكتار اۋماقتى شارپىپ ۇلگەرگەن. سالدارىنان 1,5 مىڭنان استام عيمارات جارامسىز بولىپ قالدى. بولجام بويىنشا شىعىن كولەمى 8 ميلليارد دوللاردى قۇراپ وتىر. ايان ءابدۋالي. دەرەك, فوتو: 24.kz.