پارتيا قۋاتتى ساياسي كۇش بولىپ قالۋى ءتيىس

مەملەكەت باسشىسى نۇرسۇلتان نازارباەۆ «نۇر وتان» پارتياسى ساياسي كەڭەسىنىڭ بيۋرو وتىرىسىنا قاتىستى, دەپ حابارلادى پرەزيدەنتتىڭ ءباسپاسوز قىزمەتى. وتىرىس بارىسىندا مەملەكەت باسشىسى اتقارعان جۇمىسى ءۇشىن ا.مىرزاحمەتوۆكە العىس ايتىپ, پارتيا توراعاسىنىڭ جاڭا ءبىرىنشى ورىنباسارى م.قۇل-مۇحاممەدتى تانىستىردى. قازاقستان پرەزيدەنتى پارتيا توراعاسىنىڭ ءبىرىنشى ورىنباسارى رەتىندە ا.مىرزاحمەتوۆتىڭ وزىنە جۇكتەلگەن مىندەتتەردى ورىنداعانىن, پارلامەنت سايلاۋىن تابىستى وتكىزگەنىن اتاپ ءوتتى. سونداي-اق, نۇرسۇلتان نازارباەۆ ا.مىرزاحمەتوۆكە جاڭا لاۋازىمىندا بىرقاتار كەشەندى ءمىن­دەتتەردى, سونىڭ ىشىندە جەر ءما­سە­لەسىنىڭ ءتيىمدى شەشىلۋىن جۇزە­گە اسىرۋ قاجەت بولاتىنىن ايتتى. ا.مىرزاحمەتوۆ سەنىم ارتقانى ءۇشىن نۇرسۇلتان نازارباەۆقا العىس ايتىپ, تاپسىرىلعان جاڭا سالادا ءوز مىندەتىن جاۋاپكەرشىلىكپەن اتقارۋعا دايىن ەكەنىن ءبىلدىردى. سونىمەن قاتار, مەملەكەت باسشىسى م.قۇل-مۇحاممەدتىڭ جۋرناليستىك جانە زاڭگەرلىك ءبىلىمى بار ەكەنىنە, ءار جىلدارى پارلامەنت سەناتىنىڭ دەپۋتاتى, پرەزيدەنتتىڭ ءباسپاسوز حاتشىسى, كەڭەسشىسى, مادەنيەت ءمينيسترى بولىپ قىزمەت اتقارعانىنا نازار اۋداردى. قازاقستان پرەزيدەنتى پارتيا توراعاسىنىڭ جاڭا ورىنباسارى پارتيانىڭ قىزمەتىن ودان ءارى نىعايتۋ قاجەتتىگىن ەسكەرە وتىرىپ تاعايىندالعانىن, «نۇر وتاندا» بۇل ءۇشىن قارجىلىق, كادرلىق جانە ماتەريالدىق رەسۋرستىڭ ءبارى بار ەكەنىن اتاپ ءوتتى. – پارتيا قۋاتتى ساياسي كۇش بولىپ قالۋعا ءتيىس. بارلىق پىكىر, يدەيالار پارتيا تاراپىنان ءوربۋى كەرەك. «نۇر وتاننىڭ» ءوزىنىڭ تالداۋ ورتالىعى بولۋى قاجەت, – دەدى نۇرسۇلتان نازارباەۆ. م.قۇل-مۇحاممەد وزىنە سەنىم ارتىلعانى ءۇشىن العىس ءبىلدىرىپ, پارتيانىڭ ءتيىمدى جۇمىس ىستەۋىن قامتاماسىز ەتۋ ءۇشىن بار كۇشى مەن ءبىلىمىن جۇمسايتىنىن ايتتى.