ورالدا 4 مىڭ ادام اليمەنت تولەۋدەن قاشىپ ءجۇر

ورال. 4 مامىر. وتكەن جىلى ورال قالاسى اۋماعىندا جالپى سانى 8804 قۇقىق بۇزۋشىلىق وقيعاسى تىركەلگەن. سونىڭ ىشىندە اليمەنت وندىرۋگە قاتىستى 379 قىلمىستىق ءىس بويىنشا سوت الدى تەكسەرىس جۇمىستارى باستالدى. بۇل تۋرالى ورال قالالىق پروكۋراتۋرانىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. ونىڭ ايتۋىنشا, اليمەنت وندىرۋگە قاتىستى قوزعالعان قىلمىستىق ىستەر سانىنىڭ كوپتىگىنە قاراماستان, سوتقا بار بولعانى ءبىر-اق قىلمىستىق ءىس جولدانىپتى. قالعان ىستەر قىسقارتىلىپ, تولىققاندى تەكسەرۋ, انىقتاۋ جۇرگىزۋ ماسەلەسى مۇلدە نازاردان تىس قالعان. ناقتى ايتار بولساق, كۇنى بۇگىن 5784 قالا تۇرعىنى اليمەنت تولەۋشى بولىپ تابىلادى. سونىڭ تەك 1700-ءى عانا ۇل-قىزىن كۇتىپ-باعۋعا جۇمسالاتىن اليمەنت  قارجىسىن ءوز ەركىمەن اۋدارىپ وتىر. ال ءتورت مىڭداي ازامات اليمەنت تولەۋدەن باسىن الىپ-قاشىپ, سوت ورىنداۋشىلارى مەن ىشكى ىستەر ورگاندارىنان بوي تاسالاپ ءجۇر. كوپشىلىگى جۇمىس ىستەيتىن جەرىن, تابىسىن جاسىرۋدى ءجون كورەدى. اليمەنت تولەۋدەن قاشقاقتايتىن اتا-انالاردىڭ دەنى تۇراقتى ەڭبەك ەتەدى, ياعني سوتپەن شىعارىلعان شەشىمدى ورىنداۋعا قارجىلىق جاعىنان تولىق قابىلەتتى. پروكۋرورلىق تەكسەرىس كەزىندە 70 بورىشكەردىڭ جىلجيتىن جانە جىلجىمايتىن مۇلكى بار ەكەندىگى انىقتالعان. بەس بورىشكەردىڭ مۇلكىنە سوت ورىنداۋشىلار تاراپىنان ەشقانداي تىيىم سالۋ شاراسى قولدانىلماعانى بەلگىلى بولدى. وسىعان وراي الداعى ۋاقىتتا جۇيەلى جۇمىس جوسپارى بەكىتىلدى. تەمىر قۇسايىن. دەرەك: ورال قالالىق پروكۋراتۋرانىڭ ءباسپاسوز قىزمەتى. فوتو: 7ya.ru.