ءان كوگىنىڭ قوس قارلىعاشى

شىعىس وڭىرىندە قازاقستاننىڭ حالىق ارتىستەرى, اعايىندى ابدۋل­ليندەردىڭ 100 جىلدىق مەرەيتويى كەڭىنەن اتالىپ ءوتتى. مەرەيتوي اياسىندا وبلىستىق دراما تەاترىندا «تاع­دىرى ءبىر – ەكى جۇلدىز» اتتى كەش ءوتتى. مەرەكەلىك كونتسەرتكە كەلگەن قوناقتاردى شالقار رىسحانوۆ جەتەكشىلىك ەتەتىن «التاي» قازاق حالىق اسپاپتارى ءانسامبلى كۇيمەن قارسى السا, كەش شىمىلدىعىن شىعىس قازاقستان وبلىسى اكىمى­نىڭ سيمفونيالىق وركەسترى (باس ديريجەرى ا.گالسانوۆ) اشتى. كون­تسەرت بارىسىندا اعايىندى ابدۋل­ليندەردىڭ رەپەرتۋارىنداعى بەلگىلى شىعار­مالار ورىندالدى. ماسەلەن, مەم­لەكەتتىك سىيلىقتىڭ لاۋرەا­تى شاحيماردان ءابىلوۆ «اباي» وپەراسىنان ابايدىڭ ارياسىن, قازاقستاننىڭ ەڭبەك سىڭىرگەن ءارتىسى ۆياچەسلاۆ تكاچ «ەۆگەني ونە­گين» وپەراسىنان ونەگيننىڭ ارياسىن, اباي اتىنداعى اكادەميالىق وپە­را جانە بالەت تەاترىنىڭ ءانشىسى نۇرجان باجەكەنوۆ لەنسكيدىڭ ارياسىن ورىنداپ, جۇرتشىلىق ىقىلاسىنا بولەندى. سونداي-اق, اباي, جاياۋ مۇسا, اقان سەرى, ە.كانيو, ە.كاپۋلو, گ.پودەلسكي جانە تاعى باسقا كومپوزيتورلاردىڭ شىعارمالارى كورەرمەننىڭ قۇلاق قۇرىشىن قاندىردى. اتالعان كەشكە ارنايى كەلگەن ءمۇسلىم ءابدۋلليننىڭ قىزى مەن ۇلى عاليا, ساعىناي ابدۋل­ليندەر, ريشات ءابدۋلليننىڭ نەمەرەسى, بەلگىلى ءانشى كارينا ابدۋل­لينا دا قاتىسىپ, كورەرمەندەرگە اسەم اندەرىن ارنادى. جالپى, شىعىس قازاقستان اباي, شاكارىم سياقتى تالاي-تالاي تۋ­ما تالانتتى تۋعىزعان, دالانىڭ وزىندەي قوڭىر ءۇنى كۇمبىرلەگەن قوس جۇلدىز, اعايىندى ابدۋلليندەردى دە دۇنيەگە اكەلگەن كيەلى ولكە! ءوت­كەن عاسىردىڭ 1932-1933 جىلدارى ەلىمىزدە تۇڭعىش رەت اشىلعان مۋزىكالىق تەحنيكۋمنىڭ العاشقى تىڭداۋشىلارىنىڭ قاتارىندا ونەرگە قۇشتار جاس تالانتتار ءمۇسىلىم مەن ريشات تا بولدى. ءان كوگىنىڭ قوس قارلىعاشى ەكى جىلدان كەيىن ماسكەۋ مەملەكەتتىك كونسەرۆاتورياسىنا وقۋعا اتتانعان العاشقى توپ قۇرامىنا قوسىلدى. اعالى-ءىنىلى انشىلەردىڭ ارتيستىك قىزمەتى 1938 جىلى اباي اتىنداعى مەملەكەتتىك اكادەميالىق وپەرا جانە بالەت تەاترىنان باستاۋ الادى. «اباي» وپەراسىنان كەيىن «ەۆ­گەني ونەگيننىڭ» قويىلۋىندا دا ءبىر نازىك بايلانىس بار. قازاق كو­رەرمەندەرىن چايكوۆسكيدىڭ عا­جايىپ مۋزىكاسىمەن تانىستىرعان سپەكتاكلدە باستى رولدەر ونەگين مەن لەنسكيدى ابۋلليندەر ويناعان بولاتىن. اعايىندى انشىلەر ءبىر-ءبىرىن وتە جاقسى تۇسىنەتىن, سوندىقتان مۇنداي كەرەعار وبرازداردى قىزىق­تى, شىنايى, ءارى تابيعي بەرە بىلەتىن. ولاردىڭ ءار جاڭا ءرولى زامانداستارى تاراپىنان جۇلدىزدى تريۋمف رەتىندە باعالاندى. ءمۇسلىمنىڭ شەبەرلىگىن تانىتقان لەنسكيدىڭ ارياسىن كەيىن نەمەرە ءىنىسى, كسرو حالىق ءارتىسى الىبەك دىنىشەۆ تە زور تابىسپەن ورىنداپ, كورەرمەن ىقىلاسىنا بولەنۋى بەكەر ەمەس. بۇل – ءان قونعان اۋلەت. اكەلەرى مۇكىم ابدۋللين دومبىرادا ويناعان. ونىڭ سۇيەمەلدەۋىمەن بۇكىل وتباسى قوسىلىپ ءجيى ءان ايتاتىن-دى. بۇگىندە وسكەمەن قالاسىندا اعايىندى ابدۋلليندەردىڭ ەسىمىمەن اتالاتىن ونەر ۋچيليششەسى بار. اتال­عان وقۋ ورنىندا اعايىندى ابدۋل­ليندەردىڭ ءومىر جولىنان سىر شەرتەتىن مۋزەي اشىلعان. 2008 جىلدان باستاپ ونەر ۋچيليششەسىندە ۇزدىك 10 وقۋشىعا اعايىندى ابدۋل­ليندەر اتىنداعى شاكىرتاقى تاعايىن­دالىپ كەلەدى. ۆوكاليستەر بايقاۋىنىڭ باس جۇلدەسىن پاۆلودارلىق لەيلا قايىر يەلەنگەنىن ايتا كەتكەن ءلازىم. – ادامنىڭ سەزىمى مەن ىشكى دۇنيەسىن اۋەلى ءسوز جەتكىزەدى, ءسوز جەت­كىزە الماعاندى ساز جەتكىزەدى. سوندىقتان, ايگىلى انشىلەر ريشات پەن ءمۇسلىم ابدۋلليندەردىڭ 100 جىلدىق مەرەيتويى – شىعىس ءوڭىرىنىڭ عانا ەمەس, بۇكىل ەلىمىزدىڭ قۋانىشى. وبلىس ورتالىعىنداعى قازىرگى جامبىل اتىنداعى سايا­باقتىڭ اۋماعىندا ءبىر كەزدە تۇرعىن ۇيلەر بولعان ەكەن. سول ۇيدە دۇنيەگە كەلگەن قوس جۇلدىز بۇكىل الەمگە ءماشھۇر بولىپ, ەلىمىزدىڭ ونەر سالاسىن ىلگەرىلەتۋگە ۇلكەن ۇلەس قوستى. وسى رەتتە وبلىس اكىمى دانيال كەنجەتاي ۇلىنىڭ تاپسىرماسى بو­يىنشا, اعايىندى ابدۋلليندەردىڭ 100 جىلدىق مەرەيتويى اياسىندا جىل سوڭىنا دەيىن ءتۇرلى مادەني ءىس-شارالار وتكىزۋ كوزدەلگەن, – دەگەن وبلىس اكىمىنىڭ ورىنباسارى جاقسىلىق ومار وسكەمەندەگى اعايىندى ابدۋلليندەر اتىنداعى ونەر ۋچيليششەسىن كۇردەلى جوندەۋدەن وتكىزۋ ءۇشىن بيۋدجەتتەن 320 ميلليون تەڭگە قاراجات بولىنەتىنىن جەتكىزدى. دۋمان اناش, «ەگەمەن قازاقستان»  وسكەمەن