قارعالى وزەنى تاعى دا تاسىدى

وتكەن جىلعى ماۋسىمدا لاي ارالاسقان سەلدەن سوڭ الماتى تۇرعىندارى ارناسى شاعىن, ەلەۋسىز سىلدىراپ اعاتىن قارعالى وزەنىنە نازارى اۋعان ەدى. نەشە كۇن تولاسسىز جاۋعان اق جاۋىن سول قارعالىنىڭ اتىن تاعى دا شىعاردى. تاۋدان اققان جاۋىن سۋى بۇل جولى بىلتىر قاتتى زارداپ شەككەن ناۋرىزباي اۋدانىنان سارقىراي اعىپ ءوتىپ, ەتەكتەگى الاتاۋ اۋدانىنىڭ بىرقاتار كوشەلەرىن سۋعا تولتىردى. بارلىعى 15 ءۇيدىڭ ىشىنە سۋ كىرىپ, تۇرعىنداردى ابىگەرگە سالدى. سۋ باسقان اۋماقتىڭ زاردابىن جويۋعا الماتى قالاسىنىڭ توتەنشە جاعدايلار دەپارتامەنتى جەدەل كىرىستى. ءبىرىنشى كۇننەن باس­تاپ ءورت ءسوندىرۋ جانە اپاتتىق-قۇتقارۋ جۇمىستارى قىزمەتىنەن – 40 ادام, ازاماتتىق قورعانىستىڭ سۋمەن قامتۋ قىزمەتىنەن – 46 ادام, ازاماتتىق قورعانىستىڭ ينجەنەرلىك قىزمەتىنەن – 26 ادام, جىلۋمەن قامتۋ قىزمەتىنىڭ 50 وكىلى, جولدار مەن كوپىرلەر قىزمەتىنەن – 120 ادام, 20 تەحنيكا, الماتى اكىمدىگى جانىنداعى قۇتقارۋ قىزمەتىنەن (109) بارلىعى – 30 ادام, 8 تەحنيكا, قۇرلىق اسكەرلەرىنىڭ اسكەري ينستيتۋتىنان 161 ادام, 5 تەحنيكا ىسكە جاپپاي جۇمىلدىرىلدى. زارداپ شەككەن اۋماقتا بۇدان تىس بارلىعى 342 ادام مەن 13 تەحنيكا بىرلىگى جۇمىس ىستەدى. قازىر جاعداي تۇراقتالعان سەكىلدى. كوشەلەر بالشىق پەن قوقىستان تازارتىلدى. تەك ءبىر عانا قارعالى وزەنىنىڭ جاعاسىنا بارلىعى 45 توننا قۇم ارالاس توپىراق توگىلىپ, قۇم سالىنعان 2000-داي قاپشىقتار قويىلدى. كىشى الماتى, ەسەنتاي, ۇلكەن الماتى وزەندەرى دە اندا-ساندا ارناسىنان اسىپ اعىپ قويادى. جاڭبىر الماتىدا, اسىرەسە, ءتۇنى بويى جاۋادى. سينوپتيكتەر الماتى قالاسى مەن الماتى وبلىسىندا اق جاۋىن ءالى بىرنەشە كۇن ۇزدىك-سوزدىق ءسىر­كىرەپ جاۋادى دەگەن مالىمەت بەرىپ وتىر. توتەنشە جاعدايلار دەپار­تا­مەنتى ءموبيلدى تەلەفوندار جەلى­سى ارقىلى تاۋلى ايماقتاردا سەل قاۋ­پى بارىن قايتا-قايتا ەسكەرتۋدە. تالعات ءسۇيىنباي, «ەگەمەن قازاقستان» الماتى